"...Bizim işğal edilmiş bəzi ərazilərimizdə Ermənistan qanunsuz məskunlaşma aparıbdır. Bizim rayonlarımızın, kəndlərimizin adları dəyişdirilir. Azərbaycanlıların tarixi irsi silinir. Bizim tarixi abidələrimiz dağıdılır. Azərbaycan məscidləri dağıdılır, təhqir edilir. Bizim məscidlərimizdə Ermənistan inək, donuz saxlayır. Bu, bütün müsəlman aləminə ən böyük təhqirdir. Bizim əcdadlarımızın qəbirləri traktorla dağıdılır. Bunu edən faşistlərdir, vandallardır, vəhşilərdir”. Azərbaycan Prezidenti İlham Əliyev 27 sentyabrda xalqa müraciətində belə deyib.
Ermənilərin Azərbaycanın tarixi mədəni abidələrimizi dağıtması, məscidlərə hörmətsizlik etməsi danılmaz faktdır.
Ermənilər Zəngilanda məscidi donuz fermasına çeviriblər. Azərbaycanın Los-Ancelesdəki baş konsulu Nəsimi Ağayev bununla bağlı özünün “Twitter” hesabında yaydığı videoda qeyd olunur ki, ermənilər Zəngilandakı məsciddə donuz ferması yerləşdiriblər.
O, bu vandalizm aktının ermənilərin işğal etdikləri ərazilərdə Azərbaycanın mədəni irsinə necə məhəl qoymadığını sübut etdiyini bildirib: “Ermənilər tərəfindən donuz fermasına çevrilən Azərbaycan məscidi. Bu yaxınlarda işğaldan azad edilmiş Zəngilan rayonunda tapılan bu yer Ermənistanın işğal altındakı torpaqlarda Azərbaycan irsinə tamamilə məhəl qoymadığını göstərir. 30 il təhqir və məhv!”.
Qeyd edək ki, Azərbaycanda erməni kilsələri bu günə qədər qorunur. Hətta ermənilərin Azərbaycanın ikinci böyük şəhəri Gəncədə dinc sakinləri hədəfləyən raket hücumları zamanı bir kilsəyə zərər dəymişdi.
“…azərbaycanlılara qarşı öz nifrətlərini nümayiş etdirirlər”
Ermənilərin Zəngilanda məsciddə donuz saxlaması ilə bağlı fikir bildirən ilahiyyatçı İsmayıl Əhməd bildirdi ki, ermənilər növbəti dəfə əxlaqsızlıq nümayiş etdirərək, Zəngilan məscidinin içərisində donuz saxlamaqla azərbaycanlılara qarşı öz nifrətlərini nümayiş etdirirlər: “Ermənilər tərəfindən bir çox nadir tarixi mədəniyyət abidəmiz dağıdılır, İslam dininə aid olan nümunələrimiz məhv edilir. Şuşa, Ağdam məscidləri bu gün İslam adına yaraşmayan bir tərzdə vandalizmə məruz qalır. Məlumdur ki, Azərbaycanda dini-mənəvi dəyərlərə hər zaman diqqət və qayğı olub”.
Həmsöhbətimiz onu da əlavə etdi ki, erməni işğalçıları tərəfindən məscidlərimizin təhqir obyektinə çevrilməsi dünyanın aparıcı mərkəzlərinin kəskin reaksiyasına səbəb olmur. Ermənistanın Azərbaycan ərazilərini işğal etməsi nəticəsində mədəniyyət abidələrimiz, o cümlədən, məscidlərimiz dağıdılıb.
Günel CƏLİLOVA
