Elman Nəsirov: “İrəvan təkcə hərbi müstəvidə deyil, diplomatik cəbhədə də sarsıdıcı zərbələrə məruz qalır”
NATO Ermənistanın arzusunu gözündə qoydu. Belə ki, NATO-nun Baş katibi Yens Stoltenberq və Ermənistan Prezidenti Armen Sarkisyan Brüsseldəki NATO qərargahında görüşlərdən sonra mətbuat konfransı keçirib. Baş katib deyib ki, alyans tərəf deyil və dinc əhalinin hədəfə alınması dayandırılmalıdır: “Cənab prezidentə NATO-nun bu döyüşlərin bir parçası olmadığını xatırlatdım. Azərbaycan da, Ermənistan da 25 ildən artıq müddətdir ki, NATO-nun dəyərli ortaqlarıdır”.
NATO-nun atəşkəsin pozulması səbəbilə narahat olduğunu vurğulayan Yens Stoltenberq anlaşılmazlıqların bitməsi və sülh yolu ilə həllin tapılmasının vacibliyini qeyd edib: “Dinc əhalinin hədəf seçilməsi qəbuledilməzdir və dərhal dayandırılmalıdır. Hər kəs daimi bir siyasi həll üçün çalışmalıdır. Ermənistan və Azərbaycan müzakirələrə davam etməlidir”.
Göründüyü kimi, Ermənistanın NATO-nu məsələyə qatmaq cəhdi uğursuzluğa düçar oldu. Hansı ki, Prezident Armen Sarkisyanın Brüssel səfərində başlıca məqsədlərindən biri də bu idi. Ən azından, ümid edirdilər ki, NATO, heç olmasa, Azərbaycana hansısa siyasi təzyiq göstərəcək. Ancaq bəlli olduğu kimi, Ermənistanın gözləntiləri puç oldu. Bununla belə, NATO Baş katibi dinc əhalinin hədəf seçilməsinin qəbuledilməz olduğunu deyib. Bu çağırışın da əslində kimə ünvanlandığı bəllidir. Çünki döyüşlər başlayandan dinc əhalini Azərbaycan yox, məhz Ermənistan hədəfə alır.
- “Bu o deməkdir ki, NATO Ermənistanın dinc əhalini necə hədəfə almasından xəbərdardır və bundan çox narahatdır”
Məsələyə münasibət bildirən millət vəkili Elman Nəsirovun sözlərinə görə, Ermənistan təkcə hərbi müstəvidə deyil, diplomatik cəbhədə də sarsıdıcı zərbələrə məruz qalır: “Faktiki olaraq, Ermənistanın hərbi-siyasi rəhbərliyi vurnuxur. İlk əvvəl ciddi-cəhdlə çalışdılar ki, KTMT-ni müharibəyə qoşsunlar, amma onların bu istəyi alınmadı. Baş nazir Nikol Paşinyan gecə-gündüz dünya liderlərinin zəhləsini töksə də, bundan da bir şey alınmadı. Paşinyanın ən çox ümid bəslədiyi Fransa Prezidenti idi. Lakin Makronun Prezident İlham Əliyevlə son telefon danışığı müsbət tonda yekunlaşdı. Belə olan halda, Ermənistan rəhbərliyi son şans olaraq NATO rəhbərliyi ilə görüşə getməi oldu. Ermənistan Prezidenti Armen Sarkisyanın NATO Baş katibi ilə görüşündə yeganə məqsəd o idi ki, blokun bu proseslərə müdaxilə etməsinə nail olsun. Guya Ermənistan NATO ilə əməkdaşlığın daha da dərinləşməsində maraqlıdır. Bununla belə, görüş zamanı Sarkisyan Rusiya əleyhinə mövqe sərgiləyib. Həmçinin, Rusiyanı kəskin tənqid edib. Hesab edirəm ki, Rusiya ali rəhbərliyi Sarkisyanın bu hərəkətini cəzasız qoymayacaq. Bununla belə, faktiki olaraq, NATO rəhbərliyinin Ermənistanı məyus edən cavabı ortadadır. Cavab belədir ki, NATO hərbi əməliyyatların tərkib hissəsi olmaq istəmir. Bu əməliyyatlarda heç bir halda NATO-nun iştirakı mümkün deyil. Digər tərəfdən, alyans hər ik dövlətə tərəfdaş dövlət kimi baxır. Xüsusən də NATO rəhbərliyinin dinc insanların hədəfə alınmasının yolverilməzliyi ilə bağlı birbaşa mövqeyi, əslində, Ermənistana yönəlik ciddi siqnal idi. Bu o deməkdir ki, NATO Ermənistan dövlətinin dinc əhalini necə hədəfə almasından xəbərdardır və bundan çox narahatdır. Əslində, Yens Stoltenberq sətiraltı olaraq bunu dedi. Beləliklə, Ermənistan Prezidenti “əli ətəyindən uzun” geri qayıdır. Görünən odur ki, Ermənistanın diplomatik müstəvidə bütün cəhdləri fiaskoya uğrayır. Ermənistanın hərbi-siyasi rəhbərliyinin azca da olsa ağlı başında qalıbsa, yaxşı düşünsünlər. Anlamalıdırlar ki, müharibənin davam etdirilməsi Ermənistanı fəlakətə aparır”.
Politoloq onu da qeyd etdi ki, Ermənistan rəhbərliyi apardığı indiki siyasətlə öz əsgərlərini mənasız ölümə sürükləyir.
Vidadi ORDAHALLI
