01/12/2020 03:27
728 x 90

Erməni əsilli tanınmış Rusiya kinorejissoru Ermənistanı bərk vurdu - Azərbaycana qarşı nə hərbi, nə də siyasi gücünüz var...

Hüseyn Mehdiyev: “Şahnazarovu öz mövqeyindən geri çəkilməyə məcbur edən Azərbaycan Ordusunun gücü və qüdrətidir”

img

Ermənistanı daim müdafiə edən, erməni separatizmini, şovinizmini açıq şəkildə dəstəkləməkdən çəkinməyən, hətta onun “ilhamverici qüvvəsi”nə çevrilən erməni əsilli tanınmış rusiyalı kinorejissor, “Mosfilm”in direktoru Karen Şahnazarov (Şahnazaryan) mövqeyindən 180 dərəcə dönüb. Bu gün Şahnazarov Ermənistanın siyasi və hərbi rəhbərliyinin bir nömrəli tənqidçisinə çevrilib.

 

Qeyd edək ki, sentyabrın 28-də Şahnazorov köhnə şakərinə uyğun çıxış edib. Lakin son günlər Azərbaycan Ordusunun terrorçu Ermənistanın işğalçı hərbi birləşmələrini darmadağın etməsi, cəbhədə üstünlük qazanması qoca ermənini fikrini dəyişməyə və Paşinyan hökumətinə qarşı sərt mesajlar verməyə vadar edib. O, “Vladimir Solovyovla axşam” verilişində Ermənistan rəhbərliyinə  “əgər belə gücün yoxdursa, kompromis axtar”, “Qərb Ermənistanı müdafiə etməyəcək!” kimi mesajlar verib. Hətta Şahnazarov qeyd edib ki, bu gün Azərbayan Ordusu ilə döyüşməyə Paşinyan rejiminin nə hərbi, nə də siyasi gücü var.

 “Artıq qəbul etmək lazımdır. Qarabağ uğrunda mübarizədə erməni rəhbərliyi Ermənistanı itirməmək barədə də düşünməlidir. Bu, kifayət qədər çətin vəziyyətdir”.

K.Şahnazarov Ermənistan rəhbərliyini reallığa uyğun addımlar atmamaqda, illüziyalara qapılmaqda və vəziyyəti düzgün qiymətləndirməməkdə günahlandırıb. Həmçinin, kinorejissor Ermənistanın Azərbaycanın ərazi bütövlüyü məsələsini diqqətə almalı olduğunu vurğulayıb. “Təəssüf ki, bütün bu baş verənlər Ermənistan rəhbərliyinin düşünülməmiş atılan addımlarının nəticəsidir. Vəziyyət elədir ki, istər-istəməz, Azərbaycanın ərazi bütövlüyü məsələsini qəbul etmək və hər hansı bir status üçün imkan axtarmaq lazımdır. Hansı ki, erməni əhalinin bu bölgədə təhlükəsizliyini, yaşayışını və mədəni inkişafını təmin etsin. Başqa çıxış yolu yoxdur...” - deyə Şahnazarov bildirib.

  • “İnanmıram ki, Şahnazarov hazırda sərgilədiyi mövqeyində səmimidir”

Professional Kinorejissorlar Gildiyasının rəhbəri, tanınmış kinorejissor, ssenarist Hüseyn Mehdiyev “Bakı-Xəbər”ə bildirdi ki, K.Şahnazarovun fikrinin Ermənistana qarşı dəyişməsinin, onun baş verənlərə görə Paşinyan hakimiyyətini suçlamasının əsas səbəbi Azərbaycan Ordusunun gücüdür. “Şahnazarovu öz mövqeyindən geri çəkilməyə məcbur edən Azərbaycan Ordusunun gücü və qüdrətidir. O, ordumuzun gücü qarşısında fikrini dəyişib və Ermənistan hökumətinə bu cür sərt mesajlar verib. Bilirsiniz ki, güclü tərəfin daha əsaslı arqumentləri olur və bu arqumentlər qarşısında da əlavə sözə ehtiyac olmur. Burada təəccüblü bir şey yoxdur”.

K.Şahnazarovun fikirlərində hər hansı bir səmimi notların olmasına gəlincə, H.Mehdiyev qeyd etdi ki, burada heç bir səmimiyyət axtarmaq olmaz, o da digər ermənilər kimi, mövqeyini vəziyyətə uyğun olaraq göstərib. “Mən inanmıram ki, Şahnazarov hazırda sərgilədiyi mövqeyində səmimidir. Çünki siyasətdə səmimilik, istilik axtarmaq düzgün deyil. Şahnazarov Azərbaycan Ordusunun gücünə, Azərbaycan dövlətinin yürütdüyü siyasətə istinad edərək belə fikirlər söyləyir. Bütövlükdə, o, bir ermənidir və onun bu mövqeyinin alt qatında da erməni xalqının dərdini çəkməsi dayanır. O yaxşı bilir ki, Ermənistan həm hərbi, həm də siyasi, milli birlik baxımından Azərbaycandan qat-qat zəifdir. Əslində, o, Ermənistan hökumətini tənqid etməklə, baş verənlərə görə Paşinyan hökumətini qınamaqla erməni xalqının pis günə, aciz duruma düşməsinin dərdini çəkir” - deyə H.Mehdiyev qeyd etdi.

İradə SARIYEVA

Son xəbərlər