Paşinyanın qızı onunla xalq arasında uçurumu bir az da dərinləşdirdi...
Ermənistanın Baş naziri Nikol Paşinyan rəhbərlik etdiyi ölkədə, el dili ilə desək, itdən urvatsız olub. Bu gün Ermənistan ictimaiyyəti Paşinyanı yarıtmazlığına, müharibənin başlanmasına səbəbkar olduğuna görə ağ yuyub qara sərir.
Sorosun qucağında hakimiyyətə gələn Paşinyan gəldiyi gündən erməni cəmiyyətində xoş qarşılanmadı. Öz qeyri-ciddiliyi, dövlət başçısına yaraşmayan davranışları, siyasi savadsızlığı, naşılığı ilə erməni xalqının gözündə bir qəpik dəyərində qiyməti olmayan Paşinyan öz ölkəsində ciddi təhdidlərlə üzləşir. Bu gün Paşinyan hökuməti ilə xalq arasında böyük uçurum yaranıb və qızı Maryam Paşinyanın sosial şəbəkə hesabında Dağlıq Qarabağdakı döyüşlərlə bağlı etdiyi pessimist paylaşım isə onunla xalq arasında olan uçurumu daha da dərinləşdirib.
Paşinyanın qızının “Facebook”dakı profilində pessimist notda yazdığı status erməni istifadəçilərdə ciddi narazılıq yaradıb. Ermənistan mətbuatı artıq Baş nazirin ailəsinin belə bir bədbin ab-havada olmasını müzakirə mövzusuna çevirib.
Hətta xəbər saytları yazırlar ki, indi insanlarda daha çox vətənpərvərlik ruhunu yüksəldən fikirlər səsləndirilməlidir. Bu mənada ölkənin birinci ailəsinin dilindən bədbin ruhlu ifadələrin eşidilməsi xoş qarşılanmayıb.
Nikolun qızı statusunda yazıb: “Xəyallarımız və hədəflərimiz puç oldu. Xəyallarımız isə əsgərlərimiz və vətənimizlə bağlı idi”.
- “...erməni cəmiyyətində dərin ruhi-psixoloji, mənəvi böhranın yaşandığını bir daha təsdiqləyir”
“Vəfa” Sosial-İctimai Birliyinin rəhbəri Fatimə Hacıbəyli bizimlə söhbətində bildirdi ki, M.Paşinyanın pessimist notlarda yazdığı status Paşinyan ailəsinin iç üzünün tamamilə açılmasına səbəb olub. F.Hacıbəyli qeyd etdi ki, M.Paşinyanın bu statusu Paşinyan hökumətinin mətbəxinin hansı vəziyyətdə olduğunu açıb camaata göstərib, bununla da erməni xalqı tamamilə naşı Baş nazirdən üz döndərib. “Paşinyanın qızının yazdığı statusda işlətdiyi fikirdə bizim üçün təəccüblü heç nə yoxdur. Biz onsuz da bilirik ki, Paşinyan psixoloji cəhətdən ciddi əziyyət çəkən anormal bir varlıqdır. Hakimiyyətə gəldiyi gündən yalnız naşı və sərsəm bəyanatlar verməklə və erməni xalqını aldatmaqla məşğul olan Paşinyan artıq xalqı aldada bilmir. Paşinyanın qızı öz statusunda “Xəyallarımız və hədəflərimiz puç oldu. Xəyallarımız isə əsgərlərimiz və vətənimizlə bağlı idi” fikrini qeyd etməklə, əslində, ermənilərə Paşinyanın fikrini çatdırıb. Açıq görünür ki, bu barədə Paşinaynın evində tez-tez söhbətlər gedir, o, ailəsinin içində öz gücsüzlüyünü, biabırçı vəziyyətə düşdüyünü, indən sonra heç nə etmək iqtidarında olmadığını etiraf edir. Bilirsiniz ki, Maryamın statusu Ermənistanı bir-birinə vurub, hətta xaricdəki erməni lobbisi də bu statusa görə onu və Paşinyanı sərt şəkildə qınayıb. Müzəffər Azərbaycan Ordusu qarşısında aciz qalan terrorçu erməni silahlı birləşmələri artıq Paşinyanın sözünü eşitmək istəmirlər. Xalq isə Paşinyana qarşı öz narazılığını hər addımda bildirir. Hesab edirəm ki, Paşinyanın qızının yazdığı bu status həm Paşinyan ailəsində, həm hökumətdə, həm orduda, həm də erməni cəmiyyətində dərin ruhi-psixoloji, mənəvi böhranın yaşandığını bir daha təsdiqləyir.
Paşinyanın qızının yazdığı ümidsizlik, pessimizm, ruh düşkünlüyü aşılayan bu status Paşinyanla xalq arasındakı üzülməkdə olan bağların az qala hamısının qopmasına səbəb olub. Bu gün Paşinyanın taleyi tükdən asılıdır. Görəcəksiniz, yaxın zamanlarda xalq bunun heyfini Paşinyandan çıxacaq, onu məhkəmə kürsüsünə çıxaracaq” - deyə F.Hacıbəyli vurğuladı.
İradə SARIYEVA
