Erməni mediası yazır ki, Beynəlxalq Qırmızı Xaç Komitəsi Ermənistan tərəfinə 1500 hərbçinin meyitini təhvil verib. Sözügedən məsələ ilə bağlı qeyd edilir ki, meyit kisələri məhkəmə-tibbi ekspertizası bürosuna təqdim edilib.
Bu fakt bir daha təsdiqləyir ki, Ermənistanın döyüşlərdə verdiyi itkilər bu ölkənin rəsmi açıqladığı rəqəmlərdən qat-qat çoxdur. Məlumata görə, Ermənistanın döyüşlərdə verdiyi itkilər bu ölkənin rəsmi açıqladığı rəqəmlərdən ən azı 2 dəfə çoxdur. Belə ki, düşmən ölkənin rəsmiləri indiyədək ölən erməni əsgərlərinin sayının 750 nəfərə yaxın olduğunu deyiblər. Əslində isə qarşı tərəfin itkiləri daha çoxdur. Ermənistan tərəfi əsgər itkilərinin həqiqi sayını nə qədər gizlətməyə çalışsa da, ortaya çıxan faktlar itkilərin daha çox olduğunu göstərir.
Məlumat üçün qeyd edək ki, Azərbaycan və Ermənistan tərəfi meyitlərin, əsirlərin dəyişdirilməsi üçün humanitar atəşkəslə bağlı razılığa gəlib.
Maraqlıdır, bəs hərbi ekspertlər ermənilərin itki sayı barədə nə deyirlər?
“Silahlı Qüvvələrimiz sözügedən alayların nəinki silah-texnika parkını, həm də canlı qüvvəsini məhv edib”
Məsələyə münasibət bildirən hərbi ekspert Ramil Məmmədlinin sözlərinə görə, Ermənistanın itkiləri minlərlədir: “Ermənistan ordusunun həmin istiqamətlərdə 5 alayı mövcud idi. Yəni Ağdərə, Tərtər, Ağdam, Xocavənd, Füzuli istiqamətində Ermənistanın 5 alayı xidmət aparıb. Bu gün sözügedən alaylar praktiki olaraq yoxdur. Çünki Silahlı Qüvvələrimiz sözügedən alayların nəinki silah-texnika parkını, həm də canlı qüvvəsini məhv edib. Bundan başqa, Ermənistan hərbi əməliyyatlar başlayandan 10 gün sonra daha 3 alayın Qarabağa gətirilməsini təmin edib. Bununla müdafiəni təmin etmək istəyiblər, amma hər dəfə niyyətləri alınmayıb. Hesab edirəm ki, Ermənistan ordusunun həqiqi itkilərinin sayı 5 min nəfərdən çoxdur. Çünki təkcə məhv edilən tankların sayı 280-dən çoxdur. O cümlədən, digər hərbi texnikalar da ard-arda məhv edilib. Çoxsaylı canlı qüvvə daşıyan avtomobil məhv edilib. Bütün bunları üst-üstə gələndə məhv edilən erməni əsgərlərinin sayı 5 min nəfərdən aşağı deyil. Ancaq Ermənistan məqsədli şəkildə əsgəri itkilərinin həqiqi sayını gizlədir. Çünki itkilərin həqiqi sayını desələr, bu, ölkədə ciddi çaxnaşmalara gətirib çıxaracaq. Nəticədə Paşinyan rejimi devriləcək. Bu səbəbdən bütün vasitələrlə itkiləri gizlədirlər”.
Hərbi ekspert hesab edir ki, Ermənistan tərəfi uzun müddət ölkə ictimaiyyətindən itkilərin həqiqi sayını gizlədə bilməyəcək.
Vidadi ORDAHALLI
