02/12/2020 17:31
728 x 90

Ərazilərimizin azad edilməsi üçün əlverişli geosiyasi şərait indi yetişdi - Prezident nəyi nəzərdə tutdu...

Qabil Hüseynli: “Azərbaycan terrordan təmizlənmə əməliyyatlarına bu amili də nəzərə alaraq başlayıb və uyğun dönəm seçib”

img

Oktyabrın 20-də Prezident İlham Əliyev xalqa növbəti müraciətində bildirib ki, öz doğma dədə-baba torpaqlarını görməyən, işğaldan sonra dünyaya göz açan hər bir azərbaycanlı bir arzu ilə yaşayıb ki, doğma dədə-baba torpaqlarına qayıtsın:

“Biz bunu Cocuq Mərcanlının timsalında gördük. İşğaldan sonra doğulmuş gənclər, onların hər biri Cocuq Mərcanlıya qayıtmaq arzusu ilə yaşayıb və qayıdıbdır. Əminəm ki, bu gün işğalçılardan azad edilmiş bütün torpaqlara Azərbaycan vətəndaşları qayıdacaqlar. O torpaqlarda yaşayacaqlar, sülh, əminamanlıq şəraitində yenə də qurub-yaradacaqlar. Necə ki, vaxtilə bizim işğal edilmiş bütün torpaqlarımızda Azərbaycan xalqının mədəni irsi yaradılıbdır. Amma mənfur düşmən bu irsi məhv etmək istəyirdi, bizim məscidlərimizi dağıdırdı. Biz Çocuq Mərcanlı kəndində Şuşa məscidinin bənzərini inşa edəndə və onun açılışında demişdim ki, məscidlərin binalarını onlar dağıda bilərlər, amma bu məscidləri biz öz qəlbimizdə yaşadırıq və gün gələcək bizim dağıdılmış bütün məscidlərimiz bərpa ediləcəkdir, bütün şəhərlərimiz, kəndlərimiz bərpa ediləcəkdir. Biz Böyük Qayıdış astanasındayıq və Azərbaycan dövləti əlindən gələni edəcək ki, Azərbaycan vətəndaşları işğal olunmuş və azad edilmiş torpaqlara qayıdaraq rahat yaşasınlar, əminamanlıq şəraitində yaşasınlar və bu torpaqlarda həyat canlanacaqdır”.

Ölkə başçısı qeyd edib ki, bizim məcburi köçkünlərimiz bütün bu illər ərzində bir arzu ilə yaşayıblar, baxmayaraq ki, onların bir çoxu üçün gözəl şərait yaradılıb: “Bildiyiniz kimi, təkcə bu il biz məcburi köçkünlər üçün 7 min mənzilin istifadəyə verilməsini nəzərdə tuturuq. 300 mindən çox məcburi köçkünə evlər, mənzillər verilibdir. Onlar bu qayğıya görə bizə minnətdarlıq edirlər və mənim onlarla çoxsaylı görüşlərimdə bunu ifadə edirdilər. Ancaq eyni zamanda mən bilirdim və onlar mənə deyirdilər ki, bizi qaytarın, öz torpağımıza qaytarın. Başa düşürdülər ki, bu çətin məsələdir, başa düşürdülər ki, bunun üçün müəyyən geosiyasi şərait yetişməlidir. Mənə inanırdılar və mən onlara deyirdim ki, biz o torpaqlara qayıdacağıq, mən deyirdim ki, bilirəm, nəyi nə vaxt və necə etmək lazımdır. Xalq tərəfindən mənə göstərilən etimad imkan verdi ki, biz bu məsələni həll edək. Mən bir daha bəyan edirəm ki, verilmiş bütün vədləri mən yerinə yetirirəm, verilmiş bütün vədlərə sadiqəm. Prezident kimi mənim fəaliyyətim üçün əsas məsələ, əsas vəzifəm Azərbaycan torpaqlarının qaytarılmasıdır, ərazi bütövlüyünün bərpa edilməsidir və bu gün biz bunu döyüş meydanında edirik”.

Göründüyü kimi, ölkə başçısı torpaqlarımızın işğaldan azad edilməsi üçün lazımi geosiyasi şəraitin yetişməsinin vacibliyini bir da qeyd edib. Artıq əldə olunan uğurlardan, atılan addımlardan demək olar ki, həmin geosiyasi şərait yetişib. Bunu hansı amillər şərtləndirir və bizə lazım olan geosiyasi vəziyyət özündə nələri ehtiva edir?

Politoloq Qabil Hüseynli “Bakı-Xəbər”ə açıqlamasında bildirdi ki, bu məsələdə xüsusi olaraq Prezidentin ardıcıl siyasətini qeyd etməliyik: “Mahir siyasətçi kimi o, lazımi geosiyasi situasiyanı yetişdirmiş oldu. Bu məsələdə Rusiya kimi regiona təsir gücü olan ölkənin nisbətən neytral qalmasını təmin etmək çox önəmlidir. Bu da uzun sürən danışıqlardan sonra mümkün olub. Əsas şərtlərdən biri budur. Digər mühüm tərəfi isə Türkiyə ilə olan münasibətlər təşkil edir.  Türkiyə Azərbaycanın haqq işinə həmişə dəstək verib. Bu dəfə isə daha sərt və açıq formada bunu ifadə etdi. Son illər Türkiyə öz strateji maraqlarını Liviyada, Suriyada, İraqda təmin edib. Azərbaycan da onun üçün Türk dünyasına çıxış imkanı yaradan qardaş ölkədir. Böyük Türk  inteqrasiyasını təmin etmək üçün bir yol vardı - Azərbaycan torpaqları işğaldan azad edilsin.  Hazırda Azərbaycan ordusunda Türkiyə ilə birgə təlimlərdə əldə olunan üstünlüklər nəzərə çarpır. Azərbaycan ordusunun həyata keçirdiyi hərbi əməliyyatların taktiki tərəfinin qurulmasında Türkiyənin zabitlərimizə verdiyi dərslərin izləri görünür. Digər mühüm məqam ABŞ-dakı seçkilərlə bağlıdır. Azərbaycan  terrordan təmizlənmə əməliyyatlarına bu amili də nəzərə alaraq başlayıb və uyğun dönəm seçib. Bundan əlavə, dünyadakı qlobal böhrana səbəb olan koronavirus pandemiyasının yaratdığı reallıqlar da burada önəmli faktor sayılır. Çünki həmin böhrandan Ermənistan iqtisadiyyatı ciddi ziyan çəkib. Bütün bu amillərin toplusu bizim üçün uyğun geostrateji şəraiti yaratmış oldu. Bütün bunların fövqündə isə mən İlham Əliyevin prinsipiallığını, təzyiqlərə sinə gərməsini və Azərbaycan reallıqlarını dünyaya lazımı şəkildə çatdırmaq bacarığını qeyd edərdim”.

Bu uyğun şəraiti biz lazımınca dəyərləndiririk və əminik ki, Qarabağın tam azad olunmasına qədər bu istiqamətəki səylərimizi davam etdirəcəyik.

Məhəmmədəli QƏRİBLİ

Son xəbərlər