02/12/2020 16:10
728 x 90

Zəngilanın işğaldan azad edilməsinin strateji üstünlükləri - separatçı rejimin İranla əlaqə cəhdləri məhdudlaşır, sonra isə...

Akif Nağı: “Bununla həm separatçıların İranla əlaqə imkanları məhdudlaşacaq, həm də biz Ermənistan-İran sərhədinə nəzarəti bərpa edəcəyik”

img

Məlum olduğu kimi, Azərbaycanın bir sıra əraziləri işğaldan azad edilib. Bu barədə Prezident İlham Əliyev xalqa müraciətində bildirib. İşğaldan azad edildiyi tam təsdiqlənən yaşayış məntəqələrinin siyahısını təqdim edirik.

Füzuli rayonu: Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı kəndləri.

Cəbrayıl rayonu: Sarafşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli kəndləri.

Xocavənd rayonu: Ağcakənd, Mülküdərə, Daşbaşı, Günəşli (Günəşli kəndinin keçmiş adı Noraşen idi), Vəng kəndləri. Vəng kəndinə də Prezident yeni Azərbaycan adı verdiyini bildirib. Bundan sonra Vəng kəndi Çinarlı kəndi adlandırılacaq.

Zəngilan rayonu: Havalı, Zərnəli, Məmmədbəyli, Həkəri, Şərifan, Muğanlı kəndləri və Zəngilan şəhəri!

Zəngilanın işğaldan azad edilməsi ilə 765 km-lik İran-Azərbaycan sərhədi, demək olar ki, tam bərpa edildi. Zəngilanın işğaldan azad edilməsi həm İranla ticarət dövriyyəsinə, həm də Naxçıvan Muxtar Respublikası ilə daha sıx əlaqəyə imkan verəcək. Bundan əlavə, bölgənin təbii zənginlikləri də iqtisadiyyatımıza müsbət təsir edəcək. Eyni  zamanda Zəngilanın azad edilməsi Dağlıq Qarabağdakı qondarma rejimlə İranın birbaşa əlaqəsinin kəsilməsi deməkdir. Kəlbəcər–Laçın iqtisadi rayonuna daxil olan Zəngilan rayonu iqtisadi və coğrafi nöqteyi-nəzərdən də  əlverişli potensiala malikdir. Hər iki tərəfdən müxtəlif ölkələrlə həmsərhəd olan rayon qərbdə dağlıq, şərqdə düzənlik əraziyə malikdir. Bu özəlliklər Zəngilan rayonunun şaxəli resurslara malik olması ilə bağlı ilkin təəssüratları formalaşdırır. Kəlbəcər-Laçın iqtisadi rayonu mineral yataqların sayı üzrə coğrafi şaxələndirməyə malikdir. Rəsmi hesablamalara görə, işğaldan azad olunan və proses davam edən iqtisadi rayonlarda 155 müxtəlif növ mineral yataqları mövcuddur ki, bunlar qızıl, gümüş, mis, dəmir, sink, qranit, mərmər, qiymətli daşlar, odadavamlı gil və digər faydalı qazıntılardır. Separatçı rejimin əlindən çıxan bu sərvətlər bizə daha hansı üstünlükləri qazandırır?

Qarabağ Azadlıq Təşkilatının sədri Akif Nağı  “Bakı-Xəbər”ə açıqlamasında bildirdi ki,  Azərbaycanın işğaldan azad edilən bütün ərazilərinin bizim üçün xüsusi əhəmiyyəti var: “Ancaq onların sırasında elələri var ki,  çox böyük strateji əhəmiyyətə malikdir. Bilirsiniz ki, erməni işğalı nəticəsində Azərbaycan-İran sərhədinin bir hissəsinə nəzarət Ermənistanın əlinə keçmişdi.  Separatçı qurum və Ermənistanın siyasi rəhbərliyi bundan istifadə edərək,  həmin marşrutla narkotrafik həyata keçirirdi. Hesab edirəm ki, bu nəzarəti əlimizə götürməyimiz həm Azərbaycanın İranla sərhədini tam bərpa edəcək, həm də  regionda dövr edən qara pul və narkotik dövriyyəsi birdəfəlik yekunlaşacaq.  Zəngilan həm də təbii ehtiyatları ilə zəngin olan rayondur. Bu da ölkəmizin iqtisadiyyatına ciddi töhfə deməkdir. Bununla həm separatçıların İranla əlaqə imkanları məhdudlaşacaq, həm də biz Ermənistan-İran sərhədinə də nəzarəti bərpa edəcəyik. Çünki Zəngilan həmin əraziyə çox yaxındır. Bu da  çox vacibdir. Yəni həmin ərazidən Ermənistana nəsə daşınarsa, Azərbaycanın hərbi və siyasi rəhbərliyi məlumatlı olacaq. Bundan əlavə, bu amil bizə daha bir tarixi ədaləti bərpa etməyə imkan verər. Bilirsiniz ki, tarixi Azərbaycan ərazisi olan Zəngəzur mahalını Ermənistana verməklə, Naxçıvanın Azərbaycanın digər əraziləri ilə quru yolla olan əlaqəsini tam kəsiblər. Zəngilanın işğaldan azad olunması həm də bizə imkan verir ki, həmin ədalətsizliyi aradan qaldıraq. Həmin ərazilər mütləq mənada Azərbaycana qaytarılmalıdır. Buna bizim tam haqqımız var və bu məsələdə beynəlxalq hüquq da bizim tərəfdədir”.

Doğrudan da, Ermənistan əlində heç bir əsas olmadan Laçından koridor tələb edirsə, biz niyə tarixi ədaləti bərpa edib, öz ərazilərimizi qaytarmayaq...

Məhəmmədəli QƏRİBLİ

Son xəbərlər