02/12/2020 17:17
728 x 90

“Böyük qayıdış” hadisəsinin tarixi, sosial, siyasi, iqtisadi və strateji detalları - Prezident nə demək istədi...

Rasim Quliyev: “Bizim böyük qayıdışımız Azərbaycan Ordusunun bu böyük zəfər yürüşü ilə başlayıb”

img

Bildiyimiz kimi, oktyabrın 20-də Prezident İlham Əliyev xalqa növbəti müraciətini edib. Ölkə başçısının xalqımıza böyük inam, əminlik ruhunda etdiyi müraciət, səsləndirdiyi bəyanatlar ictimaiyyət tərəfindən sonsuz sevinc, qürur hissi, ruh yüksəkliyi ilə qarşılanıb.

Prezident bildirib: “Öz doğma dədə-baba torpaqlarını görməyən, işğaldan sonra dünyaya göz açan hər bir azərbaycanlı bir arzu ilə yaşayıb ki, doğma dədə-baba torpaqlarına qayıtsın. Biz bunu Cocuq Mərcanlının timsalında gördük. İşğaldan sonra doğulmuş gənclər, onların hər biri Cocuq Mərcanlıya qayıtmaq arzusu ilə yaşayıb və qayıdıbdır. Əminəm ki, bu gün işğalçılardan azad edilmiş bütün torpaqlara Azərbaycan vətəndaşları qayıdacaqlar. O torpaqlarda yaşayacaqlar, sülh, əmin-amanlıq şəraitində yenə də qurub-yaradacaqlar. Necə ki, vaxtilə bizim işğal edilmiş bütün torpaqlarımızda Azərbaycan xalqının mədəni irsi yaradılıbdır. Amma mənfur düşmən bu irsi məhv etmək istəyirdi, bizim məscidlərimizi dağıdırdı. Biz Cocuq Mərcanlı kəndində Şuşa məscidinin bənzərini inşa edəndə və onun açılışında demişdim ki, məscidlərin binalarını onlar dağıda bilərlər, amma bu məscidləri biz öz qəlbimizdə yaşadırıq və gün gələcək, bizim dağıdılmış bütün məscidlərimiz bərpa ediləcəkdir, bütün şəhərlərimiz, kəndlərimiz bərpa ediləcəkdir. Biz Böyük Qayıdış astanasındayıq və Azərbaycan dövləti əlindən gələni edəcək ki, Azərbaycan vətəndaşları işğal olunmuş və azad edilmiş torpaqlara qayıdaraq rahat yaşasınlar, əmin-amanlıq şəraitində yaşasınlar və bu torpaqlarda həyat canlanacaqdır”.

Ölkə başçısının “Biz Böyük Qayıdış astanasındayıq” fikrini şərh edən ekspertlər qeyd edirlər ki, Prezident bununla öz torpaqlarından zorla didərgin salınan vətəndaşlarımızın tezliklə öz yurd-yuvalarına, doğma ocaqlarına qayıdacağının tam real olduğunu və bu günün gerçəkləşməsinə çox az vaxt qaldığını vurğulayıb.

“...bu qayıdışın böyük mənası var”

“Resurs” analitik informasiya mərkəzinin rəhbəri, politoloq Rasim Quliyev “Bakı-Xəbər”ə şərhində bildirdi ki, ölkə başçısının “Biz Böyük Qayıdış astanasındayıq” fikrinin həm mənəvi, həm də siyasi-tarixi əhəmiyyəti böyükdür. “Cənab Prezidentin həm xalqa müraciətlərinin, həm də KİV-ə verdiyi müsahibələrinin hamısı Azərbaycan və beynəlxalq ictimaiyyət tərəfindən çox ciddi şəkildə izlənir. Sonra isə Prezidentin fikirləri, hər bir sözü ekspertlər tərəfindən təhlil edilir. Beynəlxalq ekspertlər də yaxşı bilirlər ki, Azərbaycan Prezidentinin dediyi hər bir sözün mənası və vaxtı var. Prezidentin özü deyib ki, bizim sözümüz də imzamız qədər qiymətlidir və keçərlidir. Bəli, cənab Prezidentin hər bir sözü onun rəsmi imzası qədər keçərlidir. Bu baxımdan, Prezidentin “Biz Böyük Qayıdış astanasındayıq” deməsi təkcə torpaqlarından didərgin salınan vətəndaşlarımızın işğaldan azad edilən torpaqlara qayıdışı demək deyil. Bunun birinci mənası budur ki, biz öz doğma torpaqlarımıza hərbi qayıdış etdik, torpaqlarımız işğaldan azad edilir. İkincisi, bu daha bir vacib faktı ortaya qoyur, bu da bizim milli qayıdışımızla bağlıdır ki, milli şüurumuzda özümüzə qayıdış prosesi baş verib. Bu gün nəinki Azərbaycan vətəndaşları, eləcə də dünya azərbaycanlıları, bütövlükdə, Azərbaycan xalqı özünə qayıdıb və milli şüurumuz, milli ruhumuz milli birlik, həmrəylik ideyası olan “Qarabağ Azərbaycandır!, “Qarabağ bizimdir!” ifadəsinin ətrafında cəmləşib. Bu gün hər kəs torpaqlarımızın tam olaraq düşmən işğalından azad edilməsi naminə Prezidentin ətrafında birləşib. Müzəffər Azərbaycan Ordusunun şücaəti nəticəsində torpaqlarımız işğaldan azad olunur və biz o torpaqların hamısına qayıdacağıq. Bizim birinci qayıdışımız xalqımızın özünə qayıdışı və birliyidir, ikinci qayıdışımız şanlı ordumuzun torpaqlarımızı işğaldan azad etməsi və bu yola davam etməsidir, üçüncü qayıdışımız isə o torpaqlara, o yurdlara iqtisadi qayıdışımızdır. Biz o torpaqları işğaldan azad ediriksə, mütləq oranı inkişaf etdirməyimiz, orada həyatı canlandırmağımız, torpağı əkib becərməyimiz, insanların yaşayışını təmin etməyimiz lazımdır. Bu məsələni də cənab Prezident dəfələrlə qeyd edib. İnsanlarımız işğaldan azad edilən torpaqlarımıza qayıdacaq, orada həyat canlanacaq, iqtisadiyyat, sosial istiqamətlər inkişaf edəcək. Yəni bizim böyük qayıdışımız həm tarixi, həm siyasi, həm də sosial-iqtisadi mahiyyət daşıyır, bu qayıdışın böyük mənası var.

Şükür Allaha, bu gün Azərbaycan tam müstəqil bir dövlətdir, beynəlxalq arenada müstəqil siyasət yürüdür, hərbi gücü var, güclü iqtisadiyyata malikdir. Amma hələ ərazimizin bütövlüyü tam şəkildə bərpa olunmayıb. Şanlı ordumuz digər işğalda olan torpaqlarımızı tam azad etdikdən sonra ərazi bütövlüyümüz tam olacaq. Cənab Prezident də öz müraciətlərində qeyd edib ki, əvvəlkindən fərqli bir Azərbaycan görəcəksiniz”.

Yaxın zamanlarda işğaldan azad edilən torpaqlara, oradakı təbii sərvətlərə özü sahib olan, orada da iqtisadiyyatı inkişaf etdirən qüdrətli bir Azərbaycan görəcəyimizi deyən R.Quliyev hesab edir ki, qalib Azərbaycanın vətəndaşları da qürurlu vətəndaşlar olacaqlar. R.Quliyev qeyd edir ki, düşmənlərimiz də, xaricdəki ermənipərəst qüvvələr də artıq bizim nəyə qadir olduğumuzu görür. “Bu gün biz öz qürurumuzu özümüzə qaytarırıq. Qayıdış budur - milli qürurun, milli ruhun, torpaqlarımızın qayıdışı, Vətənimizin bütövlüyünün təmin edilməsi. Bəli, bizim böyük qayıdışımız Azərbaycan Ordusunun bu böyük zəfər yürüşü ilə başlayıb” - deyə R.Quliyev vurğuladı.

İradə SARIYEVA

Son xəbərlər