25/11/2020 05:39
728 x 90

Əvvəlcə bütün mötəbər beynəlxalq qurumlardan ərazi bütövlüyünə dəstək, ardınca uğurlu əməliyyatlar – Prezident ərazilərimizin azad edilmə düsturunu açdı…

Fikrət Sadıqov: “Bütün bunların sayəsində Azərbaycan beynəlxalq qərarları özü icra etməyə başladı”

img

“BMT Təhlükəsizlik Şurasının qətnamələri işləmirdi. Biz böyük səylər göstərdik. BMT Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı, digər təşkilatlar qətnamə qəbul etdi. Avropa İttifaqı ilə bizim aramızda paraflanmış sənəddə də sərhədlərimizin toxunulmazlığına, suverenliyimizə və ölkəmizin ərazi bütövlüyünə dəstək göstərilir. Yəni budur bu münaqişənin həlli üçün əsas”.

Prezident İlham Əliyev bunu xalqa növbəti müraciətində bildirib. Dövlət başçısı qeyd edib ki, Ermənistan rəhbərliyi gecə-gündüz bütün beynəlxalq təşkilatlara zəng edir, məktublar göndərir: “Bəyanatlar verir ki, niyə səsinizi çıxarmırsınız? Onlar necə səsini çıxara bilərlər? Onlar artıq bu qətnamələri, bu qərarları qəbul ediblər və Azərbaycan döyüş əməliyyatını beynəlxalq birlik tərəfindən tanınan öz ərazisində keçirir. Biz Ermənistan ərazisində hər hansı bir əməliyyat keçirmirik. Bizim belə planlarımız yoxdur. Baxmayaraq ki, Gəncəni onlar Ermənistan ərazisindən bombalamışdılar, iki dəfə. Biz cavab vermədik onların yolu ilə. Biz döyüş meydanında cavab verdik və mən bildirmişdim ki, biz onların intiqamını, şəhidlərimizin qisasını döyüş meydanında alacağıq və alırıq. Bax, beynəlxalq təşkilatlarda bizim fəaliyyətimizin əsas məqsədi o idi ki, bu hüquqi baza təkmil olsun, genişlənsin və buna biz nail ola bildik”.

Görünən odur ki, uzun illər ərzində aparılan uğurlu diplomatik siyasət ərazilərimizin güc yolu ilə azad edilməsinə zəmin yaratdı. Belə olmasaydı, o zaman beynəlxalq təşkilatlar aparılan hərbi əməliyyatlara sərt reaksiya verərdilər. O üzdən, ölkə başçısı çıxışında çox önəmli bir məqamı qabartdı.

  • “Ermənilər, faktiki olaraq, başa düşürlər ki, artıq onlar məğlubiyyətlə qarşılaşmış bir tərəfdirlər”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, bütün bunların sayəsində Azərbaycan beynəlxalq qərarları özü icra etməyə başladı: “Ötən 30 il ərzində gözləyirdik ki, aparıcı dövlətlər reallığı düzgün qiymətləndirəcək, sözügedən qərarların icra olunmasını təmin edəcəklər. Ədalətə, beynəlxalq hüquq normalarına söykənəcəklər. Ancaq bütün bunların heç biri alınmadı. Eyni zamanda, biz onu da görürük ki, uzun illər aparıcı dövlətlər və beynəlxalq təşkilatlar seyrçi mövqedə qaldılar. Faktiki olaraq, münaqişənin həlli ilə əlaqədar olaraq heç bir real addımlar atmadılar. Müxtəlif mücərrəd təkliflər irəli sürüldü və indi də atəşkəs çağırışları ilə çıxış edirlər. Təbii ki, belə vəziyyət davamlı olaraq qala bilməzdi. Azərbaycan təşəbbüsü ələ alaraq beynəlxalq qətnamələrdən irəli gələn məsələləri icra etməyə başladı. Bu bizim tam hüququmuzdur və bizə əsas verir. Nəticədə Azərbaycan öz ərazi bütövlüyünü bərpa edir. Ermənistan isə, faktiki olaraq, çabalayır. Faktiki olaraq, başa düşürlər ki, artıq onlar məğlubiyyətlə qarşılaşmış bir tərəfdirlər. Bir sıra dövlətlərə yalvarırlar ki, gəlib onlara kömək etsinlər. Ancaq dünya da dəyişib və bir sıra dövlətlər həqiqəti, reallığı dərk edirlər. Eyni zamanda, reallığı düzgün qiymətləndirirlər”.

Politoloqun fikrincə, bütün bunlar isə, nəticə etibarilə, beynəlxalq müstəvidə bizim xeyrimizə işləyir.

Vidadi ORDAHALLI

Son xəbərlər