02/12/2020 17:07
728 x 90

Ermənistanın dövlət informasiya siyasətində hərbi uğursuzluqlar büsbütün gizlədilir - Paşinyan hakimiyyətinin reallıqlardan böyük qorxusu...

İbrahim Rüstəmli: “Yalan informasiya siyasətinin yürüdülməsi belə, Paşinyan hakimiyyətini düşdüyü vəziyyətdən xilas edə bilməyəcək”

img

Təcavüzkar və işğalçı Ermənistan hər gün Qarabağ savaşının açı məğlubiyyətlərini dadır. Lakin təcavüzkar, əvvəllər olduğu kimi, yenə uğursuzluqlarını əhəmiyyətsiz dərəcədə kiçildir, Azərbaycan tərəfinin şəksiz qələbələrini gizlədir. Düşmən ordumuzun göz önündə olan irəliləyişi, öz tərəfində yaranan təşviş və fərarilik barədə dezinformasiya yayır.

Azərbaycanın Müdafiə naziri, general-polkovnik Zakir Həsənov vaxtilə mediaya açıqlamsında Aprel döyüşlərində Ermənistanın itkiləri ilə bağlı həqiqəti doğru əks etdirən məlumat verib: “2016-cı ilin Aprel döyüşlərində ermənilər bizdən 10 dəfə daha çox itki veriblər. Biz haqq yolundayıq, biz Vətən üçün savaşırıq. Bəs onlar nə üçün savaşırlar? 2016-cı ildə onlar bizdən 10 dəfə daha çox itki veriblər. Texnikanı götürsək, biz sadəcə 1 tank itirdik, onu da sonradan təmir etdik, ermənilər isə 33 tank itiriblər. Biz 1 top itirmişik, onlar 15 top. Bizdə olan məlumata görə, onlar 322 nəfər itiriblər. Məlum olub ki, bu azaldılmış rəqəm imiş. Onlar komissiyada 560 nəfərin öldüyünü ağızlarından qaçırıblar. Mən axı özüm də ön xətdə idim. Biz onların necə qaçdığını görürdük”.

Göründüyü kimi, ölkəmizin müdafiə naziri Ermənistanın 4 il əvvəl öz itkilərini ictimaiyyətdən gizlətdiyinə dair konkret rəqəmləri ortaya qoyub. Maraqlısı budur ki, Ermənistan yenə həmin yolla gedir. Hətta Azərbaycanın işğaldan azad etdiyi böyük rayonlar barədə belə məlumat vermir. Əksər hallarda isə bu aydın həqiqəti təkzib etməklə özünü gülünc vəziyyətə qoymuş olur. Ermənistanın bu uğurları və ən başlıcası, öz uğursuzluqlarını cəmiyyətdən gizlətməsi hansı məqsədlərə hesablanıb?

Hərbi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə bildirdi ki,  Qarabağ problemi Ermənistanda olan bütün hakimiyyətlər və siyasi qüvvələr üçün hər zaman siyasi oyun mənbəyi olub: “Hakimiyyətlərin dəyişməsi həmin məsələyə yanaşmada formanı dəyişsə də, məzmun və mahiyyəti dəyişməyib. Ermənistan uğursuzluqlarını gizlətməklə, güya informasiya təhlükəsizliyi siyasəti həyata keçirir. Ancaq Azərbaycanın hərbi uğurlarının miqyası o qədər böyükdür ki, bunu gizlədə də bilmirlər. 4 böyük rayon mərkəzi və ətraf kəndlərin işğaldan azad edilməsi necə gizlədilə bilər? Bu səbəbdən də açı etiraflarını, güya taktiki olaraq geriçəkilmələrlə izah edirlər. Əslində, bunun özü də məğlubiyyətin etirafıdır. Onların belə siyasət yürütmələrinin bizim üçün heç bir təhlükəsi yoxdur. Çünki Azərbaycan Ordusu yalnız irəliyə doğru addımlayır. Məğlub tərəfin bundan başqa çıxış yolu yoxdur. Bizdə dəqiq məlumat var ki, artıq Qarabağdakı erməni ordusunun yanacaq-sürtkü materialları, şəxsi heyəti və silah-sürsatı tükənmək üzrədir. İnsan resursları ilə bağlı problemin olduğunu onların təqdim etdiyi materiallar da təsdiqləyir. Videolardan görürük ki, artıq döyüşə qadınları və çox yaşlı kişiləri göndərirlər. Ermənistanın yalan danışmaqdan başqa çıxış yolu qalmayıb. Suda boğulan adamın saman çöpü axtarmasına bənzər vəziyyətdədirlər. Onların mediasını yaxından izləyirəm. Artıq daxili siyasi intriqalar baş qaldırıb. Başda Paşinyan olmaqla, bütün Ermənistan iqtidarı küncə sıxılıb. Onlardan son məğlubiyyətlərin hesabı soruşulur. Hesab edirəm ki, Azərbaycanın qarşıda olan hərbi uğurları Ermənistanın daxilindəki vəziyyəti daha da acınacaqlı məcraya yönəldəcək. Bu səbəbdən də, yalan informasiya siyasətinin yürüdülməsi belə, Paşinyan hakimiyyətini düşdüyü vəziyyətdən xilas edə bilməyəcək”.

Müasir dönəmdə yalanla cəmiyyətin başını tovlamaq mümkün deyil. Sosial şəbəkələrin erməni seqmentində gedən müzakirələrdən də hiss edilir ki, cəmiyyət hər detaldan məlumatlıdır və  buna görə mövcud hakimiyyətdən hesabat tələb edir.

Məhəmmədəli QƏRİBLİ

Son xəbərlər