Dəyanət Osmanlı: “Bu mənada, cənab Prezidentin xalqa müraciətlərinin hər kəlməsinə cəmiyyətimiz anlayış göstərməlidir”
Oktyabrın 20-də Prezidenti İlham Əliyev xalqa növbəti müraciətində Azərbaycan dövlətinin, müzəffər ordumuzun torpaqlarımızın işğaldan azad edilməsi prosesində böyük uğurlar əldə etdiyini qeyd etdi.
Bundan başqa, ölkə başçısı hələ xalqa açıqlanmayan digər böyük uğurlarımızın olduğunu da bildirdi: “...Gün gələcək, bu haqda geniş məlumat veriləcəkdir. Əminəm, Azərbaycan xalqı yaxşı başa düşür ki, bu gün nəyi demək mümkündürsə, onu deyirik. Çünki döyüşlər gedir və biz istəyirik ki, tezliklə bu döyüşlər başa çatsın, tezliklə ərazi bütövlüyümüz bərpa edilsin. Ona görə hesab edirəm ki, Azərbaycan ictimaiyyətinə verilən məlumat və məlumatın həcmi tam kifayətdir”.
Prezidentin “Əminəm, Azərbaycan xalqı yaxşı başa düşür ki, bu gün nəyi demək mümkündürsə, onu deyirik” fikri nələrə işarədir? Demək olarmı ki, hələ deyilməyən uğurlarımız var?
- “Fikrimcə, dövlətimizin cəbhədə əldə etdiyi bir çox böyük uğur var ki, onlar da zamanı çatanda Ali Baş Komandan tərəfindən xalqa çatdırılacaq”
“Türk Dünyası İnfo” İctimai Birliyinin sədri Dəyanət Osmanlı “Bakı-Xəbər”ə bildirdi ki, Vətən Müharibəsinin başlandığı ilk gündən Ali Baş Komandanın tapşırığına əsasən, əlaqədar dövlət qurumları tərəfindən ordumuzun cəbhədə qazandığı uğurlar barədə bütün deyilməsi mümkün olan məlumatlar verilib, xalq informasiya ilə təmin edilib. “Bu gün Azərbaycan cəmiyyətində, həyatımızda böyük ruh yüksəkliyi var. Doğma torpaqlarımızın 20 faizi Ermənistan terrorçu dövləti tərəfindən 30 ilə yaxındır işğal atında saxlanırdı. Bu müddət ərzində torpaqların qaytarılması məsələsində Minsk Qrupu üçlüyünün əzmsizliyi, erməni tərəfkeşliyi bəzilərində müəyyən inamsızlıq yaratsa da, dövlətimiz bu sahədə gərgin iş aparırdı. Dövlətimiz hərtərəfli şəkildə gücləndikcə, ümumən xalq da torpaqlarımızın xilası, zəfər ovqatına köklənirdi. Azərbaycan dövləti hərbi qüdrətini artırmaqla yanaşı, illərdir ki, erməni qəsbkarlığı, Dağlıq Qarabağ həqiqətləri barədə dünyada işğalçının formalaşdırdığı rəyi dəyişdirmək üçün çalışırdı. Qərb də, Avropa da erməni lobbisinin təsiri ilə baş verən işğal faktına göz yumurdu. Azərbaycan Prezidenti cənab İlham Əliyevin qətiyyətli siyasəti dondurulmuş münaqişənin həllini addım-addım yaxınlaşdırdı. Ermənistan öz havadarları ilə Azərbaycanı təkləməyi, işğalla barışdırmağı dünşündüyü halda, ölkəmizin iqtisadi-sosial, hərbi inkişafı, xalq və dövlətin həmrəyliyi və qardaş Türkiyənin daimi mənəvi dəstəyi vəziyyəti kökündən dəyişdirdi”.
D.Osmanlı vurğuladı ki, Ali Baş Komandanın sentyabrın 27-dən etibarən ordumuzun əks-hücum əməliyyatına başlaması əmri bütün xalqın mübarizə duyğularını, arzularını birləşdirdi. “Cənab Prezidentin torpaqlarımızın kənd-kənd, şəhər-şəhər işğaldan qurtulduğunu elan etdiyi hər gün ayrılıqda bir bayram kimi təqvimə düşür. Bu gərgin və sevincli günlərdə insanlarımız məsuliyyəti, ayıq-sayıqlığı daha da artırmalıdırlar. Bilirik ki, düşmən məkrli, şeytan xislətlidir, Qarabağdan biabırcasına qovulduqca, hər cür fitnədən istifadə edir, hiyləyə əl atır, dinc insanlarımızı terrora məruz qoyur. Özünü insan haqlarının carçısı sayan bəzi dövlətlər Ermənistanın törətdiyi qətliamları görməməzliyə vururlar. Bir yandan da Azərbaycanın inkişafını, cəbhədəki böyük uğurlarını həzm edə bilməyən qüvvələr var. Bütün bunlar göstərir ki, Azərbaycan Prezidenti bir neçə cəbhədə mücadilə aparır. Onun cəsarəti, siyasi gedişləri dünya arenasında özü barədə çox güclü milli obraz yaradıb. Bu mənada, cənab Prezidentin xalqa müraciətlərinin hər kəlməsinə cəmiyyətimiz anlayış göstərməlidir, xalq üçün əsas yetərli və lazımi informasiya - qələbə müşdəsidir ki, onu da alır. Fikrimcə, dövlətimizin cəbhədə əldə etdiyi bir çox böyük uğur var ki, onlar da zamanı çatanda Ali Baş Komandan tərəfindən xalqa çatdırılacaq. Azərbaycan həm cəbhədə, həm siyasi müstəvidə günbəgün yeni dönəmə qədəm qoyur və bu işdə dövlətimizə, Ali Baş Komandanımıza məsuliyyətimizlə, səbrimizlə, birliyimizlə dəstək olmalıyıq” - deyə D.Osmanlı bildirdi.
İradə SARIYEVA
.jpg)
