“Mən bir daha bəyan edirəm ki, verilmiş bütün vədləri mən yerinə yetirirəm, verilmiş bütün vədlərə sadiqəm. Prezident kimi mənim fəaliyyətim üçün əsas məsələ, əsas vəzifəm Azərbaycan torpaqlarının qaytarılmasıdır, ərazi bütövlüyünün bərpa edilməsidir və bu gün biz bunu döyüş meydanında edirik”. Bunu oktyabrın 20-də Prezident İlham Əliyev xalqa müraciətində qeyd edib.
Belə bəyanat böyük cəsarət və inam nümunəsidir. Prezident niyə bu qədər inamlıdır?
“Novoye vremya” qəzetinin baş redaktoru Şakir Ağayev bizimlə söhbətində bildirdi ki, ölkə başçısı İlham Əliyev ilk dəfə xalq tərəfindən Prezident seçildiyi zaman verdiyi bütün vədləri yerinə yetirir. “Prezident xalqa verdiyi bütün vədləri, o cümlədən də Dağlıq Qarabağın və ətraf rayonların işğaldan azad ediləcəyi ilə bağlı verdiyi vədləri doğruldub. Bilirsiniz ki, son 15 ildə Azərbaycanın sosial-iqtisadi cəhətdən inkişaf etdiyi, daxili və beynəlxalq siyasət aləmində qazandığı uğurlar göz qabağındadır. Prezident seçki kampaniyası dövründə və sonrakı mərhələlərdə xalqa verdiyi bütün vədləri addım-addım, pillə-pillə yerinə yetirir. Cənab Prezidentin də özünün qeyd etdiyi kimi, onun üçün hər gün əsas məsələ torpaqlarımızın işğaldan azad edilməsi və öz yurdlarından, evlərindən didərgin düşən vətəndaşlarımızı öz yurd-yuvalarına qaytarmaqdır. Prezident dəfələrlə qeyd edirdi ki, bunun üçün də müvafiq zamanı gözləyirik. Təbii ki, Prezident hər kəsdən məlumatlıdır və hər şeyi yaxşı bilir. Bu gün də həmin zaman yetişdi və bizim Qarabağ cəbhəsində böyük uğurlarımız var, torpaqlarımızın işğaldan azad edilməsi göz qabağındadır. Prezident bununla da öz sözünün üstündə dayandığını, xalqa verdiyi vədi yerinə yetirdiyini sübut edir. Bu gün cəbhədə müzəffər Azərbaycan Ordusu Ali Baş Komandanın bütün tapşırıqlarını həyata keçirir. Prezident niyə bu qədər inamlıdır, güvənlidir? Bunun əsas səbəbi odur ki, işğal altında olan torpaqlarımızın işğaldan azad edilməsi məsələsində xalq yekdilliklə Prezidentin arxasında dayanıb və onunla həmrəy olduğunu göstərib. Prezidentə ən böyük qüvvət verən xalq amilidir, xalqın dövlət başçısı ilə həmrəy olmasıdır. Prezident özü qeyd etdi ki, bizim yumruğumuz, sadəcə, düşmənin başını yaran yumruq deyil, bizim yumruğumuz bizim birliyimizdir, xalqımızın birliyi məqsədyönlü fəaliyyət, beynəlxalq müstəvidə bizə sərf edən və ədaləti əks etdirən qərarların, qətnamələrin qəbul edilməsidir. Özü də qeyd etdi ki, məhz bu birliyin hesabına qalıb gəlirik. Prezidentin bu ifadəsi xalqımızın birliyinin rəmzidir. Torpaqlarımızın işğaldan azad edilməsi məsələsində Prezidentin bu qədər güclü, inamlı danışması təsadüfi deyil. Prezidentin bu qədər inamlı danışmasının kökündə ölkə başçısının siyasi manevrləri, həmçinin, ölkəmizin güclü sosial-iqtisadi rifahı, dövlətimizin maddi cəhətdən imkanlı olması, bunların fövqündə isə dövlətlə xalqın birliyi dayanır”.
Ş.Ağayev hesab edir ki, Azərbaycan xalqının bu məsələdə Azərbaycan dövləti, Ali Baş Komandanla yekdil olaraq həmrəyliyi ölkə başçısını daha da inamlı və güclü edir. “Prezidentin xalqdan aldığı bu güc, bu dəstək Ali Baş Komandanın işğal altında olan bütün torpaqlarımızın işğaldan azad edilməsi prosesini davam etdirməsinə böyük güc, inam verir. Hesab edirəm ki, bu birliyin hesabına Ali Baş Komandanın rəhbərliyilə bütün işğal altında olan torpaqlarımızı Azərbaycan Ordusunun şücaəti, qəhrəmanlığı sayəsində düşmən tapdağından azad edəcəyik. İnanırıq ki, tezliklə hazırda işğalda olan torpaqlarımız da erməni terrorçularından, separatçılarından tam olaraq təmizlənəcək və o torpaqların əsl sahibləri, yiyələri Dağlıq Qarabağa və digər rayonlarımıza qayıdacaqlar.
İndiyə qədət tarix boyu olmayıb ki, ölkənin 50 siyasi partiyası bütün bu məsələlərdə Prezidentlə birgə olsun, onu müdafiə etsin, birgə bəyanatlar imzalasın. Amma bu, Azərbaycanda baş verdi. Bu hələ döyüşlərə başlamamışdan əvvəl Azərbaycan Prezidentinin bu istiqamətdə apardığı siyasi islahatların da nəticələrindən biridir. Bu siyasi islahatlar da öz bəhrəsini verdi və Azərbaycanda düşüncəsindən, siyasi baxışından asılı olmayayaq, bütün siyasi qüvvələr birləşərək Prezidentə dəstək oldular. Bu da Prezidentə güc, qüvvət verdi ki, işğal altında olan Azərbaycan torpaqlarının düşmən tapdağından azad edilməsində daha inamlı hərəkət etsin” - deyə Ş.Ağayev qeyd etdi.
İradə SARIYEVA
