Azərbaycan Ordusunun cəbhənin müxtəlif istiqamətlərində əldə etdiyi uğurlar, torpaqlarımızın azad edilməsi hər birimizi qürurlandırır. Məğlub olduqlarını başa düşən ermənilər saxta SMS göndərməklə məşğuldurlar.
Göndərilən saxta “xəbərdarlıq” mesajlarında qeyd olunur ki, guya yaşadığımız yerə raket düşə bilər və təcili olaraq oranı tərk etməliyik. Ermənilərin bu tip mesajları göndərməkdə tək məqsədləri var, o da əhalini panikada saxlamaqdır. Onların məqsədi aydındır, əhali arasında çaşqınlıq, panika yaratmaq.
Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidməti: “Vətəndaşlar yalnız rəsmi mənbələrdən verilən məlumatlara etimad etməli, tanımadıqları xarici nömrələrdən gələn zəng və mesajlara cavab verməməli, həmin nömrələri bloklamalıdırlar”
Məsələ ilə bağlı Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidmətindən verilən məlumata görə, məqsədi əhali arasında qorxu və təşviş yaratmaq olan bu məlumatlar həqiqəti əks etdirmir: “Vətəndaşlardan yalnız rəsmi mənbələrdən verilən məlumatlara etimad etmələri, tanımadıqları xarici nömrələrdən gələn zəng və mesajlara cavab verməmələri, həmin nömrələri bloklamaları, mesajları spam olaraq şikayət etmələri xahiş olunur. Həmçinin, hər hansı kiberinsidentlə üzləşdiklərində və ya metodiki dəstəyə ehtiyacları olduqda www.cert.az saytı və ya [email protected] elektron poçt ünvanı vasitəsilə Elektron Təhlükəsizlik Xidmətinə müraciət etsinlər. Eyni zamanda, vətəndaşlardan xahiş edirik ki, baş verən kiberinsidentlərlə bağlı ekran görüntülərini (screenshot) və digər elektron sübutları saxlasınlar və Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidmətinə göndərsinlər”.
Rasim İsgəndərov: “...heç bir vətəndaşa hərbi xəbərlər SMS vasitəsilə çatdırılmır”
Hərbi ekspert Rasim İsgəndərov bildirdi ki, düşmən panika içində olduğuna görə artıq ağlına gələn hər şeyi edir. Bu, onların son addımlarıdır: “Məlumdur ki, istənilən hadisə ilə bağlı ilk və rəsmi xəbəri Müdafə Nazirliyi verir. Odur ki, hər bir məlumatı rəsmi mənbədən dəqiqləşdirməli, onun “fake” olub-olmadığını müəyyənləşdirməliyik.
Düşmən hətta Gəncə terrorunun da bizi ruhdan salmadığını anlamalıdır. Dediyim kimi, ciddi maariflənməyə ehtiyac var. KİV, Dövlət Reklam Agentliyi bu işdə fəal olmalı, mobil operatorlar abunəçilərinə lazımi xəbərdarlığı etməlidirlər. Tanınmayan nömrədən hərbi vəziyyətə dair gələn heç bir mesaja inanmaq lazım deyil. Çünki indi heç bir vətəndaşa hərbi xəbərlər SMS vasitəsilə çatdırılmır”.
Həmsöhbətimiz onu da əlavə etdi ki, sosial şəbəkələrə girişin məhdudlaşması ilə bu dəfə də düşməni “zərərsizləşdirdik”: “Çarəsiz vəziyyətdə qalan ermənilər Azərbaycan vətəndaşlarına saxta SMS göndərməyə başlayıblar. Bunun qarşısını texniki yolla almaq mümkün deyil. Yeganə variant maariflənmədir”.
Günel CƏLİLOVA
