Ramil Məmmədli: “Yeni müasir müharibə taktikasında Azərbaycan canlı qüvvənin qorunmasına çox böyük önəm verir”
Ermənistan Müdafiə Nazirliyinin nümayəndəsi Artsrun Ovannisyan İctimai TV-nin efirində deyib ki, Azərbaycan Silahlı Qüvvələrinin yalnız kəmiyyət yox, həm də texniki üstünlüyü var. Onun sözlərinə görə, bəzi sahələrdə Azərbaycanın gücü Ermənistanın gücünü 12 dəfə üstələyib: "On iki dəfə çox, bunun nə olduğunu başa düşürsünüz? Bu, demək olar ki, müharibə tarixində heç vaxt olmayıb və ya çox nadir hallarda olub".
O vurğulayıb ki, hazırda Qarabağda fövqəldövlətlərin arsenalında olan texnikalar tətbiq edilir. O qeyd edib ki, ən yeni Türkiyə və İsrail texnologiyalarından istifadə olunur:
"Bu, yeni PUA-lar, yüksək dəqiqlik raketləri, raket-artilleriya kompleksi, REB sistemləridir. Biz beşinci nəsil müharibəsini görürük. Bütün mexanizmlər hər iki tərəfdən uyğun deyil, lakin yüksək texnologiyalar seqmentinə böyük diqqət ayrılıb".
Ermənistan rəsmisinin bu etirafı artıq məğlubiyyətlə barışdıqları anlamına gələ bilərmi? Belə üstünlüyü aşkar görən düşmən, yəqin ki, müqavimət göstərməyin də yersiz olduğunu dərk edir.
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan ordusu bu mərhələyə birdən-birə gəlməyib: “Hələ illər əvvəl bizim ordumuz yeni müasir silahların və texnikaların satın alınmasına başladı. Xüsusilə də ordunun şəxsi heyətinin həmin texnikalrdan istifadəsini təmin etmək üçün onların bilik və bacarıqlarının təkmilləşdirilməsi istiqamətində addımlar atılmağa başladı. Azərbaycan ordusu NATO və dünyanın hərbi cəhətdən inkişaf etmiş orduları ilə yaxından əməkdaşlıq edərək, bu sahədə ciddi tədbirlər həyata keçirdi. Ordumuz hər il bir neçə dəfə irimiqlyaslı hərbi təlimlər keçirdi. Bunun nəticəsidir ki, bu gün hərb meydanında biz düşməni qovuruq. Hətta düşmən belə etiraf edir ki, biz yüksək texnoloji silahlarla müharibə aparırıq. Bizim beşinci nəsil silahlardan istifadə etməyimiz dəqiqdir. Yeni müasir müharibə taktikasında Azərbaycan canlı qüvvənin qorunmasına çox böyük önəm verir. Bizim hazırda həyata keçirdiyimiz əməliyyatlarda əsas məqsəd canlı qüvvənin qorunmasına hesablanıb. Hazırda az itki ilə böyük ərazilərin işğaldan azad edilməsini hədəfləyirik. Bu məqsədlə Azərbaycan ordusunun pilotsuz uçuş aparatları parkı yaradılıb. Bununla yanaşı, ordumuzun çox güclü quru qoşunları formalaşıb ki, bunlar da sürətli hücum əməliyyatlarında uğurla istifadə olunur. Bütün uğursuzluqlarını gizlədən Ermənistanın hərbi rəhbərliyi bu etirafı həm də öz məğlubiyyətlərinə bir don geyindirmək üçün edir. Ermənistan cəmiyyətinə demək istəyir ki, biz elə-belə orduya məğlub olmuruq. Əslində bu etirafı edən, reallıqdan xəbəri olan ordu rəhbərliyi ağ bayraq qaldırıb tam təslim olmalıdır. Başa düşməlidir ki, müqavimətin faydası yoxdur. Azərbaycan tərəfi onlara sülhü yarada biləcək şərtlərini də açıqlayıb. Yaxşı olar ki, nəzərdən keçirib, gələcək itkilərinin qarşısını almaq üçün silahı yerə qoysunlar. Artıq onların təminat və canlı qüvvə sarıdan da ciddi problemləri yaranıb. Ordumuzun son qalibiyyətləri göstərir ki, biz tezliklə qarşımıza qoyulan məqsədə çatacağıq. Ermənistana bizimlə müharibə etməyə nə hərbi gücü, nə də mənəvi-psixoloji vəziyyəti imkan verir”.
Erməni generalının bu etirafı həm də onların hərb meydanında əbəs yerə çabaladıqlarına bir işarədir.
Məhəmmədəli QƏRİBLİ
