01/12/2020 14:53
728 x 90

Ermənilərin Kəlbəcər və Laçına qanunsuz yerləşdirdikləri ailələrin sayı minlərlədir - Azərbaycan Prezidentindən rəsmi təsdiq...

Faiq Ələkbərli: “...öz işğalçı simasını ortaya qoyub”

img

“...30 ilə yaxın aparılan danışıqlar heç bir nəticə vermədi. İşğal edilmiş torpaqlarda Ermənistan tərəfindən qurulmuş istehkamlar onu göstərir ki, onlar bu torpaqları bizə vermək fikrində deyildilər. Sadəcə olaraq, bizi və beynəlxalq vasitəçiləri aldadırdılar. Sadəcə olaraq, vaxtı uzadırdılar və bununla bərabər işğal edilmiş torpaqlarda qanunsuz məskunlaşma aparırdılar, Laçın şəhərində minlərlə insanı yerləşdiriblər, Kəlbəcərdə minlərlə insanı yerləşdiriblər...” Bu fikirləri oktyabrın 20-də Prezidenti İlham Əliyev xalqa növbəti müraciətində bildirib.

Prezidentin Ermənistanın Kəlbəcər və Laçında minlərlə erməni ailəsini yerləşdirməsi faktını ictimaiyyətin diqqətinə çatırması, əlbəttə ki, düşmənimizin bədnam siyasətinin ifşa edilməsidir. Bu həm də Prezident tərəfindən Ermənistanın işğal etdiyi Azərbaycan torpaqlarında qanunsuz köçürmə aparmasının bir daha həm yerli, həm də beynəlxalq ictimaiyyətə çatdırılmasıdır. 

  • “Ermənistanın müxtəlif ölkələrdən köçürərək Laçında, Kəlbəcərdə və digər ona aid olmayan torpaqlarda erməniləri yerləşdirməsində Fransanın da xüsusi rolu olub”

Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə bildirdi ki, Prezident bu bəyanatı səsləndirməklə beynəlxalq ictimaiyyətin diqqətini bir daha Ermənistanın bizim torpaqlarda qanunsuz köçürmə siyasəti həyata keçirdiyinə yönəldib və düşmən ölkənin mənfur siyasətini ifşa edib. “Dövlət başçısı İlham Əliyevin xalqa etdiyi müraciətdə bir sıra mühüm və diqqətçəkən məqamlar var idi. Sözün açığı, bu məqamların hamısı çox önəmlidir. Doğrudan da 28-30 ilə yaxındır ki, ATƏT-in Minsk Qrupu Dağlıq Qarabağ münaqişəsinin tənzimlənməsi məsələsində Azərbaycanla Ermənistan arasında vasitəçilik edir. Bu illər ərzində münaqişənin həlli ilə bağlı ciddi bir nəticə olmadı. Düzdür, müəyyən zaman kəsiyində hansısa irəliləyişlərin olduğu haqda bəhs olundu, hansısa müsbət nəticələrin ola biləcəyindən danışıldı, ancaq, bütövlükdə, 30 il aparılan danışıqlar konkret anlamda nəticəsiz qaldı. Bu onu göstərir ki, əslində, Ermənistan bu danışıqlarda oyun oynayırdı, o bu oyunda heç də tək deyildi, ATƏT-in Minsk Qrupunun xüsusən də Rusiya və Fransa kimi həmsədrləri də rol oynayırdı. Xüsusən də Fransa Ermənistanın necə məkrli yol tutduğunu çox yaxşı anlayırdı. Bizdə onsuz da məlumatlar var idi ki, Ermənistan Dağlıq Qarabağda, eləcə də işğal etdiyi digər rayonlarımızda - Kəlbəcərdə, Laçında xüsusi istehkamlar qurur və bu istehkamlardan da birinə keçmiş müdafiə nazirinin adını verirlər, Ohanyan adlandırırlar. Bu onu göstərir ki, doğrudan da Ermənistan bu məsələlərdə həmişə xəyanət və məkrli bir yol tutub və bizim ərazilərimizdə möhkəmlənir, üstəlik də başqa ölkələrdə, xüsusən də Suriyada, Livanda, Fransada yaşayan erməni əsilli ailələri, insanları işğal etdiyi ərazilərdə yerləşdirib. Əlbəttə, Ermənistan işğal etdiyi Azərbaycan ərazilərində, xüsusən də ermənilərin heç zaman yaşamadığı Laçında və Kəlbəcərdə qanunsuz yerləşdirmə prosesini həyata keçirməklə öz işğalçı simasını ortaya qoyub. Hesab edirəm ki, Ermənistanın müxtəlif ölkələrdən köçürərək Laçında, Kəlbəcərdə və digər ona aid olmayan torpaqlarda erməniləri yerləşdirməsində Fransanın da xüsusi rolu olub. Eyni zamanda, Rusiyada yuvalanmış ermənilər Ermənistanın qanunsuz məskunlaşma siyasətinə dəstək veriblər, bu prosesdə iştirak ediblər, onlar və fransızlar bu işdə düşmən ölkəyə yardımlar ediblər. Hələ bu məsələdə Ermənistana yardım edən ölkələrin də olduğunu demirəm, amma bu istisna olunmur. Başqa dövlətlər də bu qanunsuz işdə Ermənistana ciddi şəkildə yardımlar ediblər. Azərbaycan dövləti də dəfələrlə bu faktlarla bağlı xəbərdarlıq da edib. Dağlıq Qarabağ öz yerində, cənab Prezidentin də qeyd etdiyi kimi, xüsusən də Laçın və Kəlbəcərdə minlərlə erməninin qanunsuz olaraq yerləşdirilməsi təsadüfi ola bilməzdi. Yəni bunlarda çox böyük arxayınlıq yaranmışdı ki, proses belə də davam edəcək, onlara dəyib-toxunan olmayacaq”.

Ermənistanın xətti ilə işğal altında olan Dağlıq Qarabağda və Dağlıq Qarabağdan kənardakı ərazilərimizdə müxtəlif “beynəlxalq” tədbirlər keçirildiyini deyən F.Ələkbərlinin sözlərinə görə, belə qondarma tədbirlərin Laçında və Kəlbəcərdə də keçirildiyinə dair videogörüntülər var. “Bütün bunlar onu göstərirdi ki, bu davranışlar erməni həyasızlığının, xəstəliyinin pik nöqtəsi idi. Hələ onlar işin belə də davam edəcəyinə ümid edirdilər. Ancaq, əlbəttə, bu yolverilməz idi. Burada bir incə məsələ var, Ermənistanın Baş naziri Paşinyan, eləcə də separatçı rejimin qondarma başçısı Araik Harutunyan və başqaları həmişə iddia ediblər ki, guya burada ermənilər çoxluq təşkil edib, Azərbaycan türklərinin sayı bir neçə faiz olub. Söhbət Dağlıq Qarabağdan gedir. Bunlar kökündən yanlışdır. 100 il bundan əvvəl Şuşada, Xankəndidə, Ağdərədə, Xocavənddə və digər ərazilərdə azərbaycanlıların sayı ermənilərin sayından çox olub. Bu faktdır. Sovet Rusiyası dövründə bəzi rayonlarımızda, xüsusən də Xankəndidə və digər yaşayış məntəqələrimizdə süni şəkildə, həyasızcasına ermənilərin çoxaldılması siyasətinə başlanıb. Artıq Sovetlər Birliyi dağılma ərəfəsində olduğu vaxtlar Xankəndidə və bəzi yerlərdə ermənilər say baxımından nisbətən bir qədər artıq olublar. Onu da deyim ki, bu da süni şəkildə baş verib. Birinci Qarabağ Müharibəsindən sonra Ermənistan tərəfindən heç bir qanun çərçivəsinə sığmayan, beynəlxalq qanunvericilik prinsiplərinə zidd addımlar atılıb və burada qanunsuz məskunlaşdırma siyasəti həyata keçirilib. Hesab edirəm ki, Prezident İlham Əliyevin bu məsələlərlə bağlı fikirləri çox dəqiq, hərtərəfli və sərrastdır. Azərbaycan Ordusu artıq bu məsələni tam olaraq həll etmək üzrədir. Demək olar ki, yaxın zamanda bütün torpaqlarımız işğaldan azad olunacaq. Təkcə yeddi rayonumuz deyil, Dağlıq Qarabağ da erməni terrorçularından təmizlənəcək, işğalçı Ermənistan və onun ideoloqları, havadarları heç nə edə bilməyəcəklər. Dövlət başçısının da dediyi kimi, bu hərbi əməliyyatlar o zaman dayana bilər ki, işğalçı ordu torpaqlarımızdan tamamilə çıxsın, onlar Qarabağın Azərbaycana məxsus olduğunu desinlər. Aydın məsələdir ki, qəhrəman, şanlı Azərbaycan Ordusu bu məsələni elə cəbhədə həll edərək, 86, 6 min kvadratkilometr ərazimizi tamamilə bərpa edəcək və Azərbaycanın şanlı bayrağı bu gün Cəbrayılda, Füzulidə, Zəngilanda, Xudafərində dalğalandığı kimi, çox yaxın günlərdə Şuşada, Xankəndidə, Xocavənddə, Ağdərədə, Laçında, Kəlbəcərdə, Qubadlıda və başqa torpaqlarımızda da dalğalanacaq. Ermənistanın bizim torpaqlarımızda həyata keçirdiyi qanunsuz məskunlaşma siyasətinə görə həm Paşinyan hökuməti peşman olacaq, eyni zamanda, bu torpaqlara müxtəlif vədlərlə aldadılıb köçürülənlər isə çıxıb gəldikləri ölkələrə qayıdacaqlar. Xaricdən köçürülərək Laçında, Kəlbəcərdə və digər rayonlarımızda məskunlaşdırılan ermənilər heç zaman burada yaşamaq istəməyəcəklər. Çünki artıq onlar bilirlər ki, Paşinyan hökuməti onları aldadaraq bu torpaqlarda məskunlaşdırıb, bu torpaqlar onların vətəni deyil, buna görə də çıxıb gedəcəklər” - deyə F.Ələkbərli vurğuladı.

İradə SARIYEVA

Son xəbərlər