Ermənistanda Sorosa bağlı hakimiyyətin formalaşması artıq bütün dünya miqyasında hamıya məlum olan həqiqətdir. Azərbaycan da bu məsələni cəbhə zonasında yeni hərbi əməliyyatların başlanması ilə yenidən ən yüksək səviyyədə bəyan edir.
Yeri gəlmişkən qeyd edək ki, Rusiyanın TASS informasiya agentliyinə videomüsahibəsində Prezident İlham Əliyev yenidən bu mövzuya toxunaraq maraqlı açıqlama verib. Bu xüsusda dövlət başçısı qeyd edib: “İndi baş verənlərin bütün təqsiri şəxsən Paşinyanın üzərindədir. Bu insan, sadəcə, təsadüfən hakimiyyətə gəlməyib, o həm Azərbaycan xalqına, həm də erməni xalqına həddən artıq iztirab və qəm-qüssə gətirib. O, Sorosun əlaltısıdır. Bu insan əvvəllər həmişə Ermənistanın Rusiya ilə əməkdaşlığının əleyhinə çıxış edirdi. Onun partiyası “Çıxış” adlanırdı – Kollektiv Təhlükəsizlik Müqaviləsi Təşkilatından çıxış, Avrasiya İqtisadi Birliyindən çıxış. Paşinyanın bütün komandası praktik olaraq Qərbin, Soros Fondunun, “Amnesty International”, “Transparency”, “Human Rights Watch”, “Freedom House”un maliyyələşdirdiyi qeyri-hökumət təşkilatlarının nümayəndələrindən ibarətdir. Bu gün Ermənistan hakimiyyətində təmsil olunan insanlar vaxtilə Rusiya səfirliyinə yumurta atır, “Rusiyalı işğalçılar, rədd olun” şüarları ilə çıxış edirdilər. Buna görə də mən, düzünü desəm, Rusiyanın siyasi isteblişmentinin müəyyən hissəsinin bu cinayətkar terrorçu rejimi dəstəkləməsinə təəccüblənirəm”. İndi Ermənistanın özündə də etiraflar artır ki, Paşinyan Sorosa bağlıdır və bütün bu baş verən fəlakətlərə görə də o məsuliyyət daşıyır. Məsələn, Ermənistanın “VETO” ictimai-siyasi hərəkatının rəhbəri Narek Malyan bu mövzuda qeyd edir: “Düz bir ay əvvəl Milli Təhlükəsizlik Xidmətinə Soros ofisi tərəfindən xain cinayət haqqında sayca 3 yazılı və şifahi hesabat təqdim etmişəm”. O qeyd edib ki, söhbət ağır cinayətdən gedir: “1) Açıq şəkildə bildirmişəm ki, Sorosun Ermənistandakı ofisi erməni və yezidi xalqları arasında millətlərarası düşmənçiliyin təşviq edilməsini maliyyələşdirir. 2) Ermənistan MTX-nin müraciətlər şöbəsinə cinayət haqqında yazılı hesabat təqdim etmişəm. 3) Məktubla MTX rəisinə cinayət haqqında yazılı hesabat göndərmişəm. Bu günə qədər Ermənistanın hüquq-mühafizə orqanlarından heç bir cavab yoxdur. Bu fakt sübut edir ki, Sorosun ofisi və ondan faydalananlar Ermənistanda imtiyazlı, cəzasız və qanundankənar statusdadır”.
Soros amili ilə bağlı daha bir maraqlı məqam Nikol Paşinyanın qızı Mariam Paşinyan sosial şəbəkə hesabında Dağlıq Qarabağdakı döyüşlərlə bağlı paylaşımına verilən reaksiyadır. Belə ki, baş nazirin qızının pessimist notda yazdığı status erməni istifadəçilərdə ciddi narazılıq yaradıb. Paşinyanın qızı statusunda yazıb: “Xəyallarımız və hədəflərimiz puç oldu. Xəyallarımız isə əsgərlərimiz və vətənimizlə bağlı idi”. Mariam Paşinyanın bu statusuna sosial şəbəkələrdən ciddi reaksiya verilib. Ermənilər həmin paylaşıma şərh yazaraq bildiriblər ki, məhz Mariamın Soros qulu olan atası bu ölkəni uçuruma sürükləyib. Surik Saroyan adlı istifadəçi yazıb: “Təəssüf ki, sizin xəyallarınız milli xəyallarımız deyil, Soros və ya neoliberalist “xəyallar”dır”. İndi digər ermənilər də etiraf edir ki, hazırda Paşinyanın siyasəti Ermənistanın milli maraqlarına deyil, onu baş nazir kürsüsündə əyləşdirən sorosçulara xidmət edir. İndilikdə Ermənistanda Soros Fondu insan hüquqlarının müdafiəsi, qadınların hüquqlarının müdafiəsi, antikorrupsiya kampaniyaları, seçki monitorinqi və digər sahələrdə çoxsaylı QHT-lərə dəstək verir. Məhz həmin təşkilatlar Paşinyanın hakimiyyətə gəlişinə öz töhfələrini verdilər və bu təşkilatların rəhbərlərinin bir çoxu hazırda yeni hökumətdə yüksək vəzifələr tutur. Reallıq ondan ibarətdir ki, Paşinyan hakimiyyətə gələndən sonra “məxməri inqilab”ın sponsorları qarşısında götürdüyü öhdəliklərini yerini yetirir və bu fondun əsas nümayəndələrinin hamısını Ermənistanda yüksək vəzifələrə təyin edir. Təsadüfi deyil ki, artıq sorosçular Ermənistanda hakimiyyətin bütün qollarında möhkəmlənirlər. Bu ölkədə nazirliklər, səfirliklər, universitetlər bir-bir bu fondun nəzarətinə keçir. Paşinyanın parlamentdə təmsil olunan tərəfdarlarının arasında uzun illər boyu Soros Fondunun maliyyəsi ilə fəaliyyət göstərən 14 deputat var. Bu, sadəcə, Soros Fondu ilə birbaşa bağlı olan deputatların say göstəricisidir. Fondla dolayısı ilə əlaqəsi olan deputatların sayı isə təxminən 50 nəfərə yaxındır. Bütün bunlar bir daha onu göstərir ki, Paşinyan hakimiyyəti bütün mənalarda Soros Fonduna bağlıdır. Amma indilikdə məhz bu fond Ermənistanı uçuruma yuvarlayır.
Samirə SƏFƏROVA
