Döyüş meydanında və diplomatik müstəvidə məğlubiyyətə uğrayan Ermənistan Azərbaycanın mülki əhalisini, həmçinin, enerji daşıyıcılarını dünya bazarına çatdıran kəmərlərini hədəfə almağa davam edir.
Belə ki, iki gün əvvəl Ermənistan silahlı birləşmələri mühüm dağıntılara səbəb ola bilən müharibə üsullarından istifadə edərək Azərbaycanın Xızı rayonunun ərazisində hərbi hədəf olmayan xam neft və kondensat ixrac edən kəmərləri hədəfə alıblar. Azərbaycan Ordusunun hərbi hava hücumundan müdafiə qüvvələri tərəfindən havada zərərsizləşdirilməsi nəticəsində raketin içərisində olan partlayıcı hissəciklərin bir hissəsi Azərbaycan-Rusiya iqtisadi əməkdaşlığında strateji əhəmiyyətli Bakı-Novorossiysk neft kəmərinin Xızı rayonunun Sitalçay kəndindən keçən hissəsindən 250 metr məsəfəyə səpələnib. Düşmənin məqsədi Bakı-Novorossiysk neft kəmərini vurmaq olub, amma hava hücumundan müdafiə qüvvələrimiz buna imkan verməyiblər.
Qeyd edək ki, Bakı-Novorossiysk neft kəməri Azərbaycan neftini dünya bazarına çatdıran 3 ixrac kəmərindən biridir. Kəmərin ümumi uzunluğu 1347 km, o cümlədən, Azərbaycan hissəsi 231 km, Rusiya hissəsi 1116 km-dir. Hazırda kəmərin maksimum ötürmə qabiliyyəti gündə 105 min barreldir. Maksimal daşıma qabiliyyəti ildə 6 milyon ton təşkil edir. Daşıma qabiliyyətini ildə 17 milyon tona qədər artırma imkanı var. Bakı-Novorossiysk kəməri ilə neftin nəql tarifi Rusiya Federasiyasının ərazisində 1 ton üçün 15,67 dollar, Azərbaycan Respublikası ərazisində 1 ton üçün 1,013 dollar təşkil edir.
Maraqlıdır, Ermənistan sözügedən kəməri vurmaq üçün dəqiq koordinatları haradan alır?
“...sözügedən kəmərlə bağlı koordinatları öyrəniblər”
Məsələyə münasibət bildirən hərbi ekspert Azad İsazadənin fikrincə, ermənilər bununla bağlı koordinatları müxtəlif yollarla əldə edə bilərlər: “Əvvəla Cənubi Qafqaz ölkələrinin əraziləri böyük deyil. Dəqiq də olmasa, təxminən bilirlər ki, Bakı-Novorossiysk neft kəməri haradan keçir. O baxımdan bununla bağlı bəzi məlumatları əldə etmək elə də çətin deyil. Başqa bir tərəfdən, bu, Bakı-Novorossiysk kəməri olduğuna görə, deməli, rusların da kəmər barədə məlumatı var. Məsələ ondadır ki, Bakı-Novorossiysk kəmərinin Rusiya ərazisindən keçən hissəsində işləyən işçilər arasında erməni əsilli şəxslər də var. Ehtimal ki, onlardan sözügedən kəmərlə bağlı koordinatları öyrəniblər. Deməyim odur ki, belə bir versiya da ola bilər. O da məlumdur ki, kəmər yerin altındadır və üstündə beton müdafiə sistemi var. Ancaq raket hədəfə düzgün dəysə, o zaman kəməri zədələyə bilər. Lakin bizim hava hücumundan müdafiə qüvvələrimizin peşəkarlığı sayəsində həmin raket zərərsizləşdirilib. Ümumilikdə, ermənilərin hansı çirkin məqsədlərə əl atmalarından asılı olmayaraq, biz öz strateji obyektlərimizi müdafiə etməliyik. İstər hava hücumundan, istərsə də digər terror aktlarından”.
Hərbi ekspertin fikrincə, Azərbaycan öz strateji obyektlərini etibarlı şəkildə qoruya bilir.
Vidadi ORDAHALLI
