“Biz ehtiyatda olanları döyüşə buraxmırıq, hazırda onlar bizim azad etdiyimiz ərazilərdə yerləşirlər”. Bunu Prezident İlham Əliyev Rusiyanın TASS informasiya agentliyinə müsahibəsində deyib.
Dövlət başçısının sözlərinə görə, bizim tərəfimizdən heç bir ölkə münaqişəyə cəlb edilməyib, bizim tərəfimizdə heç bir terrorçu yoxdur: “Bizim ehtiyatda olanları saymasaq, Azərbaycanın nizami ordusunda 100 min döyüşçümüz var. Biz hətta səfərbərlik elan etməmişik – nə üçün? Bizə lazım deyil. Biz qismən səfərbərlik elan etdik, neçə nəfər cəlb etməyimiz barədə rəqəmlər göstərmək istəmirəm. Lakin onlardan əsasən azad edilmiş ərazilərin monitorinqinin və həmin ərazilərə nəzarətin təmin olunması üçün istifadə edirik. Biz ehtiyatda olanları döyüşə buraxmırıq, hazırda onlar bizim azad etdiyimiz ərazilərdə yerləşirlər ki, erməni tərəfin təxribat cəhdlərinin qarşısını alsınlar. Buna görə faktlar yoxdur, zərurət yoxdur. Yalnız qeybətlər, şayiələr var. Açıq deyim, mən təəssüflənirəm ki, belə söz-söhbətlər yayılır, bununla da Azərbaycana qara yaxmağa cəhd göstərilir. Eyni zamanda, erməni tərəfin alçaldılmış vəziyyətdə olması bizə aydındır. Onlar bütün bu illər ərzində qürrələnir, özlərinin “məğlubedilməz ordusu” ilə lovğalanırdı. Biz onları torpaqlarımızdan elə qovduq ki, dabanlarına tüpürüb qaçdılar. Belə halda onlar, əlbəttə, güman etmək və ya təsəvvür etmək istəyirlər ki, bunu edən Azərbaycan Ordusu deyil, hansısa terrorçular və ya hansısa ölkələrdir”.
Bütün bu deyilənlər rezervistlərlə bağlı dövlətin dəqiq siyasətini göstərir. Həm də muzdlulara heç bir ehtiyacın olmadığını təsdiqləyir. Məsələ ondadır ki, işğaldan azad edilmiş yaşayış məntəqələrində hələlik insanlar yaşamırlar. Bu səbəbdən həmin ərazilərdə müəyyən nəzarət təmin edilməlidir ki, ermənilər təxribat törədə bilməsinlər. Digər tərəfdən, Azərbaycanın kifayət qədər ehtiyat qüvvələri olduğu üçün, hansısa muzdlu qüvvəyə ehtiyac duyulmasından söhbət belə gedə bilməz.
“Silahlı Qüvvələrimizin həm sayı, həm də peşəkarlıq və təchizat səviyyəsi yetərincə üstündür”
Məsələyə münasibət bildirən siyasi ekspert Ramil Hüseynovun sözlərinə görə, Prezidentin məlum fikirləri bir sıra məsələlərə dəqiq aydınlıq gətirdi: “Məlum oldu ki, Azərbaycanda qismən hərbi səfərbərliyin elan edilməsinin müəyyən səbəbləri var. Bizim döyüşü apara bilən kifayət qədər qüvvəmiz var. O üzdən, ehtiyatda olan qüvvələrdən işğaldan azad edilmiş ərazilərə nəzarətin həyata keçirilməsi üçün istifadə edilir. Bu həm də onu göstərir ki, dövlətimizin işğaldan azad edilmiş ərazilərlə bağlı sistemli yanaşması mövcuddur. O da ondan ibarətdir ki, əraziyə həm nəzarət yüksək səviyyədə təmin edilsin, həm də yaşayış məntəqələrinin bərpası sürətləndirilsin. Digər tərəfdən, bütün bunlar onu sübut edir ki, Qarabağ döyüşlərində Azərbaycanın zərrə qədər də olsun muzdlu qüvvələrə ehtiyacı yoxdur. Ona görə ki, bizim yetərincə böyük sayda ordumuz var. Özü də Silahlı Qüvvələrimizin həm sayı, həm də peşəkarlıq və təchizat səviyyəsi yetərincə üstündür. Ən müasir silahlarla təmin olunub. Ötən illər ərzində Türkiyə ordusu ilə bir neçə dəfə birgə hərbi təlimlər keçirilib. Bütün bunlar ordumuzun peşəkarlıq səviyyəsini, döyüş qabiliyyətini xeyli artırıb. Zatən, muzdlu qüvvələrlə bağlı Azərbaycan əleyhinə ortaya atılan fikirlər Ermənistan və onların havadarları tərəfindən uydurulub. Məqsəd Azərbaycan Ordusunun apardığı uğurlu döyüş əməliyyatlarına kölgə salmaq, ölkəmizin imicini qaralamaqdır. Ancaq onlar bununla bağlı heç bir fakt təqdim edə bilmədilər”.
Siyasi ekspertin fikrincə, bu kimi qarayaxmalar Azərbaycanı torpaqları azad etmək məqsədindən döndərə bilməyəcək.
Vidadi ORDAHALLI
