01/12/2020 02:44
728 x 90

Ermənistanın müharibə cinayətlərinə qarşı Azərbaycan diaspor quruculuğunda yeni fəallaşma dalğası...

img

Ermənistan ordusunun Azərbaycanın ikinci böyük şəhəri, cəbhə bölgəsindən 80 kilometr məsafədə yerləşən Gəncə şəhərinə oktyabrın 11-də və 17-də raket zərbələri endirməsi nəticəsində həlak olan vətəndaşlarımızın xatirəsi dünyanın müxtəlif ölkələrində yaşayan azərbaycanlılar tərəfindən də anılır, bu barədə həqiqətlər həmin ölkələrin ictimaiyyətinə çatdırılır.

Xatırladaq ki, Ermənistan silahlı qüvvələrinin oktyabrın 17-də gecə saat 1 radələrində cəbhə zonasından kənarda yerləşən, Azərbaycan Respublikasının ikinci böyük şəhəri Gəncənin mərkəzi hissəsini raket atəşinə tutması nəticəsində 13 nəfər həlak olub, 45-dən çox mülki şəxs yaralanıb, çoxlu sayda mülki infrastruktur obyektinə və nəqliyyat vasitələrinə külli miqdarda ziyan dəyib.

  • Can Azərbaycan Platforması etiraz edir

Oktyabrın 11-də gecə saat 02 radələrində isə düşmənin Gəncə şəhərinin mərkəzi hissəsində yerləşən çoxmənzilli yaşayış binalarını məqsədli şəkildə SCUD raketlərindən atəşə tutması nəticəsində, 5-i qadın olmaqla, 10 nəfər həlak olub, 40-dək insan, o cümlədən 10 qadın və 9 azyaşlı xəsarət alıb. Bundan başqa, 10-dan artıq çoxmənzilli binaya və 100-dən çox müxtəlif təyinatlı obyektə ziyan dəyib.  Ermənistanın törətdiyi bu müharibə cinayətləri  bütün dünyada yaşayan soydaşlarımızı  bir araya gətirib. Dünyanın müxtəlif ölkələrində yaşayan azərbaycanlılar  Ermənistanın növbəti vəhşiliyinə  müxtəlif formalarda etiraz edir, ölkəmizin haqq səsini bütün dünyaya çatdırırlar.

Diasporla İş üzrə Dövlət Komitəsindən verilən məlumata görə, İzmirdə fəaliyyət göstərən, Can Azərbaycan Platforması adı altında birləşən 50-yə yaxın qeyri-hökumət təşkilatının birgə təşkilatçılığı ilə keçirilən tədbir Fransa Respublikası Konsulluğunun qarşısında baş tutub. Aksiyada “İşğalçı dövləti dəstəkləməyin!”, “Ermənistan terrorçu dövlətdir!”, “Azərbaycan ədalət tələb edir!”, “Mülki insanlar toxunulmazdır!” “İşğal beynəlxalq sülhə təhlükədir!”, “Uşaq ölümünə son qoyun!” kimi şüarlar səsləndirərək ermənilərin ölkəmizə qarşı apardığı işğalçılıq siyasəti ilə bağlı faktları diqqətə çatdırıb, münaqişənin nizamlanmasında Minsk Qrupunun həmsədri kimi Fransanı ədalətli mövqe nümayiş etdirməyə çağırıblar.

  • Bernin Helvetia Platsa meydanında aksiya

İsveçrədə yaşayan azərbaycanlılar da işğalçı Ermənistan ordusunun ölkəmizə qarşı təcavüzünə, Azərbaycan ərazisindəki növbəti hərbi təxribatlarına etiraz olaraq Bernin Helvetia Platsa meydanında icazəli aksiya keçiriblər. Aksiya iştirakçıları Gəncə şəhərinin və digər yaşayış məntəqələrinin Ermənistan silahlı qüvvələri tərəfindən yenidən raket atəşinə tutulması nəticəsində mülki vətəndaşların, o cümlədən azyaşlı uşaqların və qadınların həlak olmasını, mülki obyektlərin dağıdılmasını kəskin şəkildə pisləyiblər. İsveçrə Azərbaycanlıları Kordinasiya Şurasının, Azərbaycanlıların İsveçrədəki Mədəniyyət Mərkəzinin təşəbbüsü ilə keçirilən aksiyada Berndə yaşayan və fəaliyyət göstərən soydaşlarımız iştirak edib. Aksiyada “Qarabağ Azərbaycandır!”, “İşğalçı dövləti dəstəkləməyin!”, “Ermənistan terrorçu dövlətdir!”, “Azərbaycan ədalət tələb edir!”, “Mülki insanlar toxunulmazdır!”, “İşğal beynəlxalq sülhə təhlükədir!”, “Uşaq ölümünə son qoyun!” kimi şüarlar səsləndirilib. Aksiya iştirakçıları Gəncə və Mingəçevir şəhərlərinin atəşə tutulması, Gəncədə həlak olan mülki şəxslər arasında qadınların və azyaşlı uşaqların olmasını xüsusi vurğlayıb və dünya ictimaiyyətini erməni terroruna göz yummamağa çağırıblar.

  • Soydaşlarımız Brandenburq qapılarına yürüş ediblər

Almaniya Azərbaycanlıları Alyansının təşkilatçılığı ilə Berlin şəhərində də Ermənistan silahlı qüvvələrinin Gəncəyə növbəti raket zərbələri endirməsi nəticəsində mülki şəxslərin, azyaşlı uşaqların həlak olmasına, mülki obyektlərə ciddi ziyan dəyməsinə etiraz olaraq 10 mindən çox soydaşımızın iştirakı ilə aksiya təşkil edilib. Aksiya iştirakçıları Pariser Platz meydanından Brandenburq qapılarına yürüş ediblər. Çıxış edənlər işğalçı Ermənistanın Azərbaycanın Gəncə və Mingəçevir şəhərlərində, o cümlədən müxtəlif rayonlarda dinc əhalisinə hədəflənmiş terror aktını insanlıq əleyhinə yönələn müharibə cinayəti kimi qiymətləndiriblər. Aksiyada dünya ictimaiyyətindən Ermənistanın dinc əhaliyə qarşı törətdiyi vandalizm aktlarına biganə qalmamaq və təcavüzkar dövlətin törətdiyi terror və soyqırımı aktlarına görə cəzalandırılmaları tələb edilib. İştirakçılar müxtəlif dillərdə “Qarabağ Azərbaycandır!”, “Azərbaycan sülh istəyir!”, “Gəncə cəbhə bölgəsi deyil!”, “Mülki insanlar toxunulmazdır!”, “Biz terrora yox deyirik!”, “Erməni terrorçuluğuna son qoyun!”, “Uşaq ölümünə son qoyun!” kimi şüarlar səsləndiriblər. Aksiyaya Bakıdan qoşulan Diasporla İş üzrə Dövlət Komitəsinin sədri Fuad Muradov iştirakçılara Ali Baş Komandanın salamlarını çatdırıb. Fransa, İtaliya, İrlandiya və bir sıra başqa ölkələrin bayraqlarının dalğalandığı tədbirdə bu ölkədəki Azərbaycan icması ilə yanaşı türk, Ukrayna, yəhudi icmalarının nümayəndələri və digərləri iştirak edib.

  • Vyananın Helden Platz meydanında icazəli aksiya

Avstriyanın Vyana şəhərindəki Azərbaycan diasporu da Vyananın Helden Platz meydanında icazəli aksiya keçirib. Aksiya iştirakçıları Ermənistan silahlı qüvvələrinin Gəncə şəhərini və digər yaşayış məntəqələrini yenidən raket atəşinə tutması nəticəsində mülki vətəndaşların, o cümlədən azyaşlı uşaqların və qadınların həlak olmasının, mülki obyektlərin dağıdılmasının vandalizm aktı olduğunu bildiriblər və dünya ictimaiyyətini Azərbaycana qarşı qərəzli mövqe tutmamağa, erməni terroruna göz yummamağa çağırıblar. “Azer Der” cəmiyyətinin təşəbbüsü ilə keçirilən aksiyada Vyanada yaşayan və fəaliyyət göstərən soydaşlarımızla yanaşı türk icmasının nümayəndələri də iştirak edib. Aksiyada çıxış edən soydaşlarımız Gəncə və Mingəçevir şəhərlərinin raket atəşinə tutulmasını pisləyib, Gəncədə onlarla mülki vətəndaşın, o cümlədən günahsız körpələrin həlak olmasından təəssüf hissi keçirdiklərini bildiriblər.

Aksiyada Azərbaycan Respublikasının Dövlət Himni ilə yanaşı Avstriyanın himni də oxunub. İştirakçılar müxtəlif dillərdə “Qarabağ Azərbaycandır!”, “Gəncə üçün dua et!”, “Erməni terrorçuluğuna son qoyun!”, “Mülki insanlar toxunulmazdır!”, “Uşaq ölümünə son qoyun!”, “Biz terrora yox deyirik”, “İşğalçı dövləti dəstəkləməyin!”, “Ermənistan - BMT qətnamələrinə əməl et!” “Ermənistana inanma”“Ermənistanın işğalına son!” “Ermənistanın təcavüzünə son” “Erməni terroruna son” şüarları səsləndiriblər.

Hannover şəhərinin “Kröpcke” meydanında baş tutan anım

Hannover azərbaycanlıları Gəncə terrorunda həlak olanların xatirəsini yad edib. Alman Azərbaycan Dostluq Cəmiyyətinin təşkilatçılığı ilə Almaniyanın Hannover şəhərinin “Kröpcke” meydanında baş tutan anım mərasimində azərbaycanlı icmanın üzvləri iştirak edib. Ermənistan silahlı qüvvələrinin dinc əhalini hədəf alması, müxtəlif şəhər və rayonlarda onlarla günahsız insanın qətlə yetirilməsi, mülki obyektlərin dağıdılması kəskin şəkildə pislənib və bu vandalizm aktı səhnələşdirilmiş formada yerli ictimaiyyətə təqdim edilib. Çıxış edənlər cəbhə bölgəsindən uzaqda yerləşən Gəncə və Mingəçevir şəhərlərinin ağır artilleriya atəşinə tutulmasının erməni vandalizminin bariz nümunəsi olduğunu qeyd edib, beynəlxalq ictimaiyyəti erməni vəhşiliyini qınamağa və ərazi bütövlüyünün bərpası istiqamətində apardığı haqlı mübarizədə Azərbaycanı dəstəkləməyə səsləyiblər.

  • “Nüfuzlu təşkilatların önündə aksiyaları daha mütəmadi keçirmək lazımdır”

Beynəlxalq Diaspor Mərkəzinin rəhbəri İsmayıl Ağayev  “Bakı-Xəbər”ə açıqlamasında bildirdi ki, Ermənistanın bu addımı terror yox, birbaşa müharibə cinayətidir: “Həmin raketlərin məhz Ermənistanın öz ərazisindən atıldığı tam sübut olunub.  Bu o anlama gəlir ki, həmin hadisəyə görə birbaşa Ermənistanın siyasi rəhbərliyi məsuliyyət daşıyır. Artıq bizim hüquq-mühafizə orqanları baş verən hadisə ilə bağlı Ermənistanın siyasi rəhbərliyinə qarşı cinayət işi açıb. Bu, perspektivdə reallaşa bilən addımdır. Amma indiki məqamda biz  törədilən bu vəhşiliyi dünya ictimaiyyətinin diqqətinə lazımi şəkildə çatdırmalıyıq. Müharibə həm də informasiya sahəsində gedir. Unutmayaq ki, biz bu istiqamətdə daha fəal olmalıyıq. Çünki sistemləşmiş və yalanı doğru kimi sırımağı bacaran erməni diasporunun təbliğat maşını ilə üz-üzəyik. Bizim fərqimiz ondadır ki, haqlı tərəfik, şərəfli müharibə aparırıq. Biz dinc əhalini hədəf almırıq. Ermənistan isə gecə evində yatan körpələri hədəfə alır, onları qətlə yetirir. Azərbaycan bu həqiqətlərin dünya ictimaiyyətinə çatdırılması istiqamətində əlindən gələni edir. Müxtəlif ölkələrdə olan diaspor təşkilatlarımızın bu işə tam dəstək verməsi çox təqdirəlayiqdir. Bunun effektini biz hiss edirik. Dünyanın bir çox KİV-ləri həmin aksiyaları işıqlandırıb. Dünya bir daha ermənilərin əsl mahiyyətilə yaxından tanış ola bilib. Təəssüflə qeyd edim ki, əlaqədar  beynəlxalq qurumlar,  nüfuzlu ölkələr bu vəhşiliyə lazımi reaksiya vermir.  Buna sanki iki tərəfin etdiyi müharibədə yaşanan hal kimi yanaşırlar. Tamamilə fərqli məsələdir. Bu, mülki insanlara qarşı törədilən müharibə cinayətidir. Belə əməllərə görə dünyada bir çox ölkə başçıları beynəlxalq tribunal tərəfindən cəzalandırılıb. Soydaşlarımız bu fəlaiyyəti davam etdirməlidir. Xüsusilə də nüfuzlu təşkilatların önündə aksiyaları daha mütəmadi keçirmək lazımdır. Bu hadisələrdə diasporumuzun göstərdiyi fəaliyyəti bəyənirəm. Yalnız Gəncə hadisələri ilə bağlı fəal deyillər. Eyni zamanda cəbhəyə yardım aksiyalarında da diasporumuz olduqca fəaldır. Bu bir daha sübut edir ki, Azərbaycan erməni işğalı ilə mübarizəni vahid orqanizm kimi  aparır”.

Azərbaycanın haqq səsinin dünyaya çatdırılmasında diasporumuz çox fəaldır. Biz onların gördüyü bütün işləri bir yazı çərçivəsinə sığışdara bilmədik. Növbəti yazılarımızda bu şərəfli işlər barədə ətraflı məlumatlar verəcəyik.

Məhəmmədəli QƏRİBLİ

Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.

Son xəbərlər