Məlum olduğu kimi, sentyabrın 29-da “Rossiya-1” telekanalında yayımlanan “60 dəqiqə” proqramında Azərbaycan-Ermənistan təmas xəttində baş verən son hadisələrə həsr olunan veriliş efirə gedib.
Verilişdə Azərbaycan Prezidenti İlham Əliyev və Ermənistanın baş naziri Nikol Paşinyan aparıcıların suallarını cavablandırıb. Verilişin aparıcıları birinci olaraq sualları Azərbaycan Prezidenti İlham Əliyevə ünvanlayıblar. İlham Əliyev bütün suallara dolğun və əhatəli cavab verib. Bu cavablar kontekstində həm də sadə dildə izah edib ki, Ermənistan cəbhədə gərginlik yaratmaq məqsədilə qəsdən təxribatlar törədir ki, Azərbaycanı günahlandırsın, prosesə 3-cü tərəfləri çəlb etməklə danışıqlar prosesini pozsun. Olduqca dəqiq izahdı. Çünki Ermənistanın bütün davranışlarında deyilən əlamətlər özünü göstərir. Prezident müsahibəsində qeyd edib ki, erməni tərəfin bu cür yalan xəbərlər yaratmaqda məqsədi bizə aydındır: “Əvvəla, öz ərazi bütövlüyünün bərpası vəzifəsini hazırda şərəflə yerinə yetirən Azərbaycan Ordusunun döyüş qabiliyyətini süni şəkildə azaltmaq, həmçinin belə təsəvvür yaratmaq ki, münaqişə genişlənir, ona üçüncü ölkələr qoşulur və beləliklə, öz təxribatına haqq qazandırmaq üçün mümkün qədər çox ölkə cəlb etməyə çalışmaq...”
Prezident daha sonra Ermənistanın deyilən istiqamətdə necə fəaliyyət göstərdiyini detallı izah edib: “Bilirsiniz, Azərbaycan danışıqlarda həmişə konstruktivlik nümayiş etdirib. Vasitəçilik missiyası üçün cavabdeh olan Minsk Qrupunun həmsədrləri də bunu təsdiq edə bilərlər. O cümlədən, son iki ildə mən dəfələrlə və başqa məsul şəxslər səviyyəsində bəyan etmişik ki, biz illər boyu işlənib hazırlanmış, Minsk Qrupunun və onun həmsədrlərinin danışıqlar prosesi üçün əsas hesab etdikləri nizamlama prinsiplərinə sadiqik. Üstəlik, son iki ildə və bundan əvvəl də dəfələrlə bəyan etmişik ki, biz danışıqların formatına da sadiqik. Danışıqlar Ermənistanla Azərbaycan arasında aparılır. Münaqişənin yalnız iki tərəfi var. Bəzən münaqişədən söhbət gedəndə bütün tərəflər haqqında danışırlar. Bu düzgün anlayış deyil. Bütün tərəflər yoxdur, yalnız iki tərəf var - Ermənistan və Azərbaycan. Lakin son illər ərzində, Ermənistandakı indiki hakimiyyətin törətdiyi Soros çevrilişindən sonra nələr baş verib? Ermənistanın baş naziri açıq-aşkar bəyan edir ki, “Qarabağ Ermənistandır və nöqtə”. Belə olan halda hansı danışıqlar prosesindən söhbət gedə bilər? Axı ATƏT-in Minsk Qrupu tərəfindən işlənib hazırlanmış prinsiplərin mahiyyəti ondan ibarətdir ki, keçmiş Dağlıq Qarabağ Muxtar Vilayəti ətrafındakı ərazilər Azərbaycana verilməlidir. Lakin Ermənistanın baş naziri deyir ki, “Qarabağ Ermənistandır” və üstəlik deyir ki, biz danışıqları Dağlıq Qarabağın oyuncaq rejimi ilə aparmalıyıq. Beləliklə, danışıqların artıq 20 ildən bəri mövcud olan formatını dəyişməyə çalışır. Deməli, Ermənistan bilərəkdən danışıqlar prosesini pozur, qəbuledilməz tələblər irəli sürür və əgər Minsk Qrupu son vaxtlar nizamlanmaya kimin əngəl olması barədə daha fəal danışmağa başlayırsa, sentyabrın 27-də, bundan əvvəl isə iyulun 12-də olduğu kimi, təxribatlar törədirlər. Bizim dövlət sərhədindəki mövqelərimizə hücum edilib. Sonra avqustun 23-də Ermənistanın təxribat qrupu tutulub, bu qrupun başçısı təmas xəttində saxlanılıb. Bütün bunlar Azərbaycanı təqsirləndirmək, sonra üçüncü tərəfləri cəlb etmək və beləliklə, danışıqlar prosesini pozmaq üçün edilir. Ona görə ki, erməni tərəfi status-kvonu saxlamaq istəyir...”
Politoloq Yeganə Hacıyeva da qəzetimizə açıqlamasında ölkə başçısının Ermənistanın təxribatlarına aydın izah verdiyini qeyd etdi: “Azərbaycan Prezidenti “Rossiya-1” telekanalına müsahibəsində Azərbaycanın çoxdan bəri israr etdiyi həqiqətləri Rusiya ictimaiyyətinə olduqca geniş şəkildə, sadə və asan dillə çatdırdı. Reallıqlar bundan ibarətdir ki, Ermənistan Dağlıq Qarabağla bağlı aparılan danışıqlar prosesini pozur. Sistemli şəkildə bu yöndə fəaliyyət göstərir. Bunun bir səbəbi daxildəki uğursuzluqları ört-basdır etməkdirsə, digərləri kənar qüvvələrin də bu konfliktə cəlb edilməsinə hesablanıb. Bununla status-kvonu olduğu kimi saxlamaq üçün zəmin formalaşdırmağa çalışır. Prezident bunu çox aydın şəkildə izah etdi. Ermənistan son günlər ərzində dayanmadan təbliğat aparır ki, güya prosesdə hansısa üçüncü qüvvə açıq müdaxilə edir. Belə bir reallıq yoxdur. Bunu da ölkə başçısı ətraflı izah etdi. Üçüncü tərəfin formalaşdırılması Ermənistanın marağına xidmət edirdi. Ermənistanın bütün addımlarında görsənir ki, üçüncü qüvvələri prosesə onların özü soxmağa çalışır. Açıq şəkildə Suriyadan və Livandan mənşəcə erməni olan terroristləri gətirib bölgəyə yerləşdirirlər. Ancaq göstərməyə çalışırlar ki, güya bunu edən Azərbaycandır. Prezidentin onların bu taktikasını tam ifşa edən çıxışı oldu. Ermənistan həm də Azərbaycanın əzəli müttəfiqi olan Türkiyənin görünməsindən narahatdır. Bu səbəbdən də bizi Türkiyə ilə birlikdə şərləmək istəyir. Azərbaycan Prezidentindən sonra Ermənistan baş nazirinin eyni telekanalda sərsəm bir çıxışı oldu. Bütün dünya Ermənistanın hansı ağılın sahibi tərəfindən idarə olunduğuna şahidlik etdi. Çox gülməli şəkildə bildirdi ki, güya Azərbaycandakı yerli əhali ilə Suriyadan gələn “muzdlular” arasında müəyyən konfliktlər yaşanır. Bu qədər fantazyorluqla adam yalnız fiaskoya uğraya bilərdi ki, buna da nail oldu”.
Prezident İlham Əliyev telekanala müsahibəsində bir daha bəyan etdi ki, münaqişədə iki tərəf var: Azərbaycan və Ermənistan. Bu baxımdan da, üçüncü tərəfin olması ilə bağlı səslənən fikirlər bir daha Paşinyanın uydurması kimi yadda qaldı.
Məhəmmədəli QƏRİBLİ
