Ermənistan ordusunda yaşanan xaos getdikcə dərinləşir və bu proses zəbt edilmiş Azərbaycan ərazilərində yerləşdirilən hərbi hissələrdə özünü daha qabarıq büruzə verir. Hətta burada hərbçilər mülki əhali üçün ciddi problemə çevrilib. Elə bu günlərdə Azərbaycanın işğal edilmiş yaşayış məntəqələrində yerləşdirilən Ermənistan silahlı qüvvələrinin bölmələrində xidmət edən hərbi qulluqçular mülki şəxsə qarşı cinayət törədib. Belə ki, Tərtər rayonunun işğal olunmuş Kiçik Qarabəy kəndində yaşayan Artuş Avakyan Ermənistan Müdafiə Nazirliyinin “qaynar xətt”inə zəng edərək, hərbi qulluqçular tərəfindən daim incidildiyini, hədə-qorxulara məruz qaldığını, eləcə də pulunun və əmlakının zorla əlindən alındığını bildirib.
Digər məlumata görə, yenə Azərbaycanın işğal edilmiş Ağdərə yaşayış məntəqəsində yerləşdirilən Ermənistan silahlı qüvvələrinin bölmələrindən birində xidmət edən hərbi qulluqçular arasında kütləvi dava baş verib. Artilleriya divizionunda xidmət edən gənc əsgərlərlə müqavilə əsasında xidmətdə olan hərbçilər arasında baş verən mübahisə sonradan davaya çevrilib. Hərbi qulluqçular Hayk Martirosyan, Aram Papikyan, Narek Torosyan, Tiqran Aseryan, Artik Musoyan müxtəlif dərəcəli bədən xəsarətləri ilə tibb məntəqəsinə yerləşdiriliblər. Komandanlıq hadisəni ört-basdır etməyə çalışıb. Lakin davada xəsarət alanlardan birinin vəzifəli qohumu bu hadisədən xəbər tutduqdan sonra hərbi hissə komandiri hərbi prokurorluğa məlumat verməyə məcbur olub. Yaranmış vəziyyətdə itkilərin də sayı artır. Yerli medianın yazdığına görə, təkcə cəbhə zonasında bu ilin ötən dövrü ərzində 30-dan çox erməni həyatını itirib. Onların bir çoxu qeyri-döyüş şəraitində ölüb. Qeyd olunur ki, Ermənistan silahlı qüvvələrində bu məqam, hətta hüquq-mühafizə sistemində ciddi narahatlıqlar doğurur. Belə vəziyyətdə valideynlər yenə övladalrını hərbi xidmətdən yayındırır. Elə bunun nəticəsidir ki, orduda əsgər çatışmazlığı problemini Ermənistan rəhbərliyi könüllülər hesabına həll etmək istəyir.
Xatırladaq ki, bu günlərdə Ermənistanda "Müdafiə haqqında” qanuna dəyişikliklər ictimai müzakirəyə çıxarılıb. Dəyişikliklərə əsasən, ölkədə hərbi könüllü dəstələrin yaradılması nəzərdə tutulur. Amma erməni mediası etiraf edir ki, könüllü dəstələrin hesabına da orduda yaranan problemi çözmək mümkün olmayacaq. Orduda isə əsgər çatışmazlığı kəskinləşir. Xüsusən də o baxımdan ki, orduda yaranan xaos səbəbindən gənclərin silahlı qüvvələrdə xidmətdən yayınması adi xarakter daşıyır. Belə vəziyyətdə ordudan yayınanların sayının artması bu xüsusda qaldırılan cinayət işlərinin də sayını çoxaldır. Artıq bu vəziyyət hökuməti ciddi narahat edir. Belə qəbildən olan cinayət işlərinin sayının azaldılması üçün isə yeni cəhdlər edilir. Elə buna görədir ki, Ermənistan parlamenti 2018-ci ilədək 27 yaşı tamam olan və hərbi xidmətdən yayınan vətəndaşların müvafiq cərimə ödədikləri halda cinayət məsuliyyətindən azad edilməsi barədə qanunu qəbul etməyə tələsir. Hazırda Ermənistanda hərbi xidmətdən yayınan gənclərin sayının 12 mindən çox olduğu bildirilir. “Politik.am” nəşri yazır ki, bu halda Ermənistanın hakim komandasının üzvü Vahaqn Tevosyan ordudan yayınanların pul qarşılığında cinayət məsuliyyətindən azad olmasına imkan verən yeni bir qanun layihəsini niyə qəbul edəcəklərini əsaslandırmağa çalışıb: “Tevosyan, həmişə olduğu kimi, vəziyyəti rəngarəng təsvir edib: “Orduda xidmət etmək şərəf olmalıdır. Ən azı ilk başlanğıcda belə hesab olunmalıdır. Bu qavrayışı kök saldırmaqla ordunu nümunəvi şəkildə inkişaf etdirmək də mümkün olacaq. Yəni başı xarab olan şəxs orduya gedə bilməməlidir. İctimaiyyət başa düşməlidir ki, orduya getməyən bir insan elmlə məşğul olmursa, xəstə deyilsə, qanun ona icazə vermirsə, istəsə də xidmət etməyi bacarmırsa, bu insan adi başıxarab və ya qorxaqdır. Yalnız bundan sonra ordudan “uçmaq” təəccüblü və məntiqsiz olacaq. Əgər ordudan uçmusansa (qanunla azad edilməmisən, şərtlərə görə gec gəlməmisən, ya uzaq düşməmisən, məhz uçmusan) o halda ordunun sənə nə ehtiyacı var?”. Tevosyan bununla, əslində təmsil etdiyi hökuməti necə rəvan təsvir etdiyinin fərqinə varmayıb. Demək olar ki, o, təmsil etdiyi elitanın elmlə məşğul olmadığı və ya sağlamlıq problemi olmadan orduda xidmət etmədiyini, özünün isə tərif etdiyi şərtlər çərçivəsinə sığmayan hökuməti təmsil etdiyini bir anlığa unudub. Tevosyanın verdiyi tərifə əsaslansaq, əsas “başıxarab”ın Paşinyan olduğu ortaya çıxacaq. Hərbi xidmətdən elm və ya sağlamlıq problemləri səbəbindən (rəsmi olaraq Paşinyanın bir problemi yoxdur) yox, sadəcə böyük qardaşları Sovet ordusunda xidmət etdiyi üçün azad edilib. Başqa sözlə, Paşinyan xidmətdən yayınmaq üçün qardaşlarının SSRİ ordusunda xidmət etməsindən istifadə edib. Bu, dövlət üçün ən çətin illərdə, müharibənin yenicə bitdiyi və sərhədləri möhkəmləndirmək problemi olduğu bir dövrdə baş verib. Əslində, Ermənistan kimi çətin problemləri olan ölkələrdə orduda xidmət etməmək tərcümeyi-halda şərəfli bir məqam olmamalı və xidmət etməyənlərin yüksək dövlət vəzifələrində çalışmaq hüququ olmamalıdır. Dövləti naminə həyatını risqə atmayan bir şəxsin bu dövlətin başında, sükanı arxasında olmaq hüququ olmamalıdır. Yarımmüharibə vəziyyətində olan dövlətin başında “başıxarab” olmamalıdır, bunlar təhlükəsizlik üçün təhlükəlidir”.
Samirə SƏFƏROVA
