Bir neçə gün əvvəl Goranboy rayonu istiqamətində təmas xəttində Ermənistan silahlı qüvvələrinin diversiya-kəşfiyyat qrupunun təxribat törətməyə cəhd etdiyi məlumdur.
Azərbaycan silahlı qüvvələrinin bölmələri tərəfindən görülən qəti tədbirlər nəticəsində təxribatın qarşısı alınıb, təxribat qrupunun rəhbəri, Ermənistan silahlı qüvvələrinin baş leytenantı Qurgen Alaverdyan zərərsizləşdirilib. Hazırda ölkəmizdə saxlanan düşmən təxribatçısı ilə bağlı məsələ erməniləri bərk narahat edir. Tovuz cəbhəsindən sonra Goranboyda da təxribat törətməkdə iddialı olan ermənilərin bu planları da alt-üst olduğundan, baş verənlərdən ciddi əndişə keçirirlər, hansı yolla olursa-olsun, Alaverdyanı qaytarmaq istəyirlər.
Qeyd edək ki, bu günlərdə Xankəndidə “Qırmızı Xaç”ın nümayəndəsinin iştirakı ilə hərbi əsirlər və girovların işi üzrə komissiyanın iclası keçirilib və bildirilib ki, tezliklə müsbət irəliləyiş olacaq. Erməni KİV-nin yazdığına görə, oranın rəhbəri İrəvanın nə deməsindən asılı olmayaraq, hamının hamıya prinsipi ilə girovların dəyişdirilməsinə razıdır. Ola bilərmi ki, bu, son ələ keçən diversantla bağlıdır? Həmin adamın ermənilər üçün önəmli olması onları bu addımı atmağa vadar edir?
“Bu həm də ermənilərin mövqeyinin zəiflədiyini göstərir ki...”
Qarabağ Azadlıq Təşkilatının (QAT) sədri Akif Nağı baki-xeber.com-a bildirdi ki, bu məsələ ilə bağlı ermənilərin mövqeyi doğrudan da maraq doğurur. A.Nağı vurğuladı ki, Dağlıq Qarabağda yaradılan qondarma rejim sərbəst bir rejim deyil və o, Ermənistan tərəfindən yaradılıb və idarə oilunur. “Ona görə də qondarma “DQR”in adından bütün qərarları rəsmi İrəvan verir. Rusiya ilə Ermənistan arasında son günlər gərginlik var. Dağlıq Qarabağdakı qondarma rejim isə Rusiyaya bağlıdır və Rusiya da həmişə öz adamlarını ora təyin edir. Ehtimal edirəm ki, bu, Rusiyanın xəttidir. Çünki Rusiya dəfələrlə bildirib ki, hamının hamıya dəyişdirilməsi prinsipinin tərəfdarıdır. Ola bilər ki, bu şəkildədir. Ola bilər ki, Ermənistan müəyyən mənada həm məsuliyyətdən kənara çəkilir, həm də Dağlıq Qarabağdakı qondarma rejimin “önəmini, əhəmiyyətini” qabartmaq istəyir ki, onlar hətta “müstəqil qərar qəbul” edə bilirlər. Amma, istənilən halda, hesab edirəm ki, hamının hamıya prinsipi ilə girovlarin dəyişdirilməsi fikri işğalçı Ermənistanın qərarıdır. O bunu Dağlıq Qarabağdakı qondarma rejimin adı ilə ortaya qoyur. Bunun səbəbi də son tutulan erməni diversantı ilə bağlıdır. Bu diversant zabitdir və ehtimal olunur ki, o, orada kiminsə yaxın adamıdır, yaxud Ermənistan üçün onun başqa əhəmiyyəti var. Ona görə də onlar belə mövqedən çıxış edirlər. Amma, istənilən halda, hesab edirəm ki, ermənilər ortaya belə mövqe qoyurlarsa, bunu erməni girovluğunda olan əsirlərimiz Şahbaz və Dilqəm üçün də müsbət bir tendensiya kimi qiymətləndirməliyik. Eyni zamanda, Azərbaycan və Ermənistan arasındakı münasibətlərdə də müsbət bir nöqtə kimi dəyərləndirə bilərik”.
A.Nağının sözlərinə görə, Ermənistan çox təkidlə öz mövqeyində qalırdı ki, Dilqəm Əsgərov və Şahbaz Quliyev heç bir halda dəyişdirilə bilməz və sair. “Bu həm də ermənilərin mövqeyinin zəiflədiyini göstərir ki, Azərbaycanın mövqeyi qarşısında geri çəkilirlər. Eyni zamanda, bunu, bütövlükdə, Azərbaycanın mövqeyinin güclənməsi kimi dəyərləndirirəm və bu da Azərbaycan-Türkiyə hərbi əməkdaşlığının aydın şəkildə ortaya gəlməsi ilə bağlıdır” - deyə qeyd edən A.Nağının bildirdiyinə görə, bu gün Rusiyada da müəyyən ekspertlər çıxışlar edir, türk və islam dünyası ilə yaxınlaşmadan danışırlar, Türkiyənin Azərbaycanla, Rusiya ilə münasibətlərinin müsbət olmasının dəyərini qabardırlar. A.Nağının fikrincə, Türkiyənin regionda və dünyada mövqeyinin güclənməsi də bu kimi məsələlərə təsir edən amillərdəndir.
İradə SARIYEVA
