Ermənistanda koronavirusla bağlı yaranmış vəziyyət bu ölkədə artıq xaotik bir durumun formalaşmaqda olduğunu göstərir. Elə bu fonda Nikol Paşinyan iqtidarına qarşı da narazılıqlar sürətlə artır. Hətta bəzi ekspertlər bu gedişlə Paşinyana qarşı koronavirus inqilabı ola biləcəyini də istisna etmir.
Məlumatlara görə isə, Ermənistanda koronavirus aşkar edilən insanların sayı artır. Hazırda Ermənistanda COVID-19 virusuna yoluxanların ümumi sayı 44 minə yaxınlaşır. Ermənistan Səhiyyə Nazirliyinin Xəstəliklərə Nəzarət və Onların Profilaktikası Milli Mərkəzi bildirir ki, ölkədə pandemiya qurbanlarının sayı 900-ə çatmaq üzrədir. Özü də bu, sırf koronavirusdan ölənlərin sayıdır. Eyni zamanda, bu ölkədə başqa səbəblərdən ölən koronavirus xəstələrinin sayı da artmaqda davam edir. İki mindən artıq belə xəstə dünyasını dəyişib. Onu da qeyd edək ki, Ermənistan 1 milyon nəfərin hesablanması ilə koronavirusa yoluxma və xəstəlikdən ölüm göstəricilərinə görə bölgədə lider olmağa davam edir. İndi Ermənistanda 1 milyon əhalinin hesablanması ilə koronavirusa yoluxma göstəcisi 14500 nəfər, ölüm göstəricisi isə 290 nəfər təşkil edir. Bununla Ermənistan 1 milyon əhalinin hesablanması ilə koronavirusa yoluxma göstəricisinə görə dünyada 13-cü yeri tutub və bu da ən pis göstəricilərdən sayılır. Ötən ay Ermənistan bu göstəriciyə görə 21-ci yerdə idi. Amma məlum göstərici mənfi istiqamətdə dəyişir. “Vahid Ermənistan” partiyasının həmtəsisçisi Vladimir Martirosyan yaranmış vəziyyətlə bağlı qeyd edir: “Təxminən beş ay əvvəl qeyd etmişdim ki, epidemiya populist hakimiyyət üçün ilk növbədə siyasi mənada birinci düşmən olacaq. Bu fərziyyə üçün sonradan reallığa çevrilən bir çox əsaslar var idi. Koronavirus epidemiyası bütün dünyanı ciddi problemlər qarşısında qoydu, Ermənistan onlardan kənar qalmadı və qala da bilməzdi. Epidemiyaya qarşı mübarizə göstəriciləri birabırçı və faciəvidir, hakimiyyət isə öz bədnam iş üslubunu hadisələrin gedişatında izləməyə davam edir. Proseslər xaiosa doğru gedir”. Bu halda erməniləri narazı salan məqamlardan biri səhiyyə naziri Arsen Torosyanın məzuniyyətə getməsidir. Hesab edilir ki, nazir əhalini koronavirusla baş-başa qoyaraq qaçıb və bu səbəbdən dərhal istefa verməlidir. Ermənistanın keçmiş fövqəladə hallar naziri Hraçya Rostomyan bu xüsusda qeyd edir: “Ermənistanın hazırkı hakimiyyəti ölkənin milli təhlükəsizliyi üçün problemə çevrilir. Arsen Torosyanın ətrafında inkişaf edən prosesin nə ilə bitəcəyini bilmirəm. Bir şey aydındır ki, koronavirus reallığında səhiyyə nazirinin məzuniyyəti təəccüblüdür: bu, müharibə zamanı komandirin qoşunu başsız buraxaraq cəbhə xəttini tərk etməsi ilə eyni şeydir. Nikol Paşinyanın təlimat və qərarları hakimiyyətin orta və aşağı halqalarına çatmayaraq “hava”da qalır”. Elə “Joxorvurd” nəşri də yazır ki, nazir müharibə şəraitində ölkəni qoyub qaçıb:“Koronavirus Ermənistana müharibə elan edib. Bənzər açıqlamanı hələ iyunun 5-də Ermənistanın birinci prezidenti Levon Ter-Petrosyan verib və əlavə edib:“Müharibə aparmağın yükü hakimiyyətin çiyinlərinə düşüb. Kim hakimiyyətə qarşı mübarizə aparırsa, istər-istəməz millətə xəyanət edir”. Bu halda ya səhiyyə naziri Arsen Torosyan müharibə vəziyyətində fərarilik adlanan məsuliyyətdən yayınır (bu, müharibə vəziyyətində müdafiə naziri David Tonoyanın məzuniyyətə getməsi ilə eyni şeydir), ya da sonuncu hansısa səbəblərə görə məzuniyyətə getməyə məcbur olub. Bəlkə də Arsen Torosyan döyüş sahəsindən qaçmağın nəticələrini bilmir, çünki orduda xidmət etməyib”.
Ermənistan parlamentinin keçmiş deputatı Samvel Farmanyan da hesab edir ki, koronavirus həqiqətən Ermənistana müharibə elan edib. O qeyd edib ki, müharibəni aparmaq yükü hakimiyyətin çiyinlərinə düşüb: “Burada baş nazir “ali baş komandan”, səhiyyə naziri isə faktiki “qərargah rəisi-qoşunların komandiridir”. Kim müharibə zamanı “qərargah rəisi-qoşunların komandirini” məzuniyyətə göndərirsə, o ya müharibəni qəsdən məğlubiyyətə aparır, ya da artıq məğlub olduğu müharibənin məsuliyyətini sonuncunun üzərinə atmaq istəyir. Bu, hələ davam edən müharibə halında nəinki dəlilikdir, heç bir əsaslandırmaya malik deyil, həmçinin adi xəyanətdir”. Hesab edilir ki, məhz bu xəyanət səbəbindən Paşinyan iqtidarı cavab verməlidir. “İravnuk” qəzeti isə qeyd edir ki, koronavirusla bağlı vəziyyət pisləşməkdə davam etsə, Paşinyan hakimiyyəti daha ciddi problemlər yaşayacaq:“Koronavirus Ermənistan hakimiyyəti daxilində böyük təşviş yaradıb. Hakimiyyətin bütün iqtisadi və siyasi planları məhv olmaq ərəfəsindədir. Narahatlığa əsas səbəb koronavirusun qarşısının alınmasında yaşanan acizlikdir. Bu, Paşinyanın azalan nüfuzuna növbəti zərbədir. Çünki baş verənlər hazırkı hakimiyyətin böhran şəraitində ölkəni idarə etmək üçün hansı dərəcədə hazırlıqlı olduğunu göstərir”. “168 jam” qəzeti də vəziyyətin acınacaqlı olduğunu qeyd edir: “Ermənistanda fövqəladə vəziyyət rejimi martın 16-dan tətbiq edilib və beş dəfə müddəti uzadılıb. Sonuncu uzatmadan sonra rejim sentyabrın 11-ə qədər davam etməlidir. Amma vəziyyət getdikcə pisləşir”.
Samirə SƏFƏROVA
