“Bəzi diplomatlar dövlətə xəyanət ediblər, satqınlıq ediblər və bunu gizlətmirlər”. Bunu Prezident İlham Əliyev Ceyhun Bayramovu Xarici işlər naziri təyin olunması ilə əlaqədar videoformatda qəbul edən zaman deyib.
Ölkə başçısının sözlərinə görə, biz bütün ölkələrlə normal dostluq və tərəfdaşlıq münasibətlərinin formalaşmasında əməli addımlar atırıq:“Amma bu o demək deyil ki, öz ölkənin, öz xalqının maraqları kənarda qalsın. Bizim xaricdəki bəzi diplomatlarımız fəaliyyət göstərdikləri ölkələrin elçilərinə çevrilirlər. Buna son qoyulmalıdır. Bu da yanlış kadr siyasətinin təzahürüdür. Bəzi diplomatlar dövlətə xəyanət ediblər, satqınlıq ediblər və bunu gizlətmirlər. Yaşadıqları ölkələrin xüsusi xidmət orqanlarının nəzarətindədirlər. Bizdə kifayət qədər məlumatlar var. Bu gün Azərbaycana qarşı çirkin kampaniya aparan, özünü azərbaycanlı kimi təqdim edən, əslində ermənilərdən də pis olan ünsürlərin mütləq əksəriyyəti yaşadıqları ölkələrin xüsusi xidmət orqanlarının nəzarətindədir. Onlardan pul və təlimatlar alırlar. Bizdə bu məsələ ilə bağlı kifayət qədər məlumatlar var. Bizim xüsusi xidmət orqanlarımız tərəfdaş ölkələrin xüsusi xidmət orqanlarına dəfələrlə bu haqda məlumatlar vermişlər. Demişlər ki, biz bilirik, filan adamı siz istiqamətləndirirsiz, filan adama siz ev vermisiniz, filan adamın çirkin çıxışları sizin idarənizdə yazılır. Biz bütün bunları bilirik”.
Prezident onu da qeyd edib ki, bizim diplomatiyamız hücum diplomatiyası olmalıdır, milli maraqlar tam təmin edilməlidir:“Ancaq bir çox hallarda bunun əksini görürük. Görürük ki, razılaşma prinsipi əsas tutulur, milli maraqları kənara qoyub kiminsə xoşuna gəlmək üçün səylər göstərilir. Bu haqda bir çox məlumatlarım var. Ona görə siz bu məsələləri nəzərdə saxlayın”.
Prezidentin məlum fikirləri göstərir ki, bizim xarici siyasətimizdə çox ağır problemlər olub: diplomatların satqınlığı, bəzi dövlətlərlə soyuq münasibət və s. Bütün bunlar Qarabağ probleminin həllində Azərbaycana hansı ziyanlar vurub?
“Nəticəsiz danışıqlarda bu amilin də payı var”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu:“Xarici İşlər Nazirliyinin fəaliyyətisizliyi dövlət başçısı İlham Əliyev tərəfindən obyektiv olaraq tənqid edildi. Həqiqətən də sabiq XİN rəhbəri Elmar Məmmədyarov müasir siyasi çağırışlara cavab vermirdi. Ermənistanla danışıqlarda koronovirusu müzakirə etdiyi yayılan məlumatda vurğulanırdı. Bu qədər absurd bir mövqeyə malik idi. Onu son illərdə əsas qayğılandıran, görünür, öz şəxsi əmlakını artırmaq olub. Bəlkə Məmmədyarova Ermənistan vəzifədaşı Sevan gölünün sahilində villa tikməsinə şərait yaradıb? Çünki o, Ermənistana çox loyal münasibət sərgiləyirdi. Məhz onun əlaqələri yoxlanmalıdır. Prezident İlham Əliyev xarici konsulluqlar və diplomatlarla bağlı çox ciddi şəkildə danışdı. Hesab edirəm ki, onların fəaliyyəti də yoxlanmalıdır. Mən daima XİN-lə bağlı şərhlərimdə E.Məmmədyarovun fəaliyyəti prezidentin siyasəti ilə uzlaşmadığına görə istefa verməli olduğunu qeyd etmişəm. Onun fəaliyyəti Qarabağ məsələsində diplomatik savaşda daha da inkişaf edə bilərdi. Ancaq bu olmadı. XİN-in fəaliyyətində olan qüsurlar bütün mənalarda Qarabağ münaqişəsinin həllinə ziyan vurdu. Bütün bunlar bir-biri ilə sıx bağlıdır. Nəticəsiz danışıqlarda bu amilin də payı var. Göründüyü kimi, E.Məmmədyarov yalnız şəxsi işləri ilə məşğul olub. Xarici konsulluq və səfirliklər də yoxlanmalıdır. Çünki prezident əsaslı məlumata malikdir ki, xarici xüsusi xidmət orqanları ilə diplomatların əməkdaşlıq mümkünlüyünü dilə gətirdi. Hesab edirəm ki, artıq bu sahə sağlamlaşdırılacaq. Dövlətin bu sahədə fəaliyyəti inkişaf edəcək”.
Belə məlum olur ki, XİN sistemindəki nöqsanlar Qarabağ münaqişəsinin tənzimlənməsinə də mənfi mənada təsirsiz ötüşməyib.
Vidadi ORDAHALLI
