Azərbaycan-Ermənistan sərhədində düşmən tərəfinin hələ də bitməyən təxribatlarına qarşı ən sərt mövqe sərgiləyən ölkələrdən biri qardaş Türkiyə oldu. Məlum hadisələr başlayandan dərhal sonra Türkiyə ən yüksək səviyyədə Azərbaycanın yanında olduğunu, Ermənistanın təxribatını şiddətlə qınadığını bəyan etdi. Eyni zamanda, Ankara istənilən istiqamət üzrə Azərbaycana kömək etməyə hazır olduğunu da vurğuladı.
Azərbaycanın Türkiyədəki səfiri Xəzər İbrahim isə qeyd edir ki, hələ də Türkiyənin hər yerindən Azərbaycanın Türkiyədəki səfirliyinin qarşısına ölkəmizi dəstəkləmək üçün gəlirlər. Onun sözlərinə görə, bu fonda iki ölkə arasında əməkdaşlığın daha da dərinləşdirilməsi vacibdir:"Son günlər Ermənistanın Azərbaycanla sərhəddə təxribatı göstərdi ki, iki ölkə arasında ənənəvi iqtisadi sahələrlə yanaşı, müasir sahələrdə də əməkdaşlığımızı artırmalıyıq. Mən müdafiə sənayesi sahəsində olan əməkdaşlığımızı nəzərdə tuturam. İki ölkənin müdafiə sənayesi sahəsində çox sıx əməkdaşlığı var və biz bu əməkdaşlığı daha da genişləndirməliyik”. Bunlar fonunda daha bir mühüm məqam Türkiyə Silahlı Qüvvələrinə məxsus pilotsuz uçuş aparatlarının (PUA) Türkiyə-Ermənistan sərhədində nəzarət uçuşları həyata keçirməsi oldu. Nəzarət uçuşlarına, adi PUA-larla yanaşı, silahlı PUA-lar da qatılıb. Daha sonra isə uçuşlara F-16 qırıcıları qoşulub. Erməni mediası yazır ki, Türkiyə bununla İrəvana açıq xəbərdarlıq edir. Məsələ ilə bağlı “politik.am” portalı yazır:“Türkiyə sərhəd toqquşmalarından dərhal sonra da Azərbaycanın yanında olduğunu bildirdi, sərhələrimizdə güc nümayiş etdirdi. Ankaranın Bakıya yardım üçün ictimaiyyətə açıqlanmayan yenı addımlar atması da istisna deyil. Ermənistana isə hələ də hansısa yardım edən ölkə yoxdur”.
Erməni tərəfini narahat edən daha bir məqam Türkiyənin müdafiə naziri Hulusi Akarla Azərbaycanın müdafiə nazirinin müavini, Hərbi Hava Qüvvələrinin komandanı Ramiz Tahirovun görüşüdür. Görüşün sərhəd toqquşmaları vaxtına təsadüf etməsi və Hulusi Akarın verdiyi açıqlamalar düşmən ölkənin narahatlığını daha da artırıb. Ermənistanın Azərbaycanla sərhədinin Tovuz rayonu istiqamətində 12 iyuldan etibarən həyata keçirdiyi təxribat haqqında danışan türk nazir bildirib ki, Dağlıq Qarabağ heç bir hüquqi səbəb olmadan və qanunazidd şəkildə işğal olunub, bu, Türkiyə üçün qəbuledilməzdir:“Qəbul etməyimizin mümkün olmadığını hər platformada söylədik, söyləməyə də davam edəcəyik. Bu mövzuda azərbaycanlı qardaşlarımızın, igid insanların verəcəyi bütün mücadilələrdə onlarla birgə olduğumuzu, cənab prezidentimiz başda olmaqla, Türkiyədə hərbi və mülki hər kəs ifadə edir, bütün xalqımız bu duyğu və düşüncəni paylaşır. Buna bütün qəlbimizlə inanırıq ki, biz iki dövlət, bir millətik. Dilimiz, dinimiz, tariximiz, anlayışımız birdir, bərabərdir. Kədərdə və qürurda birlikdəyik. Cənab prezidentimizin ilk andan etibarən ifadə etdiyi kimi, bu həqiqətən də, ermənilərin boyundan böyük təşəbbüsdür”. Nazir vurğulayıb ki, Türkiyə Respublikası və Türkiyə Silahlı Qüvvələri əlindən gələn nə varsa, etməyə davam edəcək: “Bundan kimsənin şübhəsi olmasın!”. Nazir qeyd edib ki, Ermənistan törətdiyi təxribatla həddini aşıb: “Tovuza edilən hücumlarla bağlı hansı addımın atılması lazımdırsa, onu edəcəyik. Azərbaycanın ağrıları, bizim ağrılarımızdır. Orada yaşanan hər bir sıxıntı bura da öz təsirini göstərir. Bunu hamınızın bilməsini istərdim. Dağlıq Qarabağın işğalını, bu qanunsuzluğu qəbul etməyimizin mümkün olmadığını bildirmişik. Bir millət, iki dövlətik, dilimiz, dinimiz, tariximiz, anlayışımız birdir. Biz Türkiyə dövləti və Türkiyə Silahlı Qüvvələri olaraq nə etməyimiz lazımdırsa edəcəyik, bu günə qədər necə dəstək vermişiksə, yenə də buna davam edəcəyik”.
Ermənistanın Xarici İşlər Nazirliyi isə Ankaranın belə bir mövqe sərgiləməsinin qəbuledilməz olduğunu bildirir. Buna da Türkiyə Xarici İşlər Nazirliyi bəyanat yayaraq sərt cavab verib:“Ermənistan hakimiyyəti ağlını başına toplamalı və Cənubi Qafqazda problemlərin deyil, həlli yollarının bir parçası olmağı tez zamanda öyrənməlidir”. Bəyanatda Ermənistanın Azərbaycana qarşı təcavüzkar siyasətini ört-basdır etmək üçün Türkiyə əleyhinə riyakar qaralama kampaniyası aparmağa cəhd göstərdiyi bildirilib: “Azərbaycan torpaqlarında illərdir qanunsuz işğal aparan Ermənistanın bu ikiüzlü davranışı Cənubi Qafqazda daimi sülh və sabitliyin təmin olunmasının qarşısındakı əsl əngəlin kim olduğunu açıq-aydın şəkildə ortaya qoymaqdadır”. Eləcə də bəyanatda məzmununa aidiyyəti olmayan ittiham və böhtanlarla xarici siyasət yürütməyin nə bölgəyə, nə də Ermənistana fayda verdiyi vurğulanıb:“Bu mövqe şəxsiyyətini təktərəfli tarix anlayışından sadəcə düşmənçilik çıxararaq yaradan və beynəlxalq hüquqa zidd təcavüzünü qanuniləşdirməyə çalışan bir zehniyyətin təzahürüdür. Təcavüzkar millətçiliyi alovlandıran bu şikəst münasibət kədərlidir, lakin təəccüblü deyil”. Bu arada, Türkiyə Böyük Millət Məclisi Ermənistanın Azərbaycanın Tovuz rayonu istiqamətindən ölkəmizə hücum cəhdləri ilə bağlı açıqlama yayıb. Sənəd parlamentdə təmsil olunan hakim Ədalət və İnkişaf Partiyası (AKP), Cümhuriyyət Xalq Partiyası (ÇHP), Milliyyətçi Hərəkat Partiyası (MHP) və İYİ Partiya tərəfindən qəbul edilib.
Açıqlamada iyulun 12-dən etibarən Ermənistanın Azərbaycanın Tovuz rayonu istiqamətindən ölkəmizə hücum cəhdləri kəskin şəkildə pislənir. Diqqətə çatdırılır ki, Ermənistan təhlükəli yoldadır:“İllərdən bəri Dağlıq Qarabağ və ətraf rayonları işğal altında saxlayan Ermənistan yeni hücumları ilə Cənubi Qafqazda uzunmüddətli sülhə və sabitliyə ən böyük maneədir. Beynəlxalq ictimaiyyəti haqq və hüquqları heçə sayan Ermənistanın bu davranışına təpki göstərməyə çağırırıq. Dağlıq Qarabağ münaqişəsinin Azərbaycanın beynəlxalq səviyyədə tanınan sərhədlərinin və ərazi bütövlüyünün qorunması çərçivəsində sülh yolu ilə həllini dəstəklədiyimizi təkrarlayırıq. Ermənistan BMT Təhlükəsizlik Şurası və ATƏT-in Minsk Qrupunun qərar və qətnamələrinə əməl edərək işğal altında saxladığı Azərbaycan ərazilərini tərk etməlidir.
“Bir millət, iki dövlət” anlayışı ilə daim sabitlik və firavanlığın müdafiəçisi olan Türkiyə bundan sonra da bütün imkanları ilə ərazi bütövlüyünü bərpa etmək mübarizəsində Azərbaycanın yanında yer almaqda davam edəcək. Azərbaycanlı şəhidlərimiz üçün dost və qardaş Azərbaycan xalqına və hökumətinə başsağlığı, yaralılara tezliklə şəfa tapmaq diləyirik”.
Bütün bunlar göstərir ki, Türkiyə həm hərbi-siyasi, həm də diplomatik müstəvidə Ermənistana kifayət qədər sərt cavablar verir.
Nahid SALAYEV
