08/08/2020 12:41
728 x 90

Azərbaycan ordusunun Tovuzda Ermənistana qarşı iki fazalı qisas əməliyyatı...

Üzeyir Cəfərov: “Onların təxribatları hansı fazalarda olubsa, biz də buna adekvat cavabı vermişik”

img

Prezident İlham Əliyev iyulun 15-də Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı nitqində  Ermənistanın Tovuz istiqamətindəki təxribatlarından danışıb. İlham Əliyev deyib ki, bu çirkin əməldən sonra onun göstərişi ilə qisas əməliyyatının ikinci fazası başlanıb:

"Bildirməliyəm ki, bu çirkin əməldən sonra mənim göstərişimlə qisas əməliyyatının ikinci fazası başlamışdır. Son iki gün ərzində düşmənə növbəti dəfə sarsıdıcı zərbələr endirildi. Bizdə olan məlumata görə, onlarla erməni hərbçi məhv edildi, onların sərhədboyu yerləşən dayaq məntəqələrinin böyük hissəsi darmadağın edildi. O cümlədən, onların bəhanə kimi gətirdiyi məlum postun da bütün infrastrukturu darmadağın edildi, bu post artıq mövcud deyil. Düşmənin texnikası, silah-sursat anbarları, dayaq məntəqələri, avtomaşınlar, sisternlər, canlı qüvvənin yerləşdiyi yerlər Azərbaycan Ordusu tərəfindən dəqiq və sərrast atəşlə məhv edilmişdir. Əməliyyat haqqında bundan artıq demək istəməzdim. Çünki bu, hərbi sirdir, məxfi xarakter daşıyır. Ancaq biz bəzi videogörüntüləri paylaşdıq. Bu videogörüntülər Azərbaycan Ordusu tərəfindən keçirilmiş əməliyyatların cüzi bir hissəsidir. Nə mümkün olubsa, onu göstərmişik, hesab edirəm ki, indiki mərhələdə bundan artıq informasiya vermək düzgün olmazdı. Ancaq bu videosüjetlər açıq-aydın göstərir ki, düşmənin infrastrukturu, canlı qüvvəsi, səngərləri, postları, dayaq məntəqələri nə qədər dəqiqliklə məhv edilir”.

Göründüyü kimi, ölkə başçısı bir neçə fazalı qisas əməliyyatlarının olduğuna işarə edib. Bu fazaların nədən ibarət olması ilə bağlı hərbi ekspertlərin fikirlərini öyrənmək qərarına gəldik. Hərbi ekspert, ehtiyatda olan polkovnik-leytenant Üzeyir Cəfərov “Bakı-Xəbər”ə açıqlamasında bildirdi ki, bu mövzu ilə bağlı detallı danışmağa lüzum görmür: “Ölkə başçısı bəzi detallara toxunur. Düşünürəm ki, bununla bağlı rəsmi qurumlar detallı açıqlama versələr daha yaxşı olar. Təbii ki, zərurət yaranarsa. Görürsünüz ki, ölkə başçısı da nitqində bir neçə dəfə bəzi detalların hərbi sirr olduğunu dilə gətirir və geniş açıqlamanın verilməsinin zəruri olmadığını qeyd edir. Mənim anladığım ondan ibarətdir ki, ordumuz Ermənistanın atdığı addımlara layiqli cavab verib. Onların təxribatları hansı fazalarda olubsa, biz də buna adekvat cavabı vermişik. Bizim Ermənistanın hərəkətləri ilə bağlı ciddi niyyətlərimiz olmayıb. Onlar ağır silahlardan istifadə etməyə başladılar. Sonra hədəf kimi bizim yaşayış məntəqələrimizi seçdilər. Artıq ortada faktlar var ki, mülki əhaliyə hansı ziyanlar dəyib, hətta onların sırasında ölənlər də olub. Bunun cavabı nə olmalıydı?  Biz də adekvat cavabı vermişik. Detalları çox xırdalamaq istəmirəm. Elə  məlumatlar var ki, onlar mətbuata çıxmasa yaxşıdır. Hər halda, bizim üçün həmin istiqamətlə bağlı ciddi narahatedici məqam yoxdur. Ordumuz möhkəm dayanıb. Yeganə naratedici məqam budur ki, ermənilər atəşkəsi yenə pozublar. Yəqin ki, daha müfəssəl məlumatları Müdafiə Nazirliyi gün ərzində çatdıracaq. Düşmənin xain zərbələri nəticəsində mülki əhaliyə və yaşayış obyektlərinə ciddi ziyan dəyir. Təbiidir ki, biz düşmənə lazımi cavabı veririk. Müdafiə Nazirliyi bəzi məlumatları açıqlayandan sonra daha ətraflı şərhlər vermək olacaq. Ölkə başçısının çıxışından bir daha göründü ki, proseslər tam nəzarətdədir və dövlətimiz hər bir təxribata lazımi reaksiyanı verməyə qadirdir”.

Ermənilərin tələfatlarla bağlı informasiyanı gizli saxlamasından görünür ki. Azərbaycan ordusu onların heç bir təxribat addımını cavabsız qoymayıb. Onların sosial şəbəkə seqmentində yayılan məlumatlardan görünür ki, ordumuzdan layiq olduqları cavabları alıblar.

Məhəmmədəli QƏRİBLİ

Son xəbərlər