Natiq Məmmədli: “Ermənistanın daxili siyasi gərginlikdən diqqəti yayındırmaq üçün elədiyi belə “ənənəvi” təxribatların limiti artıq tükənmək üzrədir”
“…Bildirməliyəm ki, bu çirkin əməldən sonra mənim göstərişimlə qisas əməliyyatının ikinci fazası başlamışdır. Son iki gün ərzində düşmənə növbəti dəfə sarsıdıcı zərbələr endirildi. Bizdə olan məlumata görə, onlarla erməni hərbçi məhv edildi, onların sərhədboyu yerləşən dayaq məntəqələrinin böyük hissəsi darmadağın edildi. O cümlədən onların bəhanə kimi gətirdiyi məlum postun da bütün infrastrukturu darmadağın edildi, bu post artıq mövcud deyil. Düşmənin texnikası, silah-sursat anbarları, dayaq məntəqələri, avtomaşınlar, sisternlər, canlı qüvvənin yerləşdiyi yerlər Azərbaycan Ordusu tərəfindən dəqiq və sərrast atəşlə məhv edilmişdir...”
Bu fikirləri iyulun 15-də Prezident İlham Əliyevin sədrliyi ilə Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasda ölkə başçısı bildirib.
Prezident bildirdi ki, ermənilərin bəhanə gətirdiyi həmin məlum post artıq yoxdu, biz onu darmadağın etdik.
Bu nəticənin məzmunu nədir, bizə nə verir?
- “Azərbaycanın qətiyyətli cavab zərbələrindən sonra düşmən dövlətdə daxili gərginlik daha da artıb”
Siyasi şərhçi Natiq Məmmədli “Bakı-Xəbər”ə bildirdi ki, ordumuz bununla istənilən təxribata cavab vermək iqtidarında olduğunu bir daha sübut etdi:”Cənab Prezidentin çıxışı bir daha təsdiqlədi ki, Ordumuz düşmənin xain həmləsini lazımi səviyyədə dəf edib, gözlənilməz hücuma layiqli cavab verib. Şəhidlərimizin qisası alınıb və bu proses davam edir. Azərbaycan Ordusu bundan sonra da hər hansı təxribata cavab vermək iqtidarındadır. Ermənistanın daxili siyasi gərginlikdən diqqəti yayındırmaq üçün elədiyi belə “ənənəvi” təxribatların limiti artıq tükənmək üzrədir. Azərbaycanın qətiyyətli cavab zərbələrindən sonra düşmən dövlətdə daxili gərginlik daha da artıb və sosial məzmunlu tələblərin üzərinə artıq siyasi məqamlar da əlavə olunub. Azərbaycan xalqının həlledici məqamda dövləti ilə həmrəylik nümayiş elətdirməsi dünyaya açıq mesaj oldu ki, milli məsələdə bizdən hər hansı kompromis olmayacaq”.
Ekspertin fikirlərindən belə qənaətə gəldik ki, Azərbaycan ordusunun düşmənin istənilən təxribatına cavab vermək iqtidarında olması və bunu Tovuz cəbhəsində də sübut etməsi faktı Ermənistanda mövcud olan ictimai-siyasi, hərbi, sosial böhranların daha da dərinləşməsilə müşaiyət olunur.
İradə SARIYEVA
