Ana Vətən Partiyasında maraqlı proseslər yaşanır. Parlament seçkilərindən əvvəl bu partiyaya cəmiyyətdə tanınan bir neçə şəxsin üzvlüyü reallaşdı. Bu xüsusda sabiq maliyyə naziri Fikrət Yusifovun, jurnalist Jalə Mütəllimovanın, QHT rəhbəri Arzuman Abdulkərimovun adını çəkə bilərik.
Maraqlıdır ki, seçkilərdən dərhəl sonra böyük səs-küylə AVP-yə üzvlüyü reallaşan şəxslərin ikisi ard-arda partiyadan istefa verdiklərini bəyan etdilər. Adları çəkilən 3 nəfərdən yalnız Arzuman Abdulkərimov partiyadan istefa verməyib.
Ana Vətən Partiyası sədrinin müşaviri Jalə Mütəllimova partiya sıralarından istefa verməsini belə əsaslandırmışdı: “Şəxsi təşəbbüsümlə Ana Vətən Partiyası ilə yollarımız ayrıldı. Hər kəsə sayğılar, sevgilər və böyük uğurlar diləyirəm. Qısamüddətli əməkdaşlıq mənə çox böyük təcrübə qazandırdı. Əminəm ki, bundan sonrakı dönəmdə qazandığım təcrübədən bəhrələnəcəyəm...”. Ancaq partiyanın sədri Fəzail Ağamalı xanım jurnalistin partiyadan niyə istefa verməsinə aydınlıq gətirib. F.Ağamalı qeyd edib ki, J.Mütəllimova növbədənkənar parlament seçkilərində AVP-dən namizəd olub: “Onun seçki prosesinə yanaşma metodu partiyanın təməl prinsiplərinə uyğun gəlmədi. Bizim danışıqlarımız oldu. Bildirdim ki, bu cür yanaşmalar təməl prinsiplərimizə ziddir. Dedim ki, sakit şəkildə, Azərbaycan qanunlarına söykənərək seçki prosesində iştirak edin. O da bildirdi ki, bəzi şeylər var ki, ictimailəşdirməliyəm. Dedim, o zaman sizin partiyada olmağınız qüvvəsini itirir, seçiminizi edin. O da ərizə yazdı və getdi. Jalə Mütəllimovanın Ana Vətən Partiyasına gəlməsi və getməsi partiyaya nə üstünlük, nə itki verdi...”.
Bunun ardınca sabiq maliyyə naziri, professor Fikrət Yusifov Ana Vətən Partiyasından istefa verdiyini bildirib. Ancaq J.Mütəllimovadan fərqli olaraq, F.Yusifov istefası barədə ətraflı məlumat verib. O, istefa səbəbini aşağıdakı kimi açıqlayıb: “Bir müddət öncə mən Ana Vətən Partiyasına üzv olduğumu bəyan edəndə cəmiyyətdə ciddi qınaqlarla üzləşdim. Məni yaxından tanıyanlar yaxşı bilirlər ki, həmişə səmimiyəm. Ona görə bu məsələdə də səmimi olaraq etiraf edirəm ki, partiyaya gələndən sonra burada, praktik olaraq, heç bir ciddi resursun olmadığını görüb, belə bir partiyanın sıralarını dərhal tərk etmək qərarı verdim. Ancaq bunu həmən etmədim - istəmədim ki, partiyanın gözlənilən seçki uğursuzluğunda mənim adım hər hansı bir formada hallansın”.
F.Yusifov söyləyib ki, partiya tərəfindən deputatlığa namizədliyinin Sumqayıt 41 saylı seçki dairəsindən irəli sürülməsindən də imtina edib: “Bir sözlə, namizədliyin qeydiyyata alınması üçün əsas olacaq imza vərəqlərini belə götürmədən geri çəkildim. Mən Xalq Cəbhəsi hakimiyyəti dövründə ölkənin Maliyyə nazirinin birinci müavini, Heydər Əliyevin hakimiyyəti dövründə isə Maliyyə naziri vəzifəsində 6 ilə yaxın çalışsam da, nə Xalq Cəbhəsinə, nə də Yeni Azərbaycan Partiyasına üzv olmamışdım. Şəxsi münasibətlərdən istifadə edərək mənə Ana Vətən Partiyasına üzv olmağı təklif edən partiya rəhbərliyi bunu etməzdən öncə öz siyasi məsuliyyətini dərk etsəydi, bu daha düzgün olardı”.
Partiyada baş verən son istefalarla bağlı Fəzail Ağamalının fikirlərini öyrəndik. O, “Bakı-Xəbər”ə açıqlamasında bildirdi ki, Fikrət Yusifovun belə bir açıqlama ilə çıxış etməsindən dərin təəssüf keçirir: “Açığı, bunu ondan gözləmirdim. O, hələ ötən ilin avqust ayında mənimlə görüşündə qarşıdan gələn parlament seçkilərində iştirak etmək niyyətini ortaya qoydu. Bunun üçün də mənə dedi ki, ehtiyac olarsa, sizin partiyanın xətti ilə parlament seçkilərində iştirak etmək istəyərdim. Ona söylədim ki, bu barədə fikirləşərik. Bəlli oldu ki, Fikrət Yusifovun partiyaya qoşulmaqda niyyəti yalnız deputat olmaq idi. Mən də ona reallığı dedim və öz gücünü, imkanlarını ölçüb, qərar verdi ki, iştirak etməsin. Buna nə gərək var? Partiyaya biri gəlir, biri gedir. Gələn ərizəni yazıb gəlir, gedəndə də ərizəsini yazıb gedir. Bunların heç biri mətbuata çıxmır”.
Fəzail Ağamalının sözlərinə görə, bu barədə onların arasında ötən ilin oktyabr ayında söhbət olub: “Dedim ki, qarşıdan gələn parlament seçkilərində çoxsaylı namizədlə iştirak etmək niyyətindəyik. Bildirdim ki, sənin də iştirakını istərdik, necə ki, bu barədə istəyini vaxtilə mənə demişdin. O, bununla razılaşdı. Partiyanın üzvlüyünə ərizə yazdı, iclaslarda iştirak etdi. Eyni zamanda, partiyanın Ali Məclisinin 120 nəfərlik yığıncağına, həmçinin də namizədlərin toplantısına qatıldı. Bütün bunların fonunda partiyanın kifayət qədər resursunun olduğunu gördü. Özü etiraf etdi ki, indiyə qədər bilməmişəm ki, sizin partiyanın bu dərəcədə resursları var. İndi də deyir ki, partiyanın resursu yoxdur”.
Məhəmmədəli QƏRİBLİ
