Məlum olduğu kimi, Prezident İlham Əliyev altıncı çağırış Milli Məclisin ilk iclasında geniş çıxış edərək bir sıra məsələlərə toxunub. Ölkə başçısının çıxışından məlum oldu ki, o, əvvəlki parlamentdə təmsil olunan deputatların beynəlxalq təşkilatlardakı fəaliyyətindən məmnun deyil. Bununla bağlı Prezidentin səsləndirdiyi bir sıra iradlar bu qənaətə gəlməyə əsas verir.
Məsələ ondadır ki, Prezident İlham Əliyev çıxışında beynəlxalq təşkilatlarda təmsil olunan deputatları indiki dövrdə daha da fəal olmağa çağırdı: “Çünki biz Azərbaycan həqiqətlərini çatdırmalıyıq. Xüsusilə Ermənistan-Azərbaycan Dağlıq Qarabağ münaqişəsi ilə bağlı tarixi həqiqətləri çatdırmalıyıq”.
Dövlət başçısı qeyd edib ki, tarixi ədalət bizim tərəfimizdədir, beynəlxalq hüquq da bizim mövqeyimizi dəstəkləyir: “Ona görə bizim deputatlar bütün beynəlxalq təşkilatlarda tarixi həqiqətləri ortaya qoymalıdırlar. Mən Münhendə “Kürəkçay” sülh müqaviləsi haqqında deyəndən sonra bilirəm ki, Ermənistanda indi bu müqaviləni əzbərləyirlər. Orada açıq-aydın göstərilir ki, bu müqaviləni kim bağlayıb, nə vaxt bağlayıb və erməni xalqı haqqında orada, ümumiyyətlə, söhbət belə getmir. Bir tərəfdən Rusiya generalı Sisianov, bir tərəfdən İbrahim xan, özü də rusca yazılmışdır İbrahim xan “Karabaxski Şuşinski”. Bax, budur real tarix. XX əsrin əvvəllərində Rus imperiyası tərəfindən dərc edilmiş xəritələrə baxmaq kifayətdir görəsən ki, orada indiki Ermənistan ərazisində toponimlərin mütləq əksəriyyəti Azərbaycan mənşəlidir. Bunu demək lazımdır, o xəritələri gətirmək lazımdır. Bütün beynəlxalq təşkilatları, orada fəaliyyət göstərən nümayəndələri tanış etmək lazımdır. Eyni zamanda, müsəlman ölkələrinin parlamentlərinin nümayəndələri ilə görüşlər əsnasında mütləq ermənilər tərəfindən dağıdılmış məscidlərimizin şəkilləri göstərilməlidir”.
Prezident diqqətə çatdırıb ki, bütövlükdə, beynəlxalq təşkilatlar çərçivəsində bizim fəaliyyətimiz daha məqsədyönlü olmalıdır: “Orada bizi təmsil edən deputatlar fəal olmalıdırlar, turist kimi getməməlidirlər, sonra hesabat verməlidirlər ki, nə iş görmüsən, kiminlə görüşmüsən, hansı məsələni qaldırmısan. Yoxsa, bəzi hallarda bu, turist səfərlərini xatırladır. Getdik, görüşdük, oturduq, danışdıq, yedik, qayıtdıq. Özü də bəzi səfərlər, ümumiyyətlə, qəbuledilməzdir. Mən bu gün bu haqda çox danışmaq istəmirəm, amma bilirəm nə baş verir, hansı hadisələr baş verir. Ona görə biz beynəlxalq fəaliyyətimizin səmərəliliyini artırmalıyıq”.
Göründüyü kimi, Prezidentin beynəlxalq əlaqələr sahəsində çalışmış deputatlardan narazılığının ciddi əsasları var. Bununla bağlı ölkə başçısı çox ciddi arqumentlər ortaya qoydu.
Maraqlıdır, bəs ekspertlər bütün bunları necə dəyərləndirirlər?
“Azərbaycanı beynəlxalq təşkilatlarda təmsil edən deputat korpusunun tərkibinə xüsusi fikir vermək lazımdır”
Məsələyə münasibət bildirən AMİP funksioneri Əli Orucovun sözlərinə görə, ölkə başçısının beynəlxalq təşkilatlarda təmsil olunan əvvəlki deputatların fəaliyyəti ilə bağlı səsləndirdiyi fikirlər tamamilə əsaslıdır: “Həqiqətən də bir sıra beynəlxalq qurumlarda fəaliyyət göstərmiş deputatların işini qənaətbəxş hesab etmək olmaz. Çünki fəaliyyətləri dövründə Azərbaycan həqiqətlərini arzuolunan səviyyədə beynəlxalq müstəvidə çatdırmağa maraq göstərməyiblər. Hansı ki, həmin təşkilatlarda Qarabağla bağlı həqiqətləri yaymaq üçün geniş imkanlar olub. Ancaq reallıq ondan ibarətdir ki, millət vəkilləri bu imkanlardan maksimum səmərəli istifadə etməyiblər. Qarabağla bağlı bir sıra tarixi faktları beynəlxalq təşkilatların tribunasından səsləndirmək lazım idi. Yaxud da fərdi şəkildə dünya ölkələrini təmsil edən deputatlara bu faktları göstərmək mümkün idi. Beləcə, mərhələ-mərhələ Ermənistanın işğalçı siyasətini ifşa etmək olardı. Əfsuslar olsun ki, beynəlxalq qurumlarda Azərbaycanı təmsil edən deputatlar yetərincə iş görməyiblər. O baxımdan bununla bağlı səslənən iradlar həqiqəti əks etdirir. Düzdür, beynəlxalq təşkilatların timsalında Azərbaycana yönəlik ikili standartlar var və bunu danmaq olmaz. Ancaq bu o demək deyil ki, sözügedən təşkilatlarda Qarabağ həqiqətləri ilə bağlı təşəbbüslərlə çıxış etməyəsən. Bu baxımdan hesab edirəm ki, Azərbaycanı beynəlxalq təşkilatlarda təmsil edən deputat korpusunun tərkibinə xüsusi fikir vermək lazımdır. Həmin tərkibdə elə deputatlar olmalıdır ki, onlar xarici dil bilsinlər. Ən başlıcası, milli və dövlət maraqlarının qorunmasına xüsusi önəm verən şəxslər orada olmalıdırlar. Eyni zamanda, onlar bununla bağlı gördükləri işlər barədə hesabat verməlidirlər. Yoxsa, formal olaraq, hansısa mötəbər tədbirdə iştirak etməyin heç bir faydası olmayacaq”.
Vidadi ORDAHALLI
