Cavid Zeynallı: “Hazırda hər aktyora öz istəyinə görə rol verilməsi təcrübəsi real deyil”
Son dövrlər bir sıra teatrlar müxtəlif qalmaqal predmeti olaraq gündəmə gəlirlər. Bir sıra teatrlarda teatr rəhbərliyi ilə xalq və əməkdar artistləri arasında ciddi narazılıqlar baş verdiyi gizlin deyil. Xalq artistlərinin bir çoxu mətbuata verdikləri açıqlamalarda bildirirlər ki, yaşlarına görə teatrlarda ayrıseçkiliklə üzləşirlər, onlara rol verilmir, oynadıqları tamaşalar teatrların repertuarından çıxarılır və s.
Bilirik ki, son bir neçə ildə bu məsələdə ən çox qalmaqal, söz-söhbət yaşanan teatrlardan biri Akademik Milli Dram Teatrıdır. Bu teatrda həm köhnə, həm də yeni rəhbərliyin dövründə aktyor və aktrisalarla bağlı müəyyən qalmaqallar yaşanıb, sənətkarlar teatr rəhbərliyini bir sıra məsələlərdə ittiham ediblər.
Akademik Milli Dram Teatrının aparıcı aktrisalarından olan xalq artisti Bəsti Cəfərova mətbuata müsahibəsində çalışdığı teatrda teatr rəhbərliyi tərəfindən ayrıseçkiliyə məruz qaldığını bildirib. O qeyd edib ki, teatrda baş rol oynadığı bəzi tamaşalar repertuardan yığışdırılıb, oynadığı tamaşalar hər ay repertuara salınmır. “Yubileyi olan aktyorlar üçün tamaşa və yubiley gecələri ənənəsi bütün teatrlarda var. Biz cavan olarkən əlli yaşı olan aktyorlara belə yubiley gecələri keçirilirdi. 2019-cu ildə də mənim yubiley yaşım olduğu üçün, yubiley tamaşası barədə arzumu bədii rəhbər Azərpaşa Nemətova bildirdim. O da mənə əsər seçilməsi barədə düşündüyünü və tapşırıq verdiyini söylədi.
Ancaq ikinci dəfə dekabrda onun yanına gedəndə Azərpaşa Nemətov mənə dedi ki, bu haqda nazirliyə demişəm. Bildiriblər ki, Bəsti Cəfərovanın tamaşası var, oradakı rolunu ifa edər, biz də onun yubileyini təbrik edərik. Mən israr etdim ki, həmin tamaşanı artıq bir ildir oynayıram və yubileyimdə tamaşaçıların qarşısına yeni tamaşa ilə çıxmaq istəyirəm.
Bundan sonra Azərpaşa Nemətov mənə yeni bir əsər seçib ona təqdim etməyimi istədi. Mən əsər seçib onun yanına gedəndə isə gözləmədiyim münasibətlə qarşılaşdım. Əsəri ona təqdim edəndə dedi ki, mən sənə dedim axı, tamaşa qoymağa pul yoxdur. Əgər o mənə əvvəl gedəndə desəydi ki, pul yoxdur, mən əsər seçib onun yanına gedərdim? Təbii ki, yox. Mən ondan xəbər alanda ki, bundan sonra tamaşa qoyulmayacaq? O, “Afinalı Timon” və “On ikinci gecə” tamaşalarını yenidən səhnəyə qoyacağını söylədi. A.Nemətovun sözlərindən belə çıxdı ki, onun qoyduğu tamaşalara pul var, mənim üçün hazırlanacaq yubiley tamaşasına isə yoxdur” - deyə aktrisa bildirib.
Teatr Xadimləri İttifaqında bir neçə sənət adamının “Sənətkar medalı” ilə təltif olunmasına da münasibət bildirən aktrisa qeyd edib ki, adını o siyahıda görməyib və buna görə də 1980-ci ildən üzvü olduğu Teatr Xadimləri İttifaqının üzvlüyündən imtina edir.
A.Nemətovun ona yaxşı münasibət bəsləmədiyini də qeyd edən aktrisa bildirib ki, o heç vaxt ona tamaşasında rol verməyib: “A.Nemətov məni aktrisa kimi sevmirsə, rol verməsin. Necə ki, indiyə qədər verməyib. Amma o, bizim teatra rəhbər gələndə bilməliydi ki, orada Bəsti Cəfərova, Nurəddin Mehdixanlı, Ramiz Novruzov kimi aktyorlar var. İndi o məni aktrisa kimi sevmirsə, mən ərizəmi yazıb teatrdan çıxası deyiləm ki...”.
B.Cəfərovanın səsləndirdiyi ittihamlar nə dərəcədə həqiqəti əks etdirir? Doğrudanmı teatr rəhbərliyi tərəfindən ona belə bir münasibət sərgilənib?
Xalq artisti B.Cəfərovanın müsahibəsində səsləndirdiyi fikirlərə münasibət bildirən teatrın mətbuat katibi Cavid Zeynallı “Bakı-Xəbər”ə bildirdi ki, teatr rəhbərliyinin B.Cəfərova başda olmaqla, hər bir aktyora böyük hörməti, ehtiramı var: “Rəhbərlik teatrda sağlam mühitin qorunması, yaradıcı atmosferin saxlanması üçün bütün mümkün vasitələrdən istifadə edir. Bu mənada, hörmətli sənətkarımız Bəsti xanımın özünü “qərib” hiss etməsi anlaşılan deyil. Teatrın bədii rəhbəri-direktoru, xalq artisti A.Nemətov kollektivlə ilk görüşündə bəyan etdi ki, bu teatrın qapısından içəri girən hər bir insan mənə əzizdir, doğmadır. Bu əziz və doğmalıqdan B.Cəfərovaya və onun adını çəkdiyi sənətkarlarımız N.Mehdixanlı və R.Novruzova da ən yüksək mənada pay düşür. Onların rol aldığı tamaşalar hər ay repertuara salınır. B.Cəfərova, N.Mehdixanlı və R.Novruzov bu gün Akademik Milli Dram Teatrının sevilən, tamaşaları baxılan sənətkarlarıdır. Son illərdə onların oynadığı bir-birindən maraqlı rollara olan tamaşaçı sevgisi bunu sübut edir. A.Nemətov bütün ömrünü teatr sənətinə həsr edən insandır. Ayrıseçkilik onun dünyagörüşünə, sənətə münasibətinə ziddir. A.Nemətovun bir arzusu, istəyi var: yaradıcı müstəvidə, maddi-texniki bazanın zənginliyi müstəvisində teatrımızı indikindən dəfələrlə irəli aparsın. O bunu öz böyük missiyası hesab edir. B.Cəfərova ilə bərabər. B.Cəfərova müsahibəsində bir qədər emosiyaya qapılır və qeyri-dəqiq qənaətlər səsləndirir. Məsələn, yubiley tamaşası istəmək... Əlbəttə, oynamaq, çalışmaq gözəl arzudur. Amma bu arzu teatrın imkanları, repertuar planı ilə üst-üstə düşməlidir. Bəsti xanım özü dediyi kimi, bir il əvvəl “Qətibə İnanc” tamaşasının premyerasını keçirib. O tamaşa bu gün də uğurla oynanılır. Hazırda hər aktyora öz istəyinə görə rol verilməsi təcrübəsi real deyil. Siz təsəvvür edirsinizmi, məsələn, bizim teatrın 17 xalq artisti hər biri ayrıca tamaşa istəsin? Burada ümumi prinsip əsas götürülməlidir və əsas da götürülür. Məlumat üçün deyim ki, A.Nemətov da özünə yubiley keçirmir, belə şeylərdən çoxdan imtina edib. Bəsti xanımın Teatr Xadimləri İttifaqının üzvlüyündən imtina etməsi isə onun şəxsi işidir”.
C.Zeynallı, həmçinin, qeyd etdi ki, İttifaq könüllü, ictimai təşkilatdır, hər bir üzvün istəyinə hörmətlə yanaşır. “Bəsti xanımı yubileyi münasibətilə təbrik edirik. Onu hələ daha böyük rollar, daha gözəl çiçəklər, daha gur alqışlar gözləyir” - deyə mətbuat katibi vurğuladı.
İradə SARIYEVA
