Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği

Tarix: 03.03.2015 / 00:14
Bölmə: Mədəniyyət

Nataliya Şelepnitskaya: "Azərbaycan xalqı dünyanın bu qarışıq dövründə də öz insanpərvərliyini qoruyub saxlayıb"

Ukraynanın əməkdar artisti Natalya Şelepnitskaya Azərbaycan və xalqımız haqqında təəssüratlarını ən xoş sözlərlə ifadə edib. Onu öz vətənində "Ukraynanın məlahətli səsi" adlandırırlar. Ümumxalq sevgisinin göstəricisi olan bu ifadə nə musiqişünaslarda, nə sənətçi həmkarlarında, nə də ki, səviyyəli dinləyici kütləsində heç bir mübahisə doğurmur. Bu qeyri-rəsmi ad parlaq istedadın, sənətə məsuliyyətli yanaşmanın, karyerasının zirvəsində belə inkişafa canatmanın məntiqi nəticəsi olaraq əldə edilib.

Əlbəttə, geniş miqyasda tamaşaçı rəğbətinin qazanılmasında peşəkar elementlər nə qədər mühüm rol oynasa da, onların mütləq mənada həlledici olduğunu söyləmək mümkün deyil. Çünki müasir auditoriya böyük səhnədəki ifaçının şəxsi keyfiyyətlərini və əsas insani xüsusiyyətlərini onun sənəti ilə ümumiləşdirərək öz qiymətini verir. Bu baxımdan, "Ukraynanın məlahətli səsi" adının tək ünvanına çevrilmək həm sənətin, həm də insanlığın vəhdətindən yaranan misilsiz nailiyyətdir. O səsin sahibi - Ukraynanın əməkdar artisti, karyerasının zirvəsində olan, hər addımı ilə insanlıq nümunəsi göstərən Nataliya Şelepnitskaya...

Sənətçi Ukraynanın qərbində, Çar Rusiyası və Sovet dönəmində də milli özəlliklərini qoruyaraq velikorus assimilyasiyasına uğramayan bölgədə - Ternopol vilayətində doğulub. Anasının da gözəl səsi olan N.Şelepnitskayanın musiqi istedadı özünü erkən yaşlardan göstərib. Bunu fərq edən ailəsi Nataliyanın qeyri-adi səsi ilə böyük sənətə doğru addımlamasına hərtərəfli dəstək verir. Müğənni uşaqlıq illərində ailəsinin ciddi nəzarəti altında musiqi çalışmalarını belə xatırlayır: "Evdə mənim özümü musiqiyə həsr etməli olduğuma qərar verdilər və bununla da sakit uşaqlıq dövrüm başa çatdı. Məni musiqi məşğələləri ilə həddindən çox yükləyirdilər... Musiqi məktəbi, xoreoqrafiya dərnəyi, müxtəlif müsabiqələr, festivallar... Hamısını çatdırmaq və daim hazır olmaq lazım gəlirdi".

Təbii, onun belə gərgin rejimdə əzmkar çalışqanlığı, çəkdiyi əziyyət yerdə qala bilməzdi. N.Şelepnitskaya artıq müəyyən müddətdən sonra Ukrayna və keçmiş SSRİ-nin Sofiya Rotaru, Nazariy Yaremçuk, Vasili Zinkeviç kimi tanınmış sənətçiləri ilə birgə səhnəyə çıxmağın qürurunu yaşayır. Gənc müğənninin sənətdəki uğurlu startı davamlı olur. Müxtəlif beynəlxalq müsabiqələrdə Ukraynanı təmsil edən sənətçi öz adından söz etdirməyi bacarır. Tezliklə tək ölkəsinin deyil, Avropanın ən nüfuzlu salonlarında verdiyi konsertlərlə diqqət mərkəzinə düşür. Klassik və digər janrlarda ustalıqla ifa etdiyi mahnılar onu sənətinin zirvəsinə qaldırır. 2005-ci ildə Ukraynanın əməkdar artısti adına layiq görülür.

Sözsüz ki, bu yazının məqsədi sadəcə ukraynalı bir müğənninin sənət karyerasına nəzər salmaq deyil. N.Şelepnitskaya şəxsiyyətinə diqqət eyni zamanda onun Azərbaycana münasibətindən, ölkəmizə özünəməxsus bağlılığından irəli gəlir. Onunla sosial şəbəkə vasitəsilə başlayan ünsiyyətimiz tədricən dostluğa çevrildi. Söhbətimiz zamanı Azərbaycana və xalqımıza vurğunluğunu ən gözəl sözlərlə ifadə edir, rəğbətini hər imkanda büruzə verir. Sənətçi Azərbaycana ilk dəfə 2012-ci ildə - Bakıda keçirilmiş "Eurovision" mahnı müsabiqəsi çərçivəsində gəlib. Bakının möhtəşəm gözəlliyi və müsabiqənin yüksək səviyyədə təşkili N.Şelepnitskayanı sözün ən yaxşı mənasında heyrətləndirib. Bu barədə özü belə deyir:

"2012-ci ildə Azərbaycan hökumətinin dəvəti ilə "Eurovision" müsabiqəsinə dəvət olunmuş Ukrayna nümayəndə heyətinin tərkibinə mən də daxil idim. Bakıya gəldikdən sonra dəvət və gözəl şəhərinizə gələ bildiyim üçün çox sevindim. Bakının bənzərsiz gözəlliyi haqda hələ Sovet dövründən məlumatlı idim. Amma SSRİ-nin süqutundan iyirmi ildən artıq vaxt keçmişdi. Bakı bu müddət ərzində bütün parametrlər üzrə ən müasir şəhərə çevrilib. Çox möhtəşəmdir. Bakı haqqında təəssüratlarım inanılmazdır: gözəl şəhər, yaxşı qəlbli, gülərüz, qonaqpərvər insanlar...

Eyni zamanda, mən Azərbaycanın "Eurovision" kimi nüfuzlu müsabiqənin təşkilinə necə məsuliyyətlə yanaşdığını qeyd etməyə bilmirəm. Təşkilatçılıq bütün detallarına qədər fantastik idi. Birinci səfərim başa çatmadan qərara aldım ki, elə ilk fürsətdə Bakıya yenidən gələcəyəm".

N.Şelepnitskaya Bakıda olduğu bir neçə gün ərzində şəhərin musiqi həyatı ilə tanış olmağa, yerli ifaçıları dinləməyə də imkan tapıb:

"Biz sənətçi olaraq, getdiyimiz yerlərin milli xüsusiyyətləri, o cümlədən yerli musiqi ilə maraqlanır, görüb-öyrənməyə çalışırıq. Bakı da istisna deyildi. Ölkəniz və paytaxtınız özünün musiqi ənənələri ilə hər zaman seçilib, keçmiş İttifaq miqyasında çox sayda, bizim də sevərək dinlədiyimiz tanınmış bəstəkar və ifaçılarınız olub. Bakıda olarkən Azərbaycanın gözəl sənətçilərinin konsertini izləməyə imkan tapdım. Onların içində ən çox xatırladığım müxtəlif musiqi alətlərində yüksək peşıkarlıqla çalıb-oxuyan dörd qardaş oldu. İndi adlarını dəqiq xatırlaya bilməsəm də, onların ifası məndə çox xoş ovqat yaratdı. Həmin konsert də, onların ifası da olduqca xoşuma gəldi.

Onu da müşahidə etdim ki, Azərbaycanda ən müxtəlif janrlarda çox güclü ifaçı nəsli yetişib. İstər klassik, istər populyar, istərsə də digər janrlarda çox yüksək səviyyəli ifaçıların olduğunu öyrəndim. Bu, əlbəttə ki, sevindiricidir. Belə ifaçıların mövcudluğu, bir istedadlı nəslin digəri ilə əvəzlənməsi xalqın böyük mədəni potensialından xəbər verir. İnanıram ki, bu qədər istedadlı insanlara malik olan Azərbaycan xalqının musiqi ənənəsi gələcəkdə də harmonik surətdə inkişaf edəcək".

N.Şelepnitskaya Azərbaycanlı məşhur ifaçılar haqqında ürək dolusu danışır. Onların sırasında isə daha çox Müslüm Maqomayevi, Rəşid Behbudovu, Polad Bülbüloğlunu fərqləndirir: "Desəm ki, keçmiş SSRİ-də Azərbaycandan olan bu müğənniləri tanımayan yox idi, qətiyyən yanılmaram. Onlar öz sənətləri ilə nəinki İttifaqda, şişirtmədən deyirəm ki, dünyada məşhur idilər. Rəşid Behbudovun fəqrli dillərdə ifa etdiyi mahnılar maraqla qarşılanırdı, çox sərbəst tərzdə oxuyurdu, sevilirdi. Bildiyim qədərilə, ömrünün son vaxtlarına qədər səhnədə oldu. Müslüm Maqomayev və Polad Bülbüloğlu ondan sonrakı nəslin nümayəndələri olaraq sənətdə çox erkən parlayıblar. Hər ikisi öz müasir həmkarları ilə birlikdə o dövr üçün yeni səhnə dəbi, ifa üslubu müəyyənləşdirən müğənnilərdən olub.

Sovet televiziyası və radiosunda onların ifasını çox izləmişəm. Müslüm Maqomayev həqiqətən nəhəng sənətkar olub, hər yeni mahnısı hadisə kimi qarşılanıb. Onun haqqında əfsanəyə bənzər əhvalatlar dolaşırdı... Mahnıları indi də dillərdən düşmür, müxtəlif müğənnilər tez-tez onların repertuarlarına müraciət edir. Etiraf edək ki, onlar mənsub olduqları xalqı dünyada tanıdan gerçək əfsanədirlər. Bu hər bir xalqa nəsib olan xoşbəxtlik deyil.

Bayaq da dedim, Azərbaycanda yeni, çox istedadlı ifaçılar nəsli yetişib. İnanıram ki, onların arasında öz sələfləri kimi dünya miqyasında uğur qazanan sənətçilər çox olacaq".

Sənətçi Bakı haqqında əlavə təəssüratları barəsində həvəslə danışır. Azərbaycan paytaxtının müasir meqapolislə tarixi məkanların çulğalaşdığı əsrarəngiz paytaxt şəhəri olduğunu deyir. Bakı gəzintisində qarşılaşdığı maraqlı məkanlar onun yaddaşında dərin iz buraxıb: "Eurovision" müsabiqəsi zamanı bizi şəhərlə yaxından tanış etdilər, görməli yerlərə, tarixi məkanlara apardılar. İçəri şəhəri gəzdirdilər, çox xoşuma gəldi. Bizə orada bu gün də sevilə-sevilə baxılan "Brilyant əl" filminin çəkildiyi küçəni, həmin yeri də göstərdilər. Adam bir anlıq o illərə - qayğısız, sakit, firavan, insanlığın itib-batmadığı dövrə qayıtdı. İçəri şəhərdə bu gün də unikallığını, əzəmətini itirməyən qədim daş tikililər Bakının möhtəşəm keçmişini göz önündə canlandırır. Bu mənzərə qarşısında heyrətlənməmək olmur. Bakının ultramüasir tikililəri insanda müsbət emosiya doğurur. Bizim "Üç əkiz" adlandırdığımız "Alov qüllələri" isə gündüz də, gecə də eyni dərəcədə əzəmətlidir. O binaların gecə effektinə saatlarla tamaşa etmək olar. Bakını - bu tarixi və müasir şəhəri çox sevdim".

Amma sənətçini daha çox məmnun edən Azərbaycan xalqının qonaqpərvərliyi, diqqəti, səmimiyyəti olub: "İnsanlarınız çox istiqanlı, ürəyiaçıq, diqqətcildirlər - hər addımda bunun şahidi olurduq. Başqa ölkədən olduğumuzu bildikdə bizə nədə kömək edə biləcəkləri ilə maraqlanırdılar. Çox böyük diqqətlə əhatə olunurduq. Bakıda olduğumuz günlərdə bu münasibət bir an da dəyişmədi.

Eyni diqqət, səmimiyyət, yardım etmək istəyi... Bizə yaxınlaşan yerli sakinlərin səmimiyyətini gördükcə maraqların dəyərləri üstələdiyi bir vaxtda belə insanların varlığına çox sevinirdim. Azərbaycan xalqı dünyanın bu qarışıq dövründə də öz insanpərvərliyini qoruyub saxlayıb. Ən xoş sözlərə layiq olan xalqınızı ürəkdən sevdim. O gözəl insanların arasında yenidən olmaq istərdim".

N.Şelepnitskaya Azərbaycanın yaşadığı ağrıları da bilir. Bakıda olarkən Azərbaycanın Ermənistanın hərbi təcavüzünə məruz qalması, 1 milyondan artıq azərbaycanlının öz ölkəsində məcburi köçkünə çevrilməsi haqqında xeyli məlumat alıb. Vətəni Ukraynada 1 ildir davam edən müharibə ona Azərbaycanın son 25 ildə çəkdiyi əziyyətləri, Ermənistanın təcavüzü nəticəsində yaranan ağır problemləri daha aydın şəkildə dərk etdirib. O, bir ifaçı olaraq, sənəti ilə bütün Yer üzündə sabitlik və firavanlığın, müharibəsiz, azad həyatın təmin olunmasına töhfə vermək istəyir. N.Şelepnitskaya müharibələrin, insan qırğınının əleyhinə çıxdığını, toqquşmalara son qoyulması üçün əlindən gələni etməyə hazır olduğunu deyir. Sənətçi hələ Ukraynanın müharibəyə sürüklənməsindən əvvəl də bu istiqamətdə fəaliyyət göstərib. Onun səyləri Beynəlxalq Sülh Federasiyası tərəfindən yüksək qiymətləndirilib və dünyada sülhün bərqərar olunmasına yönəlik səylərinə görə fəxri "Sülh elçisi" seçilib. Tanınmış ifaçı ona göstərilmiş bu etimadı doğrultmaq üçün hər bir fədakarlığa hazır olduğunu səmimiyyətlə bəyan edir.

Vətəni Ukraynanın, Azərbaycanın, münaqişələrin davam etdiyi yaxın-uzaq ölkələrin tezliklə müharibəsiz həyata qovuşmalarını arzulayan N.Şelepnitskaya yenidən ölkəmizə gəlmək istəyini bildirərək, xalqımıza səslənib:

"Sizi çox sevirəm, mənim əziz azərbaycanlılarım. Çox gözəlsiniz, sizə ürəkdən sülh, xoşbəxtlik, sevgi, çiçəklənmə arzulayıram. Mən aramızda yaranmış bu dostluğa görə hədsiz şadam. Ümid edirəm və inanıram ki, sizinlə tezliklə görüşəcəyik".

Araz ZEYNALOV, "Gün.az" saytının redaktoru

Yazı Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim etmək üçündür.

DİGƏR XƏBƏRLƏR

Tarix: 19.06.2026 / 16:05

Türkiyənin ən gözəl turizm kəndlərinın adı açıqlandı - FOTO

Tarix: 18.06.2026 / 13:51

Birinci Türkoloji Qurultayın 100 illiyinə həsr olunmuş “Türk Dünyası Həftəsi” keçiriləcək

Tarix: 18.06.2026 / 12:55

Bir memar tanıyıram...

Tarix: 18.06.2026 / 12:49

Aspendosda nadir tarixi olay - Roma “çay tanrısı” kəşf edilib

Tarix: 17.06.2026 / 20:14

Professor Asif Rüstəmlinin yeni kitabı çap olunub

Tarix: 17.06.2026 / 17:31

Flora Kərimova Mehriban Əliyevaya təşəkkür etdi

Tarix: 17.06.2026 / 16:46

“Köhnə çamadanlar” Adana tamaşaçısı ilə görüşdü

Tarix: 17.06.2026 / 14:12

Erməni toyları sürətlə “azərbaycanlılaşır”... Baxın necə...

Tarix: 17.06.2026 / 08:22

Rəşid Əzimovun xatirəsinə “Əbədi İşıq” sərgisi keçirildi

Tarix: 17.06.2026 / 07:08

Roma bazilikasında İtaliya Baş nazirinin surəti görənləri şoka saldı

Tarix: 16.06.2026 / 20:47

Parisdə Azərbaycan–UNESCO əməkdaşlığının perspektivləri müzakirə edilib

Tarix: 16.06.2026 / 19:52

Yoldaşlarını mühasirədən xilas edərək özü şəhid oldu -Namazov Orxan Ceyhun oğlu...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 18.06.2026 / 17:57

Müəllimlərin geyim forması ilə bağlı yeni standartlar bəzən yanlış başa düşülür...

Tarix: 18.06.2026 / 15:31

"Trampla İranın gizli razılaşdıqları başqa bir mətn var" - İddia...

Tarix: 18.06.2026 / 11:35

Tramp dünyanı yenə heyrətləndirdi...

Prezidentin aqrar müşavirəsi liberal iqtisadiyyat yolunda yeni mərhələ açır...