Samir Əliyev: “10 manatlıqların mühafizəsinin gücləndirilməsi…”
Məlum olduğu kimi, Azərbaycan Mərkəzi Bankı (AMB) tərəfindən tədavülə yeni 10 manatlıq əskinas buraxılıb.
Azərbaycan Mərkəzi Bankı qeyd edir ki, tədavülə buraxılmasından 13 il keçməsinə baxmayaraq, bu pul nişanları öz estetik görünüşünə, konseptual mövzusuna, müasirliyinə və mühafizə sistemlərinə görə aktuallığını hələ də qoruyur: “Bununla yanaşı, dünyada pul nişanlarının yaradılması və istehsalı sahəsində bir çox yeniliklər baş verir, innovasiyalar, nano və mikrotexnologiyalar geniş tətbiq olunur. Bununla bağlı Mərkəzi Bank tərəfindən “Azərbaycan tarixinə” həsr olunmuş 10 manatlıq pul nişanının təkmilləşdirilməsi və mühafizə elementlərinin müasirləşdirilərək dizayn mövzusu hazırlanıb. Bundan əvvəl, 2018-ci ilin may ayında tədavülə 200 manatlıq pul nişanı buraxılıb. Yenilənmiş 10 manatlıq pul nişanında əsas dizayn elementləri (İçərişəhərin və Qız qalasının sxematik təsviri, Azərbaycanın xəritəsi və Avropaya inteqrasiya, bir sıra milli xalça naxışları) saxlanıb. Mühafizə sistemlərinə gəldikdə isə, mövcud 10 manatlıqdan fərqli olaraq, yeni pul nişanında su nişanı kimi Azərbaycanın Dövlət Gerbi təsvir olunub”.
Tədavülə buraxılan yeni 10 manatlıq əskinas barədə məlumat verən iqtisadçı-ekspert Samir Əliyev qeyd etdi ki, Azərbaycanda yeni dizaynda və nominalda pul əskinasları 2006-cı ildə denominasiyadan sonra buraxılıb.
Onun sözlərinə görə, artıq üstündən 13 ildən çox zaman keçib və dünyada nanotexnologiyalar inkişaf etdikcə, pul nişanlarının mühafizə imkanları da gücləndirilir: “ABŞ illərdir öyrəşdiyimiz pul vahidinə müəyyən dəyişikliklər etməli oldu. Səbəb pulun saxta variantının qarşısını almaqdır. Bu baxımdan, Mərkəzi Bankın atdığı addım da başadüşüləndir. Belə baxanda dizayn, demək olar ki, dəyişməyib. İnsanlar üçün də xüsusi çətinlik törətməyəcək. Pulun mühafizəsinin gücləndirilməsinə normal baxıram. Onsuz da Mərkəzi Bank dövriyyədə zədələnmiş pul nişanlarını dövri olaraq dəyişir, yenisini buraxır. Görünür, yeni pul nişanlarının mühafizəsi daha da yaxşılaşdırılıb. 10 manatlıqların mühafizəsinin gücləndirilməsi yaxşı haldır, ancaq onların dözümlülüyünün artırılması daha vacibdir. Çünki bu nominallı pullar daha çox istifadə olunduğundan, köhnəlməyə, zədələnməyə tez məruz qalır. Sadəcə, əsas sual ondan ibarətdir ki, niyə məhz 10 manatlıq? Yəni mühafizənin gücləndirilməsini yüksək nominallı pul nişanlarından, məsələn, 100 və 50 nominallı əskinaslardan başlamaq yaxşı olmazmı? Yəqin ki, yüksək nominallı pul nişanlarının da oxşar mühafizə sistemi ilə təmin olunması həyata keçiriləcək”.
Günel CƏLİLOVA
