Vüqar Bayramov: “Çünki bu gün əsas məqsəd regionlarda emaledici sənaye müəssisələrinin yaradılması və…”
Məlum olduğu kimi, Prezident İlham Əliyev Sabirabad Sənaye Məhəlləsinin yaradılması haqqında sərəncam imzalayıb. Sərəncamda qeyd olunur ki, sənaye sahəsində fəaliyyət göstərən kiçik və orta sahibkarların fəaliyyətinin dəstəklənməsi, qeyri-neft sektorunun davamlı inkişafının təmin edilməsi və əhalinin istehsal sahəsində məşğulluğunun artırılması məqsədilə Sabirabad rayonunda Sənaye Məhəlləsi yaradılsın.
Müəyyən edilir ki, kiçik və orta sahibkarlığın dəstəklənməsi məqsədilə Sabirabad Sənaye Məhəlləsinin ərazisində qeyri-neft sənaye sahələri üzrə məhsul istehsalı müəssisələri, habelə xidmət müəssisələri yaradılır; Sabirabad Sənaye Məhəlləsinin fəaliyyətinin təşkili və tənzimlənməsi “Azərbaycan İnvestisiya Şirkəti” Açıq Səhmdar Cəmiyyətinə həvalə olunur. Sərəncamda, həmçinin, bununla bağlı müvafiq qurumlara tapşırıqlar verilib.
Məlumat üçün qeyd edək ki, sənaye məqsədləri üçün xüsusi ayrılmış bölgələrin qurulması 1960-cı illərdən başlayaraq müxtəlif formalarda baş verir. İlk nümunələr olaraq istehsal-sənaye yönümlü azad iqtisadi zonaların qurulmasını qeyd etmək olar. Bu zonalar əsasən çox ucuz işçi qüvvəsinə malik ölkələrdə dəniz limanlarının ətrafında qurulurdu. Bu tip sənaye əraziləri ilə yanaşı, bir qayda olaraq, xüsusi iqtisadi imtiyazları, yəni vergi və gömrük güzəştləri olmayan sənaye bölgələri - sənaye məhəllələri formalaşmağa başlayıb və bu bölgələrə müxtəlif ölkələrdə fərqli adlar verilib. Sənaye məhəlləsi xüsusi ərazi bölgüsü olaraq, əsasən kiçik və orta müəssisələrin inkişafı üzrə əlavə bir mexanizm kimi nəzərdə tutulur.
Ümumilikdə, sənaye məhəllələrinin yaradılmasının nə kimi əhəmiyyəti var?
Məsələyə münasibət bildirən iqtisadçı-ekspert Vüqar Bayramovun sözlərinə görə, sənaye məhəllələrinin yaradılmasının böyük əhəmiyyəti var. O bunu bir sıra arqumentlərlə əsaslandırdı: “Sənaye məhəllələrinin yaradılmasında başlıca hədəf qeyri-neft sektorunun inkişaf etdirilməsi və bu sahədə istehsalın təşviq edilməsidir. Belə ki, son illər bu istiqamətdə bir sıra işlər görülür. Digər tərəfdən, regionların inkişafının dəstəklənməsi nəzərdə tutulub. Çünki sənaye məhəllələri məhz regionlarda yaradılır. Bu, həmçinin, yeni iş yerlərinin yaradılması və regionlarda istehsalın artırılması deməkdir. Bu isə, öz növbəsində, regionlarda məşğulluğun təmin olunmasına müsbət təsir göstərir. Sənaye məhəllələrinin yaradılması həm regional, həm iqtisadi, həm də sosial inkişafa dəstəkdir. Ən nəhayət, bütün bunlar idxaldan asılılığın azaldılması və daxili bazara yerli məhsulların çıxarılmasını təmin etmək baxımından mühüm əhəmiyyət kəsb edir. Nəzərə alsaq ki, idxaldan asılılığın azaldılması, yerli məhsulların artırılması bu gün çox vacibdir, ona görə də yerli sənaye məhəllələri sənaye müəssisələrinin inkişafı, sənaye məhsullarının istehsalını nəzərdə tutan bir təşəbbüsdür. Bölgələrdə yaradılan sənaye məhəllələri həm də regionların aqrar potensialının sənayeyə transfer edilməsinə imkan yaradır. Çünki bu gün əsas məqsəd regionlarda emaledici sənaye müəssisələrinin yaradılması və eyni zamanda, aqrar sektorda istehsal olunan məhsulun həm də emal edilərək daxili və xarici bazara çıxarılmasının təminindən ibarətdir. Sənaye məhəllələri də məhz bu funksiyanı yerinə yetirir. Belə məhəllələrin inkişafı və uğuru müsbət haldır. Bütün bunlarla yanaşı, sənaye məhəllələrində fəaliyyət göstərəcək müəssisələrin güzəştli kreditlərə çıxış imkanlarının artırılması olduqca vacibdir. Sənaye məhəllələri müxtəlif rayonlarda yaradılır. Hər bir rayonun xüsusiyyətinə uyğun olaraq sənaye müəssisələri yaradılır”.
Vidadi ORDAHALLI
