Sahib Məmmədov: “Əmək təhlükəsizliyi fondu daha çox maarifləndirici tədbirlərin həyata keçirilməsi, eləcə də işəgötürənlərə praktiki köməyin göstərilməsi ilə məşğul olacaq”
Xəbər verildiyi kimi, Azərbaycanda yeni fond yaradılması təklif edilir. Bunu jurnalistlərə əmək və əhalinin sosial müdafiəsi naziri Səlim Müslümov deyib. Nazir vurğulayıb ki, Azərbaycanda Əmək Təhlükəsizliyi Fondu yaratmaq lazımdır: “Biz bu sahədə işimizi gücləndirməliyik. Bununla belə, iş istehsalatda bədbəxt hadisələrdən sonra yoxlamalarla bitməməlidir. Bu cür hadisələrin qarşısının alınması üçün profilaktik və preventiv tədbirlər həyata keçirilməlidir”.
S.Müslümov onu da qeyd edib ki, statistik məlumatlara əsasən, 2017-ci ildə istehsalatda baş verən bədbəxt hadisələr nəticəsində xəsarət alanların sayı azalıb: “Bununla belə, fondun yaradılması və onun hesabına öyrədici tədbirlərin həyata keçirilməsi, bəzən isə işəgötürənlərə praktiki köməyin göstərilməsi zəruridir”.
Belə bir fondun yaradılması istehsalatda bədbəxt hadisələrin qarşısını necə alacaq və ümumiyyətlə, bu fondda toplanan vəsaitlər hansı istiqamətlər üzrə xərclənəcək?
Vətəndaşların Əmək Hüquqları Liqasının sədri Sahib Məmmədovun sözlərinə görə, əmək təhlükəsizliyi fondu daha çox maarifləndirici tədbirlərin həyata keçirilməsi, eləcə də işəgötürənlərə praktiki köməyin göstərilməsi ilə məşğul olacaq. Dünya ölkələrində mövcud olan fondların mahiyyəti də bundan ibarətdir.
S.Məmmədov qeyd etdi ki, əmək təhlükəsizliyi fondunun yaradılmasından əvvəl əmək bazarındakı çatışmazlıqlar aradan qaldırılmalıdır. Həmsöhbətimiz onu da vurğuladı ki, əmək təhlükəsizliyi fondunun nə zaman yaradılacağı yaxın gələcəkdə məlum olacaq.
Liqa sədrinin sözlərinə görə, Əmək Məcəlləsində Əmək Təhlükəsizliyi Fondunun yaradılması qeyd olunub. Ancaq bu fondun necə fayda verəcəyi bəlli deyil: “Bu tipli fondlar bütün dünya ölkələrində, demək olar, var. Onların missiyasına nəzər salsaq, iş yerlərində əməyin təhlükəsizliyi səviyyəsini təşkil etməklə məşğuldurlar. Yaradılacaq fonda vəsait dövlət büdcəsi hesabına toplana bilər. Həmçinin, əməyin mühafizəsi qaydalarını pozan şəxslərə tətbiq olunan cərimələrin bir qismi bu fonda yönəldilə bilər”.
S.Məmmədov hesab edir ki, yaradılacaq fond istehsalatda işçilərə hər hansı bir zərər dəyərsə, onlara kompensasiya verilməsi üçün nəzərdə tutulmayacaq. Çünki bununla sığorta şirkətləri məşğul olur.
Günel CƏLİLOVA
