Vergilər Nazirliyinin Çağrı Mərkəzində "Azərbaycan Respublikası Vergilər Nazirliyinə resurslardan optimal istifadə olunması və vergi ödəyicilərinə keyfiyyətli xidmətlərin göstərilməsində dəstək" tvinninq layihəsinə həsr olunmuş tədbir keçirilib. Layihənin Azərbaycan tərəfindən rəhbəri, vergilər nazirinin müşaviri Elçin Məmmədov bildirib ki, Avropa İttifaqı-Azərbaycan Fəaliyyət Planında müəyyən edilmiş prioritetlərə əsasən, vergi orqanlarında müasirləşmənin, sadələşmənin və informasiya-kommunikasiya texnologiyalarından istifadənin davam etdirilməsi nəzərdə tutulub.
Yeni tvinninq layihəsinin icrasına başlanması Azərbaycanla Avropa İttifaqı (Aİ) arasındakı səmərəli əməkdaşlığın real nəticəsidir. Aİ-nin maliyyə dəstəyi ilə həyata keçirilən bu layihə vergi ödəyiciləri ilə səmərəli əməkdaşlığın qurulmasında və çevik vergi inzibatçılığının həyata keçirilməsində irəliyə doğru növbəti mühüm addımdır. Layihənin məqsədi vergi orqanları tərəfindən vergi ödəyicilərinə keyfiyyətli xidmətlərin göstərilməsi, onların səmərəliliyinin təmin edilməsi, xidmətlərə olan tələbatın müəyyən olunması, davamlı inkişaf üçün Avropa İttifaqının qabaqcıl təcrübələrinin tətbiqidir.
IOTA tərəfindən dəvət edilmiş ekspertin və Avropa İttifaqının Azərbaycandakı nümayəndəliyinin əməkdaşlarının iştirakı ilə hazırlanmış tvinninq layihəsi bu sahədə mövcud vəziyyəti və gözlənilən nəticəni özündə əks etdirir. Elan olunmuş tenderdə İspaniya və Fransanın birgə təklifi qalib gəlib. Ümumi müddəti 27 ay, büdcəsi isə 1,3 milyon avro məbləğində müəyyən olunan layihə 4 əsas komponentdən ibarətdir:
- Vergi ödəyicilərinə xidmət prosesləri üzrə davamlı İnkişaf Proqramının yaradılması;
- Xidmətlərə tələbatın müəyyənləşdirilməsi və idarə olunması;
- Vergi ödəyicilərinə göstərilən xidmətlərin əsas fəaliyyət göstəricilərinin müəyyən edilməsi və mövcüd göstəricilərinin təkmilləşdirilməsi;
- Qabaqcıl metodologiyalara əsaslanaraq bütün xidmət kanalları üzrə səmərəliliyin artırılması üçün məlumatların təhlili mexanizmlərinin yaradılması.
Ölkəmizdə olan İspaniya və Fransanın vergi administrasiyalarının mütəxəssisləri, eləcə də Aİ-nin ekspertləri qısamüddətli missiyalar çərçivəsində layihənin icrası üzərində Vergilər Nazirliyinin əməkdaşları ilə birgə çalışacaqlar. Azərbaycanın vergi orqanı həmin ölkələrin vergi administrasiyalarının ən yaxşı təcrübələrini ətraflı şəkildə öyrənəcək, yenilikləri tətbiq edəcək. Layihəyə əsasən, Vergilər Nazirliyinin və layihədə iştirak edən digər qurumların üzvlərinin Aİ ölkələrinə təlim səfərlərinin təşkili, treninqlər, seminarlar, tədris, təlim kursları, təcrübə mübadiləsi nəzərdə tutulur.
Məlumatı Nazirliyin Media və Kommunikasiya Mərkəzi yayıb.
Xəbər xidməti
