Müslüm İbrahimov: "İqtisadiyyatın bütün sahələri üzrə şirkətlərin tanıdılmasında hər bir ölkənin brendinin böyük rolu olur"
Neft məhsullarının ixracı zamanı xərclərin bir hissəsinin qaytarılması proqramı çərçivəsində bu ilin 6 ayı ərzində Azərbaycan ixracatçılarına 1,3 milyon manat qaytarılıb. Bunu iqtisadiyyat nazirinin müavini Sahil Babayev "Ticarətə hazır ol" layihəsinin açılış mərasimində deyib. O qeyd edib ki, ixracın təşviqi və "Made in Azerbaijan" brendinin tanıdılması qeyri-neft sektorunun 22 faiz artmasına səbəb olub: "Ümumilikdə isə, ixrac 44 faiz artıb".
"Made in Azerbaijan" brendinin tanıdılmasının qeyri-neft sektorunun inkişafına səbəb olması barədə fikir bildirən iqtisad elmlər doktoru Müslüm İbrahimov "Bakı-Xəbər"ə açıqlamasında bunları qeyd etdi: "İqtisadiyyatın bütün sahələri üzrə şirkətlərin tanıdılmasında hər bir ölkənin brendinin böyük rolu olur. Məhsulun brend adı altında satışı onun tanınmasına səbəb olur. Satıcı hər hansı bir məhsulu satış üçün alarkən tanınmış brendə müraciət edir. Bu isə həmin məhsulun satışının yüksək olmasından xəbər verir. Təbii ki, brend məhsulların qiyməti də yüksək olur. Bu tip məhsulların qiymətinin yüksək olması gəlirin artmasına səbəb olur". Həmsöhbətimizin sözlərinə görə, "Made in Azerbaijan" brendi tanınmaqla yanaşı, mənfəət deməkdir. Bu brend qısa müddət ərzində ölkəmizə gəlir gətirib. Ümumiyyətlə, inkişaf etmiş ölkələr brend məhsullara üstünlük verir: "Keyfiyyətli məhsula hər zaman üstünlük verilib. Bu gün də tələbat var. "Made in Azerbaijan" brendi adı altında satışa çıxarılan məhsullar da yüksək keyfiyyətə malikdir. Bu səbəbdən də bu sahədən əldə olunan gəlir 22 faiz artıb. Əminliklə deyə bilərəm ki, qarşıdakı dövr ərzində "Made in Azerbaijan" brendindən əldə olunan gəlirin həcmi daha da yüksək olacaq. Bu, qeyri-neft sektorunun inkişafına səbəb olacaq".
Günel CƏLİLOVA
