Vüqar Bayramov: "Yüngül sənaye nəinki daxili bazar, hətta qonşu ölkələri emal olunmuş hazır məhsullarla təmin etmək imkanına malikdir"
"Azərbaycanda aparılan islahatlar biznes mühitinin daha da yaxşılaşdırılmasına, sahibkarlara daha yaxşı şərait üçün imkan yaradır". Bunu "Şərq tərəfdaşlığı: Ticarətə hazır ol" layihəsi çərçivəsində Bakıda keçirilən tədbirdə çıxış edən Azərbaycanın iqtisadiyyat nazirinin müavini Sahil Babayev deyib.
Onun sözlərinə görə, bu gün Azərbaycan iqtisadiyyatının 80 faizi özəl sektorun payına düşür: "Bu vaxta qədər ixracda qeyri-neft sektorunun payı 40 faizə çatırdısa, hazırda bu rəqəm 70 faizə bərabərdir. İqtisadiyyatın diversifikasiyası üçün də kompleks işlər aparılır".
Nazir müavini deyib ki, yaxın günlərdə ixracatçılar klubunun növbəti tədbiri keçiriləcək, bu da ixracatçılara müsbət şəraitin yaradılmasına xidmət edir.
O da məlumdur ki, Prezident İlham Əliyevin rəhbərliyi ilə son illər həyata keçirilən uğurlu sosial-iqtisadi siyasət nəticəsində ölkədə sosial rifaha və yüksək həyat standartlarına sürətli keçid baş verib. Qeyri-neft məhsullarının ixracı diqqət mərkəzində saxlanıb. İdxaldan maksimum dərəcədə asılılığımızı aradan götürmək və ixrac potensialımızı artırmaq gələcək fəaliyyətimiz üçün prioritet istiqamət olmalıdır. Azərbaycanda ixracyönümlü iri sənaye müəssisələrinin yaradılması, kiçik və orta sahibkarlığın gücləndirilməsi barədə müvafiq qurumlara tapşırıqlar verilib.
Ümumilikdə, ixracda qeyri-neft sektorunun payının 70 faizə bərabər olmasını ekspertlər necə dəyərləndirir? Sözügedən məsələni dəyərləndirən iqtisadçı-ekspert Vüqar Bayramov hesab edir ki, Azərbaycanda sənayenin, xüsusilə yüngül sənayenin ixrac imkanları genişdir: "Yüngül sənaye nəinki daxili bazar, hətta qonşu ölkələri emal olunmuş hazır məhsullarla təmin etmək imkanına malikdir. Qida sənayesinin də imkanları genişdir. Azərbaycanda aqroparkların yaradılması nəzərdə tutulur. Aqroparklar, praktiki olaraq, aqrar sektorun emaledici sferasının sənayeləşməsi deməkdir. Belə ki, artıq istehsal olunan aqrar məhsullar xammal formasında deyil, emal edilərək qonşu ölkələrin bazarlarına çıxış imkanları əldə edə bilər. Xüsusən Rusiya bazarı yeyinti sənayesi üçün olduqca əhəmiyyətli bazarlardan biridir. Azərbaycan Rusiya bazarına yeyinti məhsulları ilə çıxmaq imkanına malikdir. Kimya sənayesinin ixrac potensialı yüksək qiymətləndirilir. Kimya sənayesinin məhsulları daha çox Rusiya və Qazaxıstan bazarlarına çıxmaq imkanlarına malikdir. Kimya sənayesi ilə bağlı apardığımız tədqiqatlar göstərir ki, ixrac imkanlarının artırılması üçün kimya sənayesində kommunal xidmətlərdə müəyyən güzəştlərin edilməsinə ehtiyac var. Bu, kimya sənayesində istehsal edilən məhsulların maya dəyərinin azalmasına gətirib çıxarar. Kənd təsərrüfatının ixrac potensialı yüksəkdir. Qeyri-neft sektorunda ixrac məhsullarının təxminən 70 faizi kənd təsərrüfatı məhsullarıdır. Bu baxımdan qeyri-neft ixracatının artırılmasında kənd təsərrüfatı sahəsinin üstünlüyü böyükdür. Qısamüddətli dövrdə kənd təsərrüfatının ixrac imkanlarının artırılması daha məqbuldur. İxrac potensialı ilə yanaşı, kənd təsərrüfatı məşğulluq baxımından vacibdir. Çünki aqrar sektorda əhalinin 37 faizi çalışır. Bu kifayət qədər böyük rəqəmdir".
Vidadi ORDAHALLI
