Zakir Əhmədov: "Qurum istəyir ki, taxıla olan tələbat məhz yerli istehsal hesabına təmin edilsin"
Fövqəladə Hallar Nazirliyinin Dövlət Material Ehtiyatları Agentliyi Dövlət Taxıl Fondu üçün 2017-ci ildə ölkədə istehsal olunmuş yüksək keyfiyyətli buğdanın tədarükünü elan edib.
FHN-dən verilən məlumata görə, bu məqsədlə cari ilin iyul ayının 3-dən sentyabr ayının 1-nə kimi yerli buğda istehsalçılarından qiyməti bir ton üçün 300 AZN olmaqla Azərbaycan Respublikası Nazirlər Kabinetinin 7 iyul 2009-cu il tarixli, 105 nömrəli Qərarı ilə təsdiq edilmiş "Dövlət Taxıl Fondunun saxlanması və istifadəsi Qaydaları"nın 1 nömrəli əlavəsi ilə müəyyən edilmiş Dövlət Taxıl Fonduna tədarük olunan taxıl üçün qəbul edilmiş müvafiq keyfiyyət göstəricilərinə cavab verən buğda qəbul edəcək.
FHN-nin Dövlət Material Ehtiyatları Agentliyi Dövlət Taxıl Fondu üzrə İdarənin rəisi Zülfüqar Məmmədov mətbuata açıqlamasında deyib ki, ötən il 1,6 mln. ton buğda idxal olunub. Yerli istehsalçılar isə həmin dövr ərzində ümumilikdə 1,854 mln. ton buğda istehsal edib: "Məqsədimiz tələbatın böyük əksəriyyətini yerli istehsal hesabına ödəməkdir. Təəssüf ki, buna nail ola bilmirik. Ərzaq təhlükəsizliyini şərtləndirən amillərdən biri də kadr məsələsidir. İxtisaslı kadr olmazsa, məhsul bolluğu yaratmaq, keyfiyyətə nəzarət etmək mümkün deyil. Bazarın tələbatına uyğun sortların yaradılması üçün işlər görülməlidir. Bəzi buğda sortlarının keyfiyyət göstəriciləri qəbul olunmuş standartlara cavab vermir. Səbəb fermerlərin buğda becərilməsi zamanı yol verdikləri yanlışlıqlardır".
Maraqlıdır, ekspertlərin bununla bağlı gözləntiləri nədən ibarətdir? Məsələyə münasibət bildirən ekspert Zakir Əhmədovun sözlərinə görə, yerli fermerlərdən taxılın alınması istiqamətində ən ciddi problemlərdən biri məhz məhsulun keyfiyyətilə bağlı olub: "Məhz yerli məhsulun keyfiyyət standartının aşağı olması Fondun bu məhsulu almasında çətinliklər yaradıb. Ona görə də Dövlət Taxıl Fondu yüksək keyfiyyətli buğdanı idxal etməli olub. Yaranmış vəziyyət yerli buğda istehsalı sahəsində mövcud olan problemin həll edilməsini olduqca vacib edir. Fermer taxıl istehsal edir. Sonra məlum olur ki, onun keyfiyyəti standartlara uyğun gəlmir. Ona görə də fermerlər bundan ciddi nəticə çıxarmalı və keyfiyyətli buğda istehsalına önəm verməlidir. Mövcud problem ardıcıl olaraq hər il müşahidə olunur. Halbuki, FHN-in bu yöndə təşəbbüsü təqdirəlayiqdir. Qurum istəyir ki, taxıla olan tələbat məhz yerli istehsal hesabına təmin edilsin. Bəzən fermerlər söhbətin məhz müəyyən standartlara cavab verən taxıldan getdiyinin fərqində olmur. Ona görə də fermerlərə bu istiqamətdə təlimlər keçirilməlidir. Onlara izah edilməlidir ki, hansı keyfiyyətli taxılı alsınlar. Həmin keyfiyyət standartlarına uyğun olan taxıl istehsalı ilə bağlı fermerlər maarifləndirilməlidir. Onlar bilməlidir ki, keyfiyyətsiz taxıl Dövlət Taxıl Fondu tərəfindən alınmır. Ona görə də problemin həlli fermerlərin gəlirlərini artıracaq, idxalın məhdudlaşdırılmasına səbəb olacaq. Nəticədə mövcud keyfiyyət standartlarına uyğun buğda istehsalı həm fermerlər, həm də ölkəmiz üçün kifayət qədər faydalı olacaq".
Vidadi ORDAHALLI
