Tahir Mirkişili: "Göstərilən dövr ərzində fiskal siyasətin iqtisadiyyata müsbət təsirinə nail olunub"
Dövlət Gömrük Komitəsinin məlumatına görə, yanvar-may aylarında xarici ticarət dövriyyəsinin həcmi 7267 milyon dollar, o cümlədən həmin məbləğin 4450,1 milyon dollarını ixrac, idxal isə 2816,9 milyon dollar təşkil edib. Beləliklə, ticarət dövriyyəsində müsbət saldo 1633,2 milyon dollar olub. Ötən ilin eyni dövründə isə 281 milyon dollarlıq mənfi saldo qeydə alınıb. İxracın artımını şərtləndirən əsas amillər neft hasilatının azalmasına baxmayaraq, dünya bazarlarında qiymətin yüksəlməsi, həmçinin, təbii qaz hasilatı həcminin əhəmiyyətli artımıdır.
Reallıq ondan ibarətdir ki, 2014-cü ildən etibarən dünyanı ciddi şəkildə təhdid edən iqtisadi və maliyyə böhranına rəğmən, Azərbaycan iqtisadiyyatı özünün inkişaf tempini davam etdirir. Düzdür, böhranın ilk illərində ölkəmiz də müəyyən dərəcədə bundan əziyyət çəksə də, qısa zamanda həyata keçirilən antiböhran tədbirləri, iqtisadiyyatın şaxələndirilməsi istiqamətində həyata keçirilən işlər, ən əsası qeyri-neft sektorunun daha da inkişaf etdirilməsi yönündə atılan addımlar Azərbaycanın dünyada iqtisadi sferada cərəyan edən mənfi tendensiyadan minimum şəkildə zərər görməsinə zəmin yaratdı. Ötən müddət ərzində atılan addımlar və həyata keçirilən uğurlu iqtisadi islahatlar nəticəsində əldə edilən nailiyyətlər fonunda bunu aydın görmək mümkündür. Ortada olan mənzərə ondan ibarətdir ki, iqtisadiyyatın bütün sahələrində artım tempi müşahidə edilir. Bu müsbət dinamika 2017-ci ilin birinci rübünün yekunlarında da özünü göstərdi. Ticarət dövriyyəsində qeydə alınan müsbət saldo bunu deməyə əsas verir. Halbuki, ötən ilin eyni dövründə mənfi saldo qeydə alınmışdı. Bu bir daha ölkədə iqtisadi inkişafın olmasından xəbər verir.
Sözügedən məsələni dəyərləndirən millət vəkili Tahir Mirkişili hesab edir ki, Prezident İlham Əliyevin iradəsi ilə aparılan iqtisadi islahatlar nəticəsində ölkə iqtisadiyyatı, xüsusilə də qeyri-neft sektoru davamlı inkişaf mərhələsinə qədəm qoyub: "Belə ki, 2017-ci ilin yanvar-may aylarında qeyri-neft ÜDM-də 2.3 faiz, qeyri-neft sənayesində 3.9 faiz, aqrar sektorda istehsalın həcmində 2 faiz artım qeydə alınıb. Bu dövrdə xarici ticarət dövriyyəsi 1.6 milyard dollar həcmində müsbət saldo ilə yekunlaşıb. Göstərilən dövr ərzində fiskal siyasətin iqtisadiyyata müsbət təsirinə nail olunub. Belə ki, 2017-ci ilin ilk 5 ayında 6430 vahid yeni vergi ödəyicisi qeydə alınıb. Aparılan siyasətin nəticələri özünü göstərməyə başlayıb ki, bu da yeni vergi və gəlir mənbələrinin yaranmasına gətirib çıxarıb. Bütün bunların nəticələri büdcə gəlirlərinin artımında öz əksini tapıb. Belə ki, 2017-ci ilin 1-ci rübündə büdcə gəlirləri proqnozdan 3.4 faiz artıq təmin olunub. Vergi yığımları proqnozdan 3.8 faiz, gömrük rüsumları yığımları isə proqnozdan 17.5 faiz artıq təmin edilib. Təbii olaraq büdcə gəlirlərinin artması 2017-ci il büdcə layihəsinə yenidən baxılaraq gəlir və xərclərdə optimallaşdırma işlərinin aparılmasına yönəldilib. Artan büdcə gəlirlərinin böyük bir hissəsi sosial sferaya yönləndirilməklə, əhalinin sosial vəziyyətinin daha da yaxşılaşdırılmasına hədəflənib. 2016-cı ildən etibarən həyata keçirilən genişmiqyaslı institusional islahatlar prosesinin müvəffəqiyyəti idarəetmə müstəvisində daha çevik qərarların qəbulu ilə təmin edilə bilər".
Vidadi ORDAHALLI
