Aydın Hüseynov: "Bununla yanaşı, ölkədə mövcud ictimai-siyasi stabillik, viza sisteminin sadələşdirilməsi..."
Son illər Azərbaycanda yaradılan biznes mühiti, həmçinin özəl sahəyə dövlət dəstəyinin göstərilməsi ölkədə sahibkarlığın sürətli inkişafına səbəb olur. Prezidentin fərmanına uyğun olaraq, Azərbaycanda biznes və investisiya mühitinin daha da yaxşılaşdırılması, o cümlədən prosedurların sadələşdirilməsi, elektron xidmətlərin əhatə dairəsinin genişləndirilməsi, əsassız müdaxilələrin qarşısının alınması və digər istiqamətlər üzrə işlər davam etdirilməkdədir.
Dövlətin qarşısında duran mühüm vəzifələrdən biri də ölkədə qeyri-neft sektorunun inkişafı üçün əlverişli mühitin yaradılması və özəl sektorun iqtisadi fəallığının stimullaşdırılmasından ibarətdir.
Sürətlə inkişaf etməkdə olan qeyri-neft sahələrindən biri də turizmdir. Hazırda Azərbaycana axın edən turistlərin sayı durmadan artır. Buna bir neçə səbəb var. Belə ki, Azərbaycanın gözəl təbiəti, xoş iqlimi olmaqla yanaşı, dövlət tərəfindən də ölkəmizin təbliğ edilməsi də turistləri cəlb etməkdə mühüm rol oynayır. Keçirilən müxtəlif beynəlxalq idman yarışları, eləcə də müxtəlif tədbirlər ölkənin müsbət imicini formalaşdırmaqda əvəzedilməz bir missiyanı yerinə yetirir. Buna sübut olaraq ölkəyə gələn turistlərin sayına, xərclədiyi vəsaitə baxmaq kifayət edir. Məsələn, ötən ilin ilk 3 ayında xarici turistlər Azərbaycanda 40 milyon 629 min manat bank vasitəsilə ödəmələr etmişdilərsə, bu ilin eyni dövründə məbləğ 91 milyon 134 min manat olub. Bu rəqəmlər açıq-aydın göstərir ki, qeyri-neft sektorunda turizm sahəsi inkişaf edir. Turizmlə yanaşı, digər sahələrdə də inkişaf var.
Məsələyə münasibət bildirən millət vəkili Aydın Hüseynovun sözlərinə görə, bütün bunlar turizm sektorunun dinamik inkişafının göstəricisidir: "Azərbaycanda turizm sektorunun inkişafına təkan verən bir sıra amil var. Buna təkan verən amillərdən biri ondan ibarətdir ki, ölkəmizdə çox böyük idman və digər yarışlar keçirilir. Belə tədbirlər, istər-istəməz, turistlərin diqqətini Azərbaycana yönəldir. Bu il keçirilən İslam Həmrəyliyi Oyunları, "Formula-1" yarışması turizm axınına öz töhfəsini verib. Bununla yanaşı, Azərbaycanda mövcud ictimai-siyasi stabillik, viza sisteminin sadələşdirilməsi, turizm sektoruna aid olan sahələrin beynəlxalq standartlara uyğun olması, turistlərin istirahət etməsi üçün bütün şəraitin mövcudluğu gələnlərin sayının çoxalmasına öz təsirini göstərir. Onu da nəzərə almaq lazımdır ki, turizm sektorunda xidmət səviyyəsi yüksəlməkdədir. Belə ki, turistlərin ölkəyə cəlb olunmasında vacib faktorlardan biri də budur. O üzdən, ilbəil ölkəyə gələn turistlərin sayı artır".
Vidadi ORDAHALLI
