Pərviz Heydərov: "Ölkəmizdə bu işə sərmayə qoyulubsa, müvafiq tələblərə əməl etməklə, əslində, çox perspektivli bir gəlir mənbəyi qazanmaq mümkündür"
Məlum olduğu kimi, İsmayıllının Diyallı kəndi ərazisində "İSMA Bikes" velosiped istehsalı zavodunun açılışı olub. Artıq həmin zavodun istehsalı olan velosipedlər satışa çıxarılır. Azərbaycanın "İSMA Bikes" şirkəti iyul ayından etibarən öz istehsalı olan velosipedlərin satışına başlayacaq. Bu barədə şirkətin baş direktoru Elçin Qəhrəmanov məlumat verib.
Onun sözlərinə görə, istehsal olunan məhsulların geniş çeşidi olacaq: "Biz bazara 40-dək müxtəlif model velosiped, o cümlədən uşaq, şəhər və dağ velosipedləri çıxarmağı planlaşdırırıq. Biz bu il 5-10 min velosiped istehsal etməyi nəzərdə tutmuşuq. Gələn il isə 30 minədək velosiped istehsal oluna bilər".
Velosipedlərin qiymətlərinə gəldikdə isə, o qeyd edib ki, qiymət 70-2500 manatarası olacaq. O, həmçinin, əlavə edib ki, digər şirkətlərin də əməkdaşlıq marağına baxmayaraq, velosipedlərin satışı bilavasitə "İSMA Bikes" mağazası tərəfindən metronun "20 Yanvar" stansiyası yaxınlığında yerləşən velotrek ərazisində həyata keçiriləcək.
Artıq Azərbaycanın özünün velosipedi olacaq. Maraqlıdır, Azərbaycan istehsalı olan velosiped sənayesinin gələcəyi necə görünür? Nə etmək lazımdır ki, hər bir ailə övladı üçün xarici ölkələrin istehsalı olan velosipedi deyil, yerli modeli alsın? Bir sözlə, yerli velosipedə necə maraq yaratmaq olar?
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, velosiped dünyada geniş istifadə olunan bir minik vasitəsidir. Bu sahədə artıq geniş və köklü bir biznes şəbəkəsi mövcuddur: "Yəni müvafiq bazar var. Qeyd edim ki, bu bazara girmək heç də asan deyil.
Keçən il Azərbaycanda İsmayıllı rayonu ərazisində ilk "İSMA Bikes" adlı velosiped zavodu açıldı. Xatırladım ki, həmin tədbirdə cənab Prezident də iştirak etmişdi. Bunun üzərindən 1 ilə yaxın müddət keçir. Bəziləri bu obyektin açılışına, ümumiyyətlə, ölkəmizdə bu sahəyə sərmayə qoyuluşuna birmənalı yanaşmırdı. Lakin iqtisadiyyatda marketinq deyilən bir sahə və istiqamət var. Sözügedən istehsal növü spesifik bir biznesdir, keyfiyyət və konkret məqsəd olarsa, niyə də böyük müvəffəqiyyət və qazanc əldə olunmasın?!
Ancaq burada müəyyən nüanslar var. Bayaq qeyd etdim ki, bu sahədə geniş və köklü bir biznes şəbəkəsi - bazar mövcuddur. Yəni biz qabaqcadan müəyyən etməliyik ki, kimin üçün velosiped "icad" etmək istəyirik. Çünki burada keyfiyyət və qiymət məsələsi önəmlidir. Məsələn, bu gün hər üç yerli alıcıdan 2-si Rusiya istehsalı olan velosipedə üstünlük verir. Söhbət sadə alıcı təbəqəsindən gedir. Çin istehsalı keyfiyyətsiz hesab edilir. Alıcı var ki, Qərb ölkələrinin istehsalına pul verir. Belə şəraitdə yerli istehsala məxsus velosipedlərin əvvəla qiyməti sərfəli olmalı, ikincisi də, ən azı, Çin istehsalından keyfiyyəti ilə fərqlənməlidir. Alıcını nəyisə almağa məcbur etmək olmaz. Məsələn, "Synergy Group" şirkətlər qrupuna daxil olan "İSMA Bikes" zavodunun istehsal etdiyi velosipedlərin qiymətinin 70-2500 manatarası olacağı deyilir. 500 manatdan yuxarı dəyəri olan velosipedlərlə kənar bazarlara da çıxmaq olar. Ancaq bu, xarici analoqları ilə rəqabətə davamlı olacaqmı?
Daxili bazar elədir ki, sabah idxalı da məhdudlaşdırmaq olar. Amma bu, effektli siyasət sayıla bilərmi? Təbii ki, yox. Düşünürəm ki, ölkəmizdə bu işə sərmayə qoyulubsa, müvafiq tələblərə də əməl etməklə, əslində, çox perspektivli bir gəlir mənbəyi qazanmaq mümkündür".
Günel CƏLİLOVA
