Əkrəm Həsənov: "Ancaq artıq banklar bu sahəyə maliyyə ayırmır. Səbəb isə bank sisteminin ağır vəziyyətdə olmasıdır"
Məlumatlara görə, ötən il bankların 30 faizi internet bankçılıq xidmətlərinə təsir edən təhlükəsizlik problemi yaşayıb. Bu barədə "Kaspersky Lab"ın maliyyə qurumlarında təhlükəsizlik risqləri anketinin nəticələrinə əsasən xəbər verilir. Buna səbəb olan əsas faktorlar müştərilərə qarşı hazırlanan kimliyin təsdiqi hücumları və müştəri məlumatlarının fırıldaqçılıq məqsədilə istifadəsidir.
Məlumata əsasən, bankların 24 faizi rəqəmsal və online bankçılıq xidmətlərini reallaşdırarkən müştərilərinin kimliklərini təsdiq etməkdə çətinlik çəkir.
"Kaspersky Lab" şirkətinin Fırıldaqçılığın qarşısının alınması şöbəsinin rəhbəri Aleksandr Yermakoviç rəqəmsal və mobil kanalların təhlükəsizliyini təmin etmək üçün fərqli yollar düşünən bankların, təbii olaraq, müştərilərin üzərinə çox yük qoymaq istəmədiklərini deyib: "Online bankçılıq maliyyə işlərini saniyələr içində reallaşdırmağı təmin etməlidir. Bu onun əsas faydalarından biridir. Bu səbəbdən də yeni təhlükəsizlik addımları əlavə etmədən bankları qoruyacaq yeni texnologiyalar üzərində işləyirik".
İnternet bankçılıq sahəsində nə kimi təhlükəsizlik problemləri qeydə alınır? Bu problemlər necə həll olunmalıdır?
Mövzu ilə əlaqədar bank sahəsi üzrə mütəxəssis Əkrəm Həsənova müraciət etdik. Ə.Həsənov "Bakı-Xəbər"ə açıqlamasında qeyd etdi ki, internet bankçılıq sahəsində problem tək Azərbaycanda yox, bütün dünyada qeydə alınır. Bu məsələ bütün dünya üzrə çox əhəmiyyətli və ciddi problemdir: "Haker problemi hətta ABŞ-da keçirilən prezident seçkilərində belə qeydə alındı. Bank sistemində isə internet təhlükəsizliyi önəmlidir. Çünki bank sistemində söhbət puldan gedir. Azərbaycan bankları da məlum problemdən kənarda qala bilməz. Çünki informasiya texnologiyalarına malikik, lakin bu sahə üzrə mütəxəssislərimiz yetərincə deyil. Rusiyada internet bankçılıq sahəsi üzrə çalışan mütəxəssislər çox olsa da, həmin ölkənin bankları haker problemi ilə üzləşir".
İnternet bankçılıq təhlükəsizliyinin niyə məhz Azərbaycanda ciddiləşməsinə gəlincə, həmsöhbətimiz bildirdi ki, artıq banklar adıçəkilən sahəyə diqqət ayırmır: "Əvvəllər banklar hakerlərin öhdəsindən gəlirdi. Banklar tərəfindən məlum məsələnin həlli istiqamətində vəsait ayrılırdı. İnternet bankçılığın təhlükəsizliyinin təmini ilə bağlı işçilər işə cəlb olunurdu. Əvvəlki dönəmlərdə bu sahədə problem yaşansa belə, müştəriyə dəyən zərəri bank özü həll edirdi. Təki məlum məsələ ictimailəşməsin.
Ancaq artıq banklar bu sahəyə maliyyə ayırmır. Səbəb isə bank sisteminin ağır vəziyyətdə olmasıdır".
Ə.Həsənovun fikrincə, banklarda internet təhlükəsizliyinin təmin olunmasına dövlət diqqət ayırmalıdır.
Günel CƏLİLOVA
