Rəşad Həsənov: "Toxuculuq, geyim və dəri məmulatlarının istehsalı sahələrindən əldə olunan gəlir ötən illərlə müqayisədə artıb"
Azərbaycanda qeyri-neft sektorunun inkişafı dövlətin qarşıya qoyduğu prioritet vəzifələrdən biri olaraq qalır. Toxuculuq sənayesi, geyim, dəri və dəridən məmulatların, ayaqqabıların istehsalı sahələrində 91,8 milyon manat dəyərində məhsul istehsal edilib.
Dövlət Statistika Komitəsinin yaydığı məlumata əsasən, əvvəlki ilin yanvar-may ayları ilə müqayisədə toxuculuq sənayesində 2,2 dəfə, geyim istehsalında 62,1 faiz artım müşahidə olunub.
Məsələyə dair fikir bildirən iqtisadçı-ekspert Rəşad Həsənov bizimlə söhbətində qeyd etdi ki, qeyri-neft sektorunun inkişafı ilə bağlı görülən işlər artıq öz bəhrəsini verir: "Geyim istehsalında irəliləyiş qeydə alınır. Belə ki, 2015-ci ildə yaşanan devalvasiya nəticəsində xaricdən alınan geyimlər baha başa gəldiyi üçün, yüngül sənayenin inkişafına ehtiyac yarandı. Bu istiqamətdə müəyyən işlər görüldü. Trikotaj sexlər açıldı və bu sahənin inkişafı ilə bağlı dövlət tərəfindən müəyyən addımlar atıldı".
Həmsöhbətimizin sözlərinə görə, Azərbaycanda geyim istehsalının inkişafı danılmazdır. Müxtəlif geyim növləri üzrə inkişaf qeydə alınır: "Hətta Azərbaycan istehsalı olan köynəklər xaricə ixrac olunur".
İqtisadçı bildirdi ki, geyim keyfiyyət standartı daim gözlənilməlidir. Çünki hazırda tekstil bazarında məhsulların rəqabətliliyi mühüm məqamlardan biridir: "Danılmaz faktdır ki, bu gün tekstil sahəsində kifayət qədər şirkət var. Onların istehsal etdikləri məhsulların, demək olar ki, əksəriyyəti yerli istehsaldan üstündür. Bu səbəbdən də yerli sektorun ixrac imkanlarının genişləndirilməsində əsasən müasir beynəlxalq standartlara uyğun məhsulun istehsalına diqqət artırılmalıdır".
R.Həsənovun sözlərinə görə, toxuculuq, geyim və dəri məmulatlarının istehsalı sahələrindən əldə olunan gəlir ötən illərlə müqayisədə artıb. Geyim istehsalının 62 faizdən çox artması həqiqəti əks etdirən rəqəmdir. Onun fikrincə, yüngül sənayeni daha da inkişaf etdirmək lazımdır.
Günel CƏLİLOVA
