Zakir Əhmədov: "Belə olarsa, ölkədə sosial problemlərin həlli bir az da sürətlənəcək"
1-ci Vitse-prezident Mehriban Əliyeva iyunun 27-də Masazır qəsəbəsində məcburi köçkünlərə yeni evlərin təqdim olunması mərasimində sahibkarları, iş adamlarını xeyriyyəçiliyə çağırıb: "Mən hesab edirəm ki, ölkəmizdə fəaliyyət göstərən biznes strukturları, iş adamları, özəl sektor sosial məsuliyyət haqqında ciddi düşünməli və cəmiyyətimizi narahat edən problemlərin həllində fəal iştirak etməlidirlər. Xüsusilə də onlar bizim hər birimiz üçün ən ağır problem olan qaçqınların və məcburi köçkünlərin yaşayış şəraitini yaxşılaşdırmaq işində iştirak etməlidirlər".
Mehriban Əliyeva deyib ki, Masazırda və Mehdiabadda iş adamlarının yardımı ilə bu gün 214 ailənin yaşayış şəraiti yaxşılaşdırılıb.
O da məlumdur ki, sahibkarlara xeyli şərait yaradılıb. Sahibkarlığın inkişafı üçün çox işlər görülüb. Bu gün Azərbaycan iqtisadiyyatının böyük hissəsi - 80 faizdən çoxu özəl sektorda formalaşır. Bu, son illər ərzində görülmüş işlərin nəticəsidir. Ancaq son dövrdə sahibkarlığın inkişafı ilə bağlı kifayət qədər sərəncam, fərman verilib, hüquqi-normativ sənədlər qəbul edilib. Sahibkarlar görür ki, dövlət hər mənada onların yanındadır və əsas dəstəkçisidir. Məlumdur ki, indiki dövrdə sahibkarlar bir sıra sahələrə investisiya qoymağa ehtiyat edir. Halbuki, sahibkarlar bu kimi məsələlərdə fəallıq göstərməli, ölkədəki problemlərin həllində yaxından iştirak etməlidir.
Sözügedən məsələni "Bakı-Xəbər"ə şərh edən ekspert Zakir Əhmədovun sözlərinə görə, burada söhbət sahibkarların ölkədə sosial-iqtisadi problemlərin həllində yaxından iştirak etməsindən gedir: "Məlum məsələdir ki, dövlət bununla bağlı üzərinə düşən vəzifəni mümkün olan qədər yerinə yetirir. Son illər dövlət vəsaiti hesabına infrastruktur əsaslı şəkildə yenidən qurulub, qaçqın və məcburi köçkünlərin xeyli hissəsi yeni mənzillərlə təmin edilib. Həmçinin, dövlət vəsaiti hesabına iş yerləri açılıb. Aydın məsələdir ki, sahibkarlıq fəaliyyəti üçün tələb olunan faktorlardan biri də infrastrukturdur. İnfrastruktur olduğu halda, sahibkar yeni obyektlərin inşa olunmasında, istehsalat və xidmət sahələrinin yaradılmasında maraqlı olur. Ona görə də indiki dövrdə hər bir sahibkar bu məsələlərə sosial məsuliyyət prizmasından yanaşsa, daha yaxşı olar. Bu, ölkədə qeyri-neft sektorunun inkişafına və ən başlıcası, neftdən asılılığın azalmasına müsbət təkan verəcək. Nəticə etibarilə belə vəziyyət yeni iş yerlərinin açılması deməkdir. Bu sahədə bütün yükü, görüləsi işləri dövlətin üzərinə qoymaq doğru yanaşma deyil. Gərək sahibkarlar da yerli istehsalatın artmasında maraqlı olsun. Belə olarsa, o zaman ölkədə sosial problemlərin həlli bir az da sürətlənəcək. Dövlətin yükü yüngülləşəcək".
Vidadi ORDAHALLI
