Vüqar Oruc: "Müraciətin çoxluğuna baxmayaraq, adından da göründüyü kimi, ehtiyacı olan təbəqələrə verilməlidir"
Ötən ilin dekabrında Yasamal rayonu ərazisində birinci sosial evin tikintisinə start verilib. Məlumat üçün qeyd edək ki, sosial evlərin tikintisi ilə Azərbaycan Respublikasının Prezidenti yanında Mənzil İnşaatı Dövlət Agentliyi məşğul olur. Agentliyin tabeliyində olan "MİDA" MMC sifarişçi qismində çoxmərtəbəli yaşayış binalarının, ictimai-işgüzar zonaların və başqa obyektlərin tikintisini həyata keçirəcək. Hazırda Yasamalda tiikilən ilk sosial evlər 2018-ci ilin ikinci yarısında istifadəyə veriləcək. Həmçinin, Hövsan qəsəbəsində həyata keçiriləcək ikinci layihə üzərində iş gedir, həmin ərazidə 3300-dək mənzil tikiləcək.
Məlumata görə, sosial mənzillərin dəyəri yerləşdiyi məkandan və digər şərtlərdən asılı olacaq. Sosial evlərin bazar qiymətindən 20-25 faiz ucuz olacağı deyilir.
Digər tərəfdən, bu il iyunun 1-dən Bakıda sosial evlərə qeydiyyat başlayıb. Güzəştli mənzilin əldə edilməsi üçün müraciət gücləndirilmiş elektron imza vasitəsilə mümkün olacaq. Müraciət edənlərin sayında böyük aktivlik müşahidə edilir. Bu isə onu deməyə əsas verir ki, müraciət müddətində belə ev almaq istəyənlərin sayı gözlənildiyindən çox ola bilər. Ancaq müraciətlərin çox olmasına baxmayaraq, mənzillər təyinatı üzrə satılacaq.
Bütün hallarda, bu istiqamətdə gedən işlərlə bağlı ekspertlərin gözləntiləri nədən ibarətdir? Sözügedən məsələni dəyərləndirən ekspert Vüqar Orucun fikrincə, sosial mənzillər aztəminatlı ailələr üçün nəzərdə tutulub: "Müraciətin çoxluğuna baxmayaraq, adından da göründüyü kimi, ehtiyacı olan təbəqələrə verilməlidir. Yüksək əməkhaqqı alan insanların onsuz da bu cür imkanı var. Ona görə də elə edilməlidir ki, layihədən mənzili olmayan insanlar bəhrələnsin. Nəzərə alaq ki, müəyyən qədər insan məhz ev probleminə görə ailə qurmaq üçün gecikir. O baxımdan sosial mənzillərin təyinatı üzrə paylanması vacibdir. Hesab edirəm ki, sosial mənzillər daşınmaz əmlak bazarında qiymətləri aşağı salacaq. Nəzərə alaq ki, son iki ildə bu tendensiya davamlı olaraq irəliləyir. Tendensiya 2018-ci ildə də davam edəcək. Sosial mənzillərin satışa çıxarılması daşınmaz əmlak bazarında canlanma yaradacaq. Bu da ölkə iqtisadiyyatına müsbət impuls verən hadisələrdən biridir. Ümumiyyətlə, sosial mənzillərin paylanması qəbul edilən şərtlər daxilində həyata keçirilərsə, bunun müsbət nəticəsini görəcəyik. Bu günə qədər neqativ hadisələr çox olub. Bir neçə evi olan ipoteka hüququndan bəhrələnib. Odur ki, sosial xarakterli addımın hədəfi yalnız buna ehtiyacı olan təbəqə olmalıdır. Onu da nəzərə alaq ki, daşınmaz əmlak bazarı birbaşa ölkə iqtisadiyyatına bağlı olan sektordur. Daşınmaz əmlak bazarı nə qədər canlanırsa, bu bir o qədər ölkə iqtisadiyyatına müsbət təsir göstərir".
Vidadi ORDAHALLI
