Zakir Əhmədov: "Əmanətlərin bir qismi hələlik banklara qayıtmayıb və vətəndaşlarda yığım formasında saxlanır"
Xəbər verildiyi kimi, Prezident İlham Əliyev "Ödəmə qabiliyyətini itirmiş bankların rezolyusiyası və sağlamlaşdırma tədbirləri çərçivəsində qeyri-işlək (toksik) aktivlərin təqdim edilməsi Qaydası"nın təsdiq edilməsi haqqında Fərman imzalayıb.
Fərmana əsasən, Nazirlər Kabineti Azərbaycan Respublikası Prezidentinin aktlarının bu fərmana uyğunlaşdırılmasına dair təkliflərini üç ay müddətində hazırlayıb Azərbaycan Respublikasının Prezidentinə təqdim etməli; Nazirlər Kabinetinin normativ-hüquqi aktlarının bu fərmana uyğunlaşdırılmasını üç ay müddətində təmin edib Prezidentə məlumat verməli; mərkəzi icra hakimiyyəti orqanlarının normativ-hüquqi aktlarının bu fərmana uyğunlaşdırılmasını nəzarətdə saxlamalı və bunun icrası barədə beş ay müddətində Prezidentə məlumat verməlidir.
Həmçinin Maliyyə Bazarlarına Nəzarət Palatasına fərmandan irəli gələn məsələləri həll etmək, Ədliyyə Nazirliyinə isə mərkəzi icra hakimiyyəti orqanlarının normativ-hüquqi aktlarının və normativ xarakterli aktların fərmana uyğunlaşdırılmasını təmin edib Nazirlər Kabinetinə məlumat vermək tapşırılıb.
Bütövlükdə, görülən bu tədbirlər bank sektorunun sağlamlaşdırılmasında necə rol oynayacaq? Məsələyə münasibət bildirən ekspert Zakir Əhmədovun sözlərinə görə, hökumət Azərbaycanda bank sektorunun sağlamlaşdırılması istiqamətində davamlı olaraq tədbirlər görür: "Sonuncu sözügedən fərman da bunun tərkib hissəsidir. Çünki ölkə iqtisadiyyatının dayanıqlı və davamlı inkişafını təmin etmək üçün güclü bank sistemi olmalıdır. Sahibkarlar banklara etibar etməlidir. Bu da bankların sağlamlaşdırılmasından keçir. Müqayisə üçün qeyd edək ki, Azərbaycanda fəaliyyət göstərən kommersiya banklarında əhalinin yerləşdirdiyi əmanətlərin ümumi həcmi 2017-ci il mart ayının 1-nə 7 milyard 101,8 milyon manat təşkil edib. Fevralın 1-nə olan analoji göstərici ilə müqayisədə əmanətlərin həcmi 645,4 milyon manat və ya 8,33 faiz azalıb. Nə qədər ki, bu sahədə müəyyən problemlər tam həll olunmayıb, o zaman etimad aşağı olacaq. Ancaq bu ilin fevral-mart, eləcə də aprel ayında manatın möhkəmlənməsi dollarda olan əmanətlərin bank istifadəsinin dəyərinin azalmasına gətirib çıxarıb. Nəzərə alaq ki, depozitlərin əhəmiyyətli hissəsi xarici valyutada və xüsusilə də ABŞ dollarındadır. Nəticədə dollar dəyər itirdikcə, onların milli valyuta ifadəsində dəyəri azalır. Bu da ümumi depozit portfelinin milli valyuta ifadəsində azalmasına gətirib çıxarıb. Bu baxımdan valyutanın dəyişməsi birbaşa depozitlərin məbləğinin azalmasına gətirib çıxarıb. Monitorinqlər göstərir ki, manat möhkəmləndiyi üçün dollarda valyuta saxlayan vətəndaşların bir qismi depozitlərini geri çəkərək onu manata çevirməyə üstünlük verir. Bu da manatın fevralın əvvəlindən başlayaraq möhkəmlənməsi ilə bağlıdır. Nəticədə xarici valyutada depoziti olan vətəndaşların bir qismi dolların daha çox dəyər itirəcəyindən ehtiyatlanaraq əmanətlərini geri götürüb və onu manata çevirib. Əmanətlərin bir qismi hələlik banklara qayıtmayıb və vətəndaşlarda yığım formasında saxlanır. Bu da ümumi depozit məbləğinə təsir göstərir. Ona görə də banklara marağın, inamın artırılması olduqca vacibdir ki, vətəndaşlar əmanətlərini banka yerləşdirsin".
Vidadi ORDAHALLI
