Pərviz Heydərov: "Neftin qiymətinin 2014-cü ilin iyun ayından bəri 3-4 dəfədən çox düşməsi, əksər neft ölkələrindən fərqli olaraq, Azərbaycana çox təsir etmədi"
Azərbaycan iqtisadiyyatı ortamüddətli perspektivdə ildə 2-3 faiz artım nümayiş etdirəcək. Bu barədə Beynəlxalq Valyuta Fondunun (BVF) Azərbaycan üzrə missiyasının rəhbəri Məhəmməd əl-Qorçi media nümayəndələrinə açıqlamasında deyib. Onun sözlərinə görə, cari ildə Azərbaycan iqtisadiyyatında vəziyyət ötən illə müqayisədə daha yaxşı olacaq.
Missiya rəhbəri ötən ilin çox çətin il olduğunu qeyd edib: "Azərbaycan iqtisadiyyatı tədricən resessiyadan çıxdı, lakin ümumilikdə vəziyyət bir qədər çətin olaraq qalır. Düşünürəm ki, ölkə ÜDM-i ortamüddətli perspektivdə 2-3 faiz artmaqda davam edəcək".
Əl-Qorçi bildirib ki, Azərbaycan iqtisadiyyatındakı cüzi resessiya ilk növbədə neftin qiymətinin kəskin azalması ilə əlaqədardır: "Neftin qiymətinin kəskin azalmasından sonra, digər ixracatçı ölkələr kimi, Azərbaycan da müəyyən çətinliklərlə üzləşdi. Neftin qiyməti çox aşağı düşdü və təbii ki, iqtisadiyyata, xüsusən də 2015-2016-cı illərdə təsir etdi. Bunun nəticəsi kimi biz 2016-cı ildə Azərbaycan iqtisadiyyatının cüzi azaldığını müşahidə etdik".
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, BVF missiyası rəhbərinin iqtisadiyyatımızın yaxın illərdə artımı ilə bağlı irəli sürdüyü proqnoz hökumətin gözləntiləri ilə eynidir: "Xatırladım ki, İqtisadiyyat Nazirliyinin cari il və sonrakı 3 il üzrə makroiqtisadi proqnozlar açıqlamasında 2017-ci ildə ölkədə ÜDM-in real artımının 1,0 % olmaqla, 61,4 milyard manat təşkil edəcəyi, 2018-2020-ci illər ərzində isə müvafiq tendensiyanın davam etməklə, 2020-ci ildə sözügedən tempin 2,4 faizə çatacağı bildirilmişdi. Odur ki, buradan da göründüyü kimi, proqnozlar təqribən üst-üstə düşür.
Mən əvvəlki şərhlərimdə də bir neçə dəfə vurğulamışam ki, əslində, BVF başda olmaqla, digər xarici maliyyə qurumlarının ölkəmizlə bağlı gözləntiləri başqa cür idi. Belə ki, onlar güman edirdilər ki, neftin qiymətinin enməsi ilə əlaqədar Azərbaycanın iqtisadi vəziyyəti daha pis olacaq. Yəni itkilərimiz indikindən qat-qat artıq olmalı idi. Odur ki, bərpa prosesi də gec başlamalı idi. Ancaq, məlum olduğu kimi, neftin qiymətinin 2014-cü ilin iyun ayından bəri 3-4 dəfədən çox düşməsi, əksər neft ölkələrindən fərqli olaraq, Azərbaycanı çox "vurmadı". Belə ki, təzyiqə kifayət qədər yaxşı tab gətirə bildik. Mərkəzi Bank üzrə 15 milyard dollar həcmində rəsmi valyuta ehtiyatını itirsək də, vəziyyət kritik həddə düşmədi. Bu da ölkəmizin neft amilinə dayanıqlı makroiqtisadi durumunun kifayət qədər möhkəm olduğunu göstərdi. Qeyd olunan amil çox yüksək qiymətləndirilməlidir.
Ona görə də hazırda artıq bərpa prosesi haqda danışmaq məqamı yetişib. Bu il proses özünü ilkin olaraq büruzə verəcək. Ümumiyyətlə, həm bu il və həm də sonrakı 3 il ərzində fiskal yığcamlaşdırma tədbirlərinin davam etdirilməsi, dövlət büdcəsi xərclərinin daha qənaətlə icra edilməsi, dövlət sektorunda xərclərin səmərəliliyinin artırılması, dövlətin borc və öhdəliklərinin vaxtında və tam həcmdə yerinə yetirilməsi, dövlət borcunun sərt limitləşdirilməsi, büdcəyə Neft Fondundan transferin az proqnozlaşdırılması və getdikcə azaldılması, qeyri-neft sektoru və onun aparıcı sahələrində artımın, habelə qeyri-neft ixracına əsaslanan imkanların dəstəklənməsi siyasəti hesabına ÜDM istehsalı ola bilsin ki, hətta 3 %-dən də çox genişlənəcək".
Günel CƏLİLOVA
