Turizmin inkişafı istiqamətində görülən işlər öz müsbət nəticələrini verməkdədir. Söhbət həm Azərbaycana gələn turistlərin sayının artmasından, həm də Azərbaycanın əcnəbilər arasında populyarlaşmasından gedir. Proseslər göstərir ki, qarşıdakı dövr ərzində Azərbaycana daha çox sayda turist gələcək.
Bu arada Bakı şəhəri 2017-ci ildə turistlər üçün ən yaxşı 10 istiqamət sırasına daxil edilib. Turistlər üçün nəzərdə tutulan "Trip Advisor" tətbiqinin versiyasına görə, Bakı 2017-ci ildə səyahət üçün ən yaxşı istiqamətlər siyahısında 5-ci sırada qərarlaşıb. Qeyd edək ki, turistlər üçün ən yaxşı səyahət istiqamətləri səyahət edənlərin müsbət rəyləri, göstərilən məkanda görməli və əyləncə yerlərinin sayı, xidmətin keyfiyyəti kimi kriteriyalar əsasında müəyyənləşdirilir. Gələn il ərzində Azərbaycana MDB və ərəb ölkələrindən, həmçinin Avropadan gələnlərin sayında böyük artım olması da gözləntilər sırasındadır.
Bu arada Rusiya KİV-lərinin verdiyi məlumata görə, artıq Yeni İl bayramı ərəfəsində ölkəmizə Rusiyadan gələn turistlərin sayında artım müşahidə olunur. Ötən ilin analoji dövrü ilə müqayisədə artım 69 faizdir. Kiprə gedən rusların sayında 70 faiz artım olub. Yunanıstanda isə 53 faiz artım müşahidə olunub. Rusların ən çox üz tutduğu istiqamət Tailand olub. İkinci pillədə İtaliya, üçüncü yerdə isə Yunanıstan qərarlaşır. Rusiyalı turistlərin ən çox getdiyi ölkələr sırasında Azərbaycanın adının yer alması isə yüksək qiymətləndirilir. Yeni ildə ölkəmizə gələn rus turistlərin sayında daha çox artım gözlənir. Ekspertlər isə bildirir ki, yüksək xidmət, eləcə də manatın devalvasiyası ölkəyə xarici turistlərin sayını bundan sonra da artıracaq. 2017-ci ildə Azərbaycana, əsasən Rusiya, İran, ərəb ölkələri, xüsusilə də İraqdan çox sayda turistin gələcəyi gözlənir. Ümumiyyətlə, son illərdə Azərbaycana Rusiya və İrandan, bu il isə ərəb ölkələrindən gələn turistlərin sayı artıb. Hətta İndoneziyadan da Azərbaycana turistlər gəlir. Bu ölkənin turistləri Azərbaycanda dincəlməyə tədricən böyük maraq göstərir. Araşdırmalar göstərir ki, yerli turistlərlə yanaşı, xarici turistlər hazırda istirahətlərini Şamaxı, İsmayıllı, Şəki-Oğuz, Qəbələ, Quba, Qusarda keçirməyə maraq göstərir. Bu yerlərdəki şərait, infrastruktur yüksək səviyyədədir. Bir maraqlı məqamı da qeyd edək ki, 1990-cı ildən 2000-ci illərin ortalarına qədər Azərbaycanda şirkətlər əsasən xaricə turist göndərməklə məşğul olduğu halda, hazırda 50-dən çox şirkət ölkəyə turist gətirir. Ölkəmizə uzaq Şərqdən, hətta Çin və Yaponiyadan da turist gəlişini təmin etmək üçün müvafiq addımlar atılır. Azərbaycan Turizm Assosiasiyası (ATA) İdarə heyətinin sədri Nahid Bağırov qeyd edir ki, dünyada xarici ölkələrə ən çox səfər edənlər yapon turistləridir. Ona görə də Yaponiyadan da turistlərin ölkəmizə cəlb olunması istiqamətində işlər görülür. Onun sözlərinə görə, məhz bu məqsədlə bir ay bundan əvvəl Yaponiyadan üzvlərinin sayı 10 minə çatan və böyük gücə malik turizm assosiasiyasının nümayəndələri Bakıya gəlib: "Qarşılıqlı olaraq sərgilərdə iştirak edirik. Yaponlar çox səmərəli, faydalı turistlər hesab edilir. Çünki onlardan birinin gəlişi digər onunun gəlişinə səbəb olur. Sadəcə, aramızdakı məsafə çox böyükdür. Yaponlar isə təkcə Azərbaycana yox, ümumilikdə regiona gəlməyə üstünlük verirlər. Yəni onlar səfərə çıxmışkən Qafqazdakı hər üç ölkəyə gedirlər. Bununla belə, bu istiqamətdə işlər görülür və ümid edirəm ki, yaponları da ölkəmizə cəlb edə biləcəyik. Bunun üçün Azərbaycanın lazımi turizm potensialı var".
Bu arada xatırladaq ki, Azərbaycana gələn turistlər siyahısı müvafiq icra hakimiyyəti orqanı tərəfindən təsdiq edilən ölkələrin vətəndaşları və ya həmin ölkələrdə daimi yaşayan vətəndaşlığı olmayan şəxslər olduqda "ASAN Viza" sistemi vasitəsilə elektron viza ala biləcəklər. Bu, "Turizm haqqında" qanuna edilən dəyişiklikdə əksini tapıb. Qanuna əsasən, elektron viza almaq üçün əcnəbilər və ya vətəndaşlığı olmayan şəxslər "ASAN Viza" sistemində yerləşdirilmiş elektron müraciət formasında nəzərdə tutulan məlumatları sistemə daxil etməli, müraciətin qəbul olunması barədə müvafiq təsdiqnamə aldıqdan sonra dövlət rüsumunu elektron qaydada ödəməlidir. Elektron vizanın verilməsi ilə bağlı müraciətə ən geci 3 iş günü müddətində baxılır, imtina üçün əsas olmadıqda viza rəsmiləşdirilərək müraciət etmiş şəxsin elektron poçt ünvanına göndərilir. Viza verilməsindən imtina edildikdə, müraciət etmiş şəxsin elektron poçt ünvanına bu barədə məlumat göndərilir. Bütün bunlar turistlərin Azərbaycana gəlişini daha da asanlaşdırır. Beləliklə, qarşıdakı dövrdə Azərbaycana daha çox sayda turistin gəlməsi gözlənir.
Tahir TAĞIYEV
