Azər Allahverənov: "Ola bilsin ki, bunun müqabilində metro ilə bağlı həyata keçirilən digər layihələrə yenidən baxılsın"
2017-ci ildə "Bakı Metropoliteni" QSC-yə sərnişindaşımadan yaranacaq zərərin ödənilməsindən ötrü 30 milyon manat vəsait (subsidiya) proqnozlaşdırılıb. Bu, 2015-2016-cı illərin göstəricilərindən 7 milyon 998.2 min manat və ya 21 faiz azdır.
Bu barədə Hesablama Palatasının 2017-ci il dövlət büdcəsi haqqında qanun layihəsinə verdiyi rəyində bildirilir. Rəydə qeyd edilir ki, sərnişindaşıma xidmətlərinin maya dəyərinin artırılmasının qarşısının alınması və maliyyə-uçot intizamının gücləndirilməsi istiqamətində tədbirlərin görülməsi "Bakı Metropoliteni"nə ayrılan subsidiyaların azaldılmasına, dövlət büdcəsi vəsaitlərinə qənaət edilməsinə gətirib çıxaracaq.
Rəydə Cəmiyyətin strukturunda olan qeyri-kommersiya təyinatlı obyektlərin fəaliyyəti ilə bağlı bəzi məqamlar və ezamiyyət xərclərinin normaya uyğun olmaması da öz əksini tapıb.
Bu arada belə fikirlər yayılıb ki, subsidiyanın azalması metroda gediş haqqının artırılması ilə nəticələnə bilər. Bu onunla əsaslandırılır ki, subsidiyaların 22 faiz azaldılmasını ancaq gediş haqqının artırılması ilə kompensasiya etmək olar. Məlumat üçün qeyd edək ki, sonuncu dəfə 2011-ci ildə Tarif Şurasının qərarı ilə Bakı metrosunda gediş haqqı 15 qəpikdən 20 qəpiyə qaldırılıb.
Sözügedən qurum metroda gediş haqqının artırılması ilə bağlı məsələyə aydınlıq gətirib. Qurumun mətbuat xidmətinin rəhbəri Nəsimi Paşayev bildirib ki, metroda gediş haqqının bahalaşması ilə bağlı yayılan məlumat həqiqəti əks etdirmir. O bunu onunla əsaslandırıb ki, "Bakı Metropoliteni" Qapalı Səhmdar Cəmiyyəti tərəfindən qiymət artımı ilə əlaqədar Tarif (qiymət) Şurasına müraciət edilməyib.
Maraqlıdır, bəs ekspertlər nə düşünür?
Məsələyə münasibət bildirən ekspert Azər Allahverənovun sözlərinə görə, aztəminatlı şəxslərin böyük hissəsinin metrodan istifadə etdiyini nəzərə alsaq, gediş haqqı artırılmamalıdır: "Rəsmi məlumata görə, gün ərzində təqribən 600 minə nəfərə qədər sərnişin metrodan istifadə edir. Bu da sözügedən nəqliyyat sektoru üçün çox böyük bir rəqəmdir. Bir belə insanın metrodan istifadə etdiyini nəzərə alsaq, qiymətlərin artırılması onların gediş-gəlişini çətinləşdirə bilər. Belə olan halda, onlar daha optimal variantı seçmək məcburiyyətində qalacaq ki, bu da metropolitenə iqtisadi baxımdan zərbə vuracaq. Ancaq iqtisadi cəhətdən insanlar maraqlıdır ki, bu ictimai nəqliyyatdan istifadə etsin. Ona görə ki, bu onların büdcəsinə uyğundur. Digər tərəfdən, metro sahəsi inkişaf edir. Hər il olmasa da, müəyyən bir müddətdən sonra yeni stansiyalar istifadəyə verilir. Təbii ki, bu böyük təsərrüfatdır və bu qurum dinamik inkişaf edir. Dinamik inkişaf etməsi üçün də dövlətin bu sahəyə bilavasitə dəstək göstərməsinə ehtiyac var. Subsidiyaların azalmasının müxtəlif səbəbləri ola bilər. İqtisadi vəziyyətlə əlaqədar olaraq subsidiyaların azaldılması anlaşılandır. Ancaq bu azalma qiymətlərin artması anlamına gəlməməlidir. Ola bilsin ki, bunun müqabilində metro ilə bağlı həyata keçirilən digər layihələrə yenidən baxılsın". Vidadi ORDAHALLI
