Milli Məclisin Əmək və sosial siyasət komitəsinin iclasında "Turizm haqqında” yeni qanun layihəsinin ilkin variantı müzakirə edilib.
Trend-in məlumatına görə, iclasda çıxış edən komitə sədri Hadi Rəcəbli deyib ki, "Turizm haqqında” hazırkı qanun 1999-cu ildə qəbul olunub: "Bu qanun artıq müasir dövrün tələblərinə cavab vermir. Buna görə də "Turizm haqqında” yeni qanun layihəsinin hazırlanması üçün işçi qrupu yaradılıb. "Turizm haqqında” qanunun qəbulundan 17 il keçib. Hazırda bizim əlimizdə dünyanın bir çox ölkələrinin - Qazaxıstan, Belarus, Rusiya və digərlərinin qanunları var. Yeni qanun layihəsinin hazırlanması ilə əlaqədar işçi qrupu yaratmışıq və ölkələrin təcrübələrini öyrənmişik. Milli Məclisin spikerinin dəstəyi ilə materiallar işçi qrupu tərəfindən işlənib hazırlanıb”.
Azərbaycanda turizmin böyük potensialının olduğunu deyən H.Rəcəbli bildirib ki, Azərbaycanda 2001-ci ildə 80-dən çox mehmanxana var idisə, indi onların sayı 400-ü keçib: "Bu gün ölkəmizdə 223 muzey, 29 teatr, 6300 tarixi abidə, 27 qoruq var. Turizm potensialı böyükdür, eyni zamanda çatışmayan məsələlər də var. Ölkəmizdə yolların tikilməsinə baxmayaraq, bəzi ərazilərdə hələ də yol yoxdur. Hotellərin tikilməsinə baxmayaraq, ucuz hotellərin sayı azdır. Görülməsi vacib olan işlərimiz görülənlərdən qat-qat çoxdur”.
Komitə sədri deyib ki, Azərbaycanda da Rusiyada olduğu kimi məktəb turizmi yaratmaq olar: "Bu gün daxili turizmlə bağlı böyük işlər görülüb. Türkiyə Rusiya bazarından geri çəkildikdən sonra boşluqlar yaranıb. Bu boşluqları doldurmaq üçün Mədəniyyət və Turizm Nazirliyi tərəfindən mühüm işlər görülür. Oradakı turistlərin 10 faizini Azərbaycana cəlb edə bilsək, nəyəsə nail ola bilərik".
H.Rəcəbli onu da qeyd edib ki, layihənin Milli Məclisin yaz sessiyası dövründə tam hazır olması və plenar iclasa tövsiyə olunması nəzərdə tutulur.
Mədəniyyət və Turizm Nazirliyinin Turizm şöbəsinin Planlaşdırma və inkişaf sektorunun müdiri Mahir Qəhrəmanov bildirib ki, əvvəlki qanunda olan bir çox məsələlər yeni layihədə çıxarılıb. Ümumdünya Turizm Təşkilatının ekspertlərinin tövsiyəsi ilə hazırlanan yeni qanun layihəsinə turizm sahəsi üzrə bir çox vacib məsələlər daxil edilib ki, bütün bunlar da turizmin inkişafına şərait yaradacaq.
Mədəniyyət və Turizm Nazirliyinin Turizm şöbəsinin Planlaşdırma və inkişaf sektorunun müdiri Mahir Qəhrəmanov isə bildirib ki, Azərbaycanda turizm fondlarının yaradılması nəzərdə tutulur. Nazirlik rəsmisi bildirib ki, Azərbaycanda bu günədək Sahibkarlığa Kömək Milli Fondu vasitəsilə verilən vəsaitlərin və digər formada xarici investisiyaların həcmi turizm sahəsində nəzərdə tutulan məsələlərin həllinə nail olmağa kifayət etmir. Ona görə də turizm fondlarının və daha cevik maliyyə mexanizmlərinin yaradılması, bu mexanizmlərin dövlət tərəfindən tənzimlənməsi lazımdır.
M.Qəhrəmanov bu məsələlərin qanuna əlavə edildiyini də söyləyib.
O deyib ki, turizm infrastrukturunun yaradılması çox vacib məsələlərdən biridir: "Regionlarda yollarla, infrastrukturlarla bağlı layihələr həyata keçirilir. Lakin Azərbaycanı həmişə nümunə kimi göstərdiyimiz Türkiyə, İtaliya, İspaniya kimi tirizm ölkəsinə çevirmək istəyiriksə, mütləq müəyyən turizm və rekreasiya zonaları yaradılmalıdır. Həmin zonalara dövlətin dəstəyi ilə birdəfəlik maliyyə vəsaitləri cəlb olunmalıdır. Həm yerli, həm də xarici investorların köməyindən istifadə edərək yataq yerlərinin sayını maksimuma çatdırmalıyıq. Çünki bazar iqtisadiyyatı şəraitində qiymətlərin tənzimlənməsi yollarından biri yataq yerlərinin sayının çox olmasıdır. Bununla bağlı infrastruktur üçün dövlət idarəetmə tələbləri məsələsini ortaya qoymuşuq. Bu məsələ turizm sahəsində xidmətin keyfiyyətinin yaxşılaşmasına yardım edəcək”.
M.Qəhrəmanov deyib ki, layihəyə əsasən, ölkənin mövcud turizm potensialının, xidmətlərin həm yerli, həm də xarici səviyyədə tanıdılması, yəni reklam məqsədləri üçün idarəetmə formatında turizm bürolarının yaradılması planlaşdırılır. Həmin bürolar regionlarda turizm xidməti sahələrinin formalaşmasına, onun təşviqi işinin gücləndirilməsinə təsir göstərəcək. Bununla yanaşı, layihədə turizm informasiya mərkəzlərinin şəbəkəsinin genişləndirilməsi, onların müasir dövrün tələblərinə cavab verən formada qurulması məsələsi ortaya qoyulub.
O, qeyd edib ki, hazırkı qanundan fərqli olaraq, yeni qanun layihəsində turizm növləri - sağlamlıq, sosial, ekoloji, ekstremal, kənd-yaşıl turizmi ayrıca qeyd edilib: "Lakin bu o demək deyil ki, bu gün Azərbaycanda yalnız həmin turizm növləri var. Azərbaycanda turizmin çox geniş növləri var. Lakin digər ölkələrin təcrübəsi və Ümumdünya Turizm Təşkilatının tövsiyələrinə görə, bu turizm növlərinə dövlət dəstəyinin vacibliyini nəzərə alaraq, onları qanun layihəsinə salmışıq”.
Turistlərin təhlükəsizliyi məsələsinin çox vacib olduğunu deyən Mahir Qəhrəmanov
bildirib ki, yeni layihəyə Azərbaycan vətəndaşları xaricdə olarkən, yaxud ölkənin müxtəlif ərazilərində turist səfərləri zamanı problemli halların aradan qaldırılması ilə bağlı turistlərin təhlükəsizliyinin təmini, sığortalanması məsələləri öz əksini tapıb".
Nazirlik rəsmisi deyib ki, əsas məsələlərdən biri turistlərin təhlükəsizliyini təmin edən turist marşrutlarının yaradılması, onların pasportlaşdırılmasıdır: "Azərbaycanda mövcud olan qeyri-maddi və maddi abidələr bizə imkan verir ki, ölkəmizi kifayət qədər cəlbedici turizm məkanına çevirmək üçün turist marşrutu yaradaq”.
